Ajith Bike Trip: రష్యాలో అజీత్ కుమార్.. బైకుపై 5 వేల కిమీలు జర్నీ, ఫొటోలు వైరల్

హీరో అజీత్ కుమార్ రష్యాలో ప్రత్యక్షమయ్యారు. సుమారు 5 వేల బైక్ ట్రిప్ చేశారు. ఈ ఫొటోలు సోషల్ మీడియాలో వైరల్ అవుతున్నాయి.

Ajith Kumar/Pic: Social Media

తమిళ హీరో అజీత్ కుమార్‌ సినిమాలే కాదు.. కార్, బైక్ రేసులను సైతం చాలా ఇష్టపడతారు. అయితే, ఓ ప్రమాదం తర్వాత ఆయన కార్ రేసులకు దూరంగా ఉన్నారు. కానీ, బైకులపై ఉన్న ఇష్టాన్ని మాత్రం ఆయన చంపుకులేక పోతున్నారు. ఇటీవల ఇండియాలోని ఈశాన్య రాష్ట్రాల్లో బైకులో పర్యటించిన అజీత్.. అకస్మాత్తుగా రష్యాలో ప్రత్యక్షమయ్యారు. బైకు మీద చక్కర్లు కొడుతూ.. తన అభిమానులను ఆశ్చర్యపరిచారు. ఈ ఫొటోలు ఇప్పుడు సోషల్ మీడియాలో వైరల్‌గా చక్కర్లు కొడుతున్నాయి. 

‘వాలీమై’ షూటింగ్‌లో అజీత్ బిజీగా ఉన్న సంగతి తెలిసిందే. దివంగత నటి శ్రీదేవి భర్త బోనీకపూర్ నిర్మిస్తున్న ఈ చిత్రానికి హెచ్.వినోద్ దర్శకత్వం వహిస్తున్నారు. ఇటీవలే హైదరాబాద్‌లో ఈ సినిమా షెడ్యూల్ పూర్తయ్యింది. అనంతరం చిత్రయూనిట్ మరికొన్ని పతాక సన్నివేశాల చిత్రీకరణ కోసం రష్యా వెళ్లారు. అక్కడ షూటింగ్ పూర్తయిన తర్వాత అజీత్.. తన స్నేహితుడితో కలిసి బైక్ ట్రిప్‌కు వెళ్లారు. రష్యాలో సుమారు 5 వేల కిలోమీటర్లు ఆయన చుట్టివచ్చారని తెలిసింది. అలాగే, అజీత్ బైకు మీద ప్రపంచయాత్రకు కూడా ప్లాన్ చేస్తున్నట్లు సమాచారం. 

రష్యాలో అజీత్ బైకు మీద షికారు చేస్తున్న ఫొటోలను ఆయన అభిమానులు సోషల్ మీడియా ద్వారా షేర్ చేసుకుంటున్నారు. అజీత్ నటనలోకి రావడానికి ముందు బైక్ రేసర్ కావాలని అనుకున్నారు. అయితే, సినిమాల్లో వరసు అవకాశాలతో అజీత్ బిజీగా మారిపోయారు. అయితే, ఎప్పుడు సమయం దొరికినా కార్, బైక్ రేసుల్లో పాల్గొనేవారు. ఏరో మోడలింగ్, కార్ రేస్, బైక్ రేస్‌పై అజీత్ పట్టు సాధించారు. కొన్ని నెలల కిందట అజీత్ ఇండియాలో సుమారు 10,800 కిమీలు ప్రయాణించారు. అజీత్ కొన్ని ఇటీవల రాష్ట్ర స్థాయి షూటింగ్ పోటీల్లో పాల్గొని బంగారు పతకం సాధించారు. జాతీయ స్థాయి పోటీలకు సైతం అర్హత సాదించడం గమనార్హం.