Vidudala Part 1: ఓటీటీలోకి 'విడుదల పార్ట్ 1' - స్ట్రీమింగ్ ఎప్పటి నుంచంటే?

Vidudala Part 1 : సంచలన దర్శకుడు వెట్రిమారన్ తాజాగా విడుదల చేసిన 'విడుతలై పార్ట్ 1' ప్రేక్షకులను మాత్రమే కాకుండా విమర్శకులను సైతం ఆకట్టుకుంది. తమిళ కమెడియన్ సూరి ప్రధాన పాత్రలో నటించిన ఈ చిత్రం తెలుగులో కూడా 'విడుదల పార్ట్ 1'గా విడుదలైంది. ఇప్పుడు ఈ చిత్రం OTTలో అరంగేట్రం చేయడానికి సిద్ధంగా ఉంది.

విజయ్‌ సేతుపతి, సూరి కీలక పాత్రల్లో తెరకెక్కిన క్రైమ్ థ్రిల్లర్ 'విడుతలై పార్ట్ 1'. ఇప్పటికే తమిళంలో విడుదలైన ఈ మూవీ బాక్సాఫీస్ వద్ద పాజిటివ్ టాక్ తెచ్చుకుంది. కాగా ఈ సినిమాను  తెలుగులోనూ 'విడుదల పార్ట్‌1' పేరుతో విడుదల చేసేందుకు మేకర్స్ ప్లాన్ చేశారు. ఈ సందర్భంగా గత కొన్నిరోజుల క్రితమే తెలుగు ట్రైలర్‌ను రిలీజ్ చేశారు. అనంతరం ఈ  చిత్రాన్ని చెప్పిన్నట్టుగానే ఏప్రిల్‌ 15వ తేదీన తెలుగు ప్రేక్షకుల ముందుకు తీసుకువచ్చారు. అయితే ఈ మూవీని ప్రముఖ నిర్మాత అల్లు అరవింద్ గీతా ఫిల్మ్‌ డిస్ట్రిబ్యూషన్‌ ద్వారా విడుదల చేశారు.

'విచారణై', 'అసురన్', 'కాక ముట్టై' సినిమాలతో ఇప్పటికే తన టాలెంట్ నిరూపించుకున్న వెట్రిమారన్..  విడుదల సినిమా ద్వారా మరో సారి తన సత్తా ఏంటో చూపించారు. ఆద్యంతం ఆసక్తి రేకెత్తించేలా సూరి యాక్షన్ సన్నివేశాలు, క్లైమాక్స్ సీన్స్ ఎంతో ఇంట్రస్టింగ్ గా అనిపిస్తాయి. విడుదల సినిమా ఇక్కడితో ఆగిపోలేదు. దీనికి సీక్వెల్ కూడా ఉండడంతో ప్రేక్షకులకు వెట్రిమారన్ పార్ట్ 2పై మొత్తానికి ఇంట్రస్ట్ కలిగేలా చేశారు. సహజంగా ఉండేలా తీసిన కొన్ని సీన్స్ ఆడియెన్స్ ను మరింత ఆకట్టుకున్న టాక్ కూడా వినిపించింది. దీంతో తెలుగులోనూ ఈ మూవీకి మంచి మార్కులే పడ్డాయి. పలువురు సినీ ప్రముఖులు సైతం సినిమా బాగుందంటూ సోషల్ మీడియా ద్వారా పంచుకున్నారు కూడా.
 
‘ఆడుకాలం’ సినిమాకు ఉత్తమ దర్శకుడిగా జాతీయ పురస్కారం అందుకున్న వెట్రిమారన్ తీసిన తెలుగు వెర్షన్ 'విడుదల పార్ట్ 1' ఓటీటీ రిలీజ్ పై ప్రస్తుతం అంతటా చర్చ సాగుతోంది. ఇటీవలే  ఈ సినిమా తమిళ ఓటీటీ హక్కులను జీ5 సొంతం చేసుకున్నట్లు వార్తలు వినిపించగా.. ఈనెల చివరి వారంలో ఇంగ్లీష్ సబ్ టైటిల్స్ తో స్ట్రీమింగ్ అవుతుందని జోరుగా ప్రచారం కూడా సాగింది. అంతేకాదు ఈ చిత్రం ఏప్రిల్ 28, 2023న ZEE5లో ప్రీమియర్‌గా ప్రదర్శించబడుతుందని సోషల్ మీడియాలోనూ వైరల్ అయింది. ఒకవేళ అదే నిజమైతే, తెలుగు వెర్షన్ 'విడుదల పార్ట్ 1' ఆన్ లైన్ ఫ్లాట్ ఫామ్ లోనూ విడుదల కానుంది. కాగా దీనికి సంబంధించిన అధికారిక ప్రకటన వెలువడాల్సి ఉంది.

ఈ సినిమాలో మక్కల్ సెల్వన్ విజయ్ సేతుపతి పవర్ ఫుల్ క్యామియోలో నటించాడు. ఈ కాప్ యాక్షన్ డ్రామాలో భవాని శ్రీ మహిళా ప్రధాన పాత్ర పోషించారు. ఇందులో చేతన్, గౌతం వాసుదేవ్ మీనన్, ఇళవరసు, బాలాజీ శక్తివేల్, తమిళ్ తో పాటు ఇతరులు కీలక పాత్రలు పోషిమంచారు. ఈ చిత్రానికి ఇళయరాజా స్వరకర్త.