Unstoppable With NBK-2: ‘అన్‌స్టాపబుల్’ స్టైల్ - చేతిలో కత్తి, కొరడా.. ఇండియానా జోన్స్‌ను తలపిస్తున్న బాలయ్య

అభిమానులకు నందమూరి బాలకృష్ణ అదిరిపోయే ట్రీట్ ఇవ్వబోతున్నారు. దసరా పండుగ వేళ అన్‌స్టాప‌బుల్ విత్ ఎన్‌బీకే-2 ట్రైలర్ విడుదల చేయబోతున్నారు. ఇవాళ సాయంత్రం విజయవాడలో ఈ వేడుక అంగరంగ వైభవంగా జరగనుంది.

Photo@ahavideoin/instagram

నందమూరి నటసింహం బాలయ్య హోస్ట్ గా చేసిన అన్ స్టాపబుల్ విత్ ఎన్‌బీకే షోకు ఏ రేంజిలో ప్రేక్షకాదరణ దక్కించుకుందో చెప్పాల్సిన అవసరం లేదు. సినీ పరిశ్రమకు చెందిన టాప్ సెలబ్రిటీలు ఈ టాక్ షోలో పాల్గొనడంతో సూపర్, డూపర్ సక్సెస్ అయ్యింది. సెలబ్రీటీలను ఆయన అడిగే ప్రశ్నలు ఆడియెన్స్ ను ఎంతగానో ఆకట్టుకున్నాయి. ఈ షోకు తెలుగు రాష్ట్రాల ప్రేక్షకుల నుంచి మంచి స్పందన లభించింది.  ఓవైపు వరుసగా సినిమాలు చేస్తూనే మరోవైపు డిజిటల్ రంగంలోకి అడుగు పెట్టారు బాలయ్య.  అన్‌స్టాప‌బుల్ విత్ ఎన్‌బీకే  అంటూ ఓటీటీ ఫ్లాట్ ఫామ్ ఆహాలో ఆయ‌న చేసిన సంద‌డి ఓ రేంజిలో ఉండేది. గతంలో ఎప్పుడూ కనిపించని బాలయ్య ఈ షోతో జనాలకు దర్శనం ఇచ్చారు. తొలి సీజన్ అనుకున్న దానికంటే అద్భుత సక్సెస్ సాధించడంతో ప్రస్తుతం కొనసాగింపుగా అన్‌ స్టాప‌బుల్ విత్ ఎన్‌బీకే-2తో బాలయ్య మళ్లీ అలరించబోతున్నారు.   

ఆహాలో త్వరలో ప్రసారం కాబోతున్న అన్‌స్టాప‌బుల్ విత్ ఎన్‌బీకే-2 షో కోసం షూటింగ్ వేగంగా కొనసాగుతోంది. ఇప్పటికే అన్‌స్టాప‌బుల్ యాంథ‌మ్‌ ఆహా విడుదల చేసింది. తాజాగా ఈ షో ట్రైలర్ షూటింగ్ కంప్లీట్ అయ్యింది. ద‌ర్శ‌కుడు ప్ర‌శాంత్ వ‌ర్మ ఈ ట్రైలర్ ను తెరకెక్కించారు. హైదరాబాద్‌లో ఈ ట్రైలర్ షూటింగ్ కొనసాగింది. ఈ ట్రైలర్ లో కొంత భాగం సారథి స్టూడియోలో, మరి కొంత భాగం అన్నపూర్ణ సెట్ లో చిత్రీకరించారు.  బాలయ్య డిఫరెంట్ గెటప్ లో ఈ షూట్ లో పాల్గొన్నారు. తాజాగా ఈ షూట్ కు సంబంధించిన ఫోటోలను ఆహా ట్విట్టర్ లో పోస్ట్ చేసింది.

Can you all see the magic already?
Some BTS stills for you all to feast until the euphoria begins from 6pm.😎🕵‍♂️🔥#NandamuriBalakrishna#UnstoppableWithNBKS2 pic.twitter.com/K8ZJp3jW79

— ahavideoin (@ahavideoIN) October 4, 2022

ద‌స‌రా సంద‌ర్భంగా ఈ ట్రైలర్ రిలీజ్ కాబోతుంది. బెజవాడ దుర్గమ్మ సాక్షిగా విడుదల చేసేందుకు ఆహా రెడీ అయ్యింది. ఇప్పటికే ఈ కార్యక్రమానికి భారీ ఎత్తున ఏర్పాటు చేశారు. అభిమానుల కోలాహలం నడుమ ఈ రోజు(04.10.2022) సాయంత్ర 6 గంటలకు ఈ ట్రైలర్ రిలీజ్ కానుంది. గతంలో ఎప్పుడూ లేని విధంగా ఓ ఓటీటీ టాక్ షోకు ప్రి రీలీజ్ ఈవెంట్ నిర్వహిస్తున్నారు. ఈ సందర్భంగా దర్శకుడు ప్రశాంత్ వర్మ ఈ షో గురించి కీలక వ్యాఖ్యలు చేశారు. సీజన్ 1 ప్రోమో షూట్ తర్వాత బాలకృష్ణతో మరోసారి పని చేయాలని భావించినట్లు  వెల్లడించారు. అనుకున్నట్లుగానే  ఈసారి కూడా అవకాశం తనకే వచ్చిందన్నారు. ఆహ టీం సీజన్ 2 ట్రైలర్ కోసం స్టోరీ రాయాలి అనగానే వెంటనే ఓకే చెప్పినట్లు వెల్లడించారు.  బాలయ్యతో పని చేయడం చాలా సంతోషంగా ఉందన్నారు.  ఈ  ట్రైలర్ జనాలకు నచ్చుతుందని భావిస్తున్నట్లు తెలిపారు.