Omicron Variant: ఒమిక్రాన్ సినిమా చూపిస్తుందట.. 75 వేల మరణాలు.. నిపుణుల హెచ్చరిక!

ఒమిక్రాన్ కారణంగా వచ్చే ఏడాది ఏప్రిల్ నాటికి యూకేలో 75 వేల మరణాలు సంభవించే అవకాశం ఉందని తాజా అధ్యయనం వెల్లడించింది.

కరోనా కొత్త వేరియంట్ ఒమిక్రాన్ ప్రపంచాన్ని గడగడలాడిస్తోంది. బ్రిటన్‌, ఇజ్రాయెల్‌ సహా అనేక దేశాల్లో శరవేగంగా విస్తరిస్తోంది. అయితే ఒమిక్రాన్ వ్యాప్తిపై తాజాగా బ్రిటిష్ హెల్త్ డిపార్ట్‌మెంట్ చెప్పిన లెక్కలు భయపెడుతున్నాయి. గడచిన 24 గంటల్లో యూకేలో దాదాపు 663 ఒమిక్రాన్‌ కేసులు నమోదయ్యాయి.

బ్రిటన్‌లో మహమ్మారి బారిన పడ్డవారి సంఖ్య 1898కి చేరుకుంది. ఇజ్రాయెల్‌ దేశంలో కూడా ఒమిక్రాన్ 57 శాతం వేగంగా వ్యాపిస్తోంది. 

75 వేల మంది..

ఇదే విధంగా ఒమిక్రాన్ ఉద్ధృతి కొనసాగితే ఈ నెల చివరినాటికి యూకేలో ఒమిక్రాన్‌ కేసులు పది లక్షలకు చేరే అవకాశం ఉందని నిపుణులు అంచనా వేస్తున్నారు. మొత్తం కరోనా కేసుల్లో ఒమిక్రాన్‌ కేసులే సగానికి పైగా ఉంటాయని హెచ్చరిస్తున్నారు.

యూకే జనాభాలో 12 ఏళ్లకు పైబడిన 81 శాతం మందికి రెండు డోసుల వాక్సిన్లు పూర్తయ్యాయి. అయినప్పటికీ లండన్‌ స్కూల్‌ ఆఫ్‌ హైజీన్‌ అండ్‌ ట్రోపికల్‌ మెడిసిన్‌ మాత్రం వచ్చే ఏడాది ఏప్రిల్‌ నాటికి ఒమిక్రాన్‌ కారణంగా యూకేలో 25 వేల నుంచి 75 వేల వరకు మరణాలు సంభవించే అవకాశం ఉందని హెచ్చరిస్తోంది.

మరోవైపు ఒమిక్రాన్‌ బారీనపడ్డవారిలో అధికశాతం మంది విదేశాల నుంచి వచ్చినవారేనని ఇజ్రాయెల్‌ ప్రభుత్వం వెల్లడించింది. మొత్తం 55 మందిలో 36 మంది సౌత్‌ ఆఫ్రికా, బ్రిటన్‌, ఫ్రాన్స్‌, యూఎస్‌, యూఏఈ, బెలారస్‌, హంగేరీ, ఇటలీ, నమీబియా నుంచి వచ్చారు. 

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి