Dil Raju: మూవీ రివ్యూ నేను రాస్తానంటున్న దిల్‌ రాజు - 'రేవు' ట్రైలర్‌ లాంచ్‌ ఈవెంట్‌లో నిర్మాత ఒపెన్ స్టేట్‌మెంట్!

Dil Raju Comments: స్టార్‌ నిర్మాత దిల్‌ రాజు మూవీ రివ్యూ రాస్తానంటున్నారు. 'రేవు' మూవీ ట్రైలర్‌ లాంచ్‌లో ఈవెంట్‌లో పాల్గొన్న ఆయన ఈ సినిమా చూసి తానే రివ్యూ రాస్తానంటూ ఆసక్తికర కామెంట్స్‌ చేశారు.

‘రేవు‘ ట్రైలర్ లాంచ్ వేడుకలో నిర్మాత దిల్ రాజు

Source : Social Media

Dil Raju Speech At Revu Movie Trailer Launch Event: ఇప్పటి వరకు సినిమాలకు జర్నలిస్టులు రివ్యూలు రాయడం చూశాం. కానీ, ఇప్పుడు ఓ స్టార్ ప్రొడ్యూసర్ సినిమాకు రివ్యూ రాబోతోన్నారు. ప్రొడ్యూసర్ సినిమాకు రివ్యూ రాయడం ఏంటని ఆశ్చర్యపోతున్నారా? అక్కడే ఓ ట్విస్టు ఉంది. ఇద్దరు సినీ జర్నలిస్టులు ‘రేవు‘ అనే సినిమా నిర్మాణంలో కీలక పాత్ర పోషించారు. త్వరలో ఈ మూవీ థియేటర్లలోకి రాబోతోంది. తాజాగా ఈ సినిమాకు సంబంధించిన ట్రైలర్ లాంచ్ ఈవెంట్ జరిగింది. ఈ వేడుకలో ప్రముఖ నిర్మాత దిల్ రాజు పాల్గొన్నారు. ఈ సందర్భంగా ఆయన ఆసక్తికర కామెంట్స్ చేశారు.

ఆగష్టు 23న ‘రేవు‘ విడుదల

వంశీ రామ్ పెండ్యాల, అజయ్, స్వాతి భీమిరెడ్డి, ఏపూరి హరి ప్రధాన పాత్రల్లో ‘రేవు‘ మూవీ తెరకెక్కింది. హరినాథ్ పులి ఈ చిత్రానికి దర్శకత్వం వహించారు. ఈ చిత్రాన్ని సంహిత్ ఎంటర్టైన్మెంట్స్ బ్యానర్, పారుపల్లి ప్రొడక్షన్ బ్యానర్ లో నిర్మాత డా. మురళీ గింజుపల్లి, నవీన్ పారుపల్లి సంయుక్తంగా నిర్మించారు. నిర్మాణ సూపర్ విజన్‌ గా జర్నలిస్ట్ ప్రభు, ఎగ్జిక్యూటివ్ నిర్మాతగా సీనియర్ ఫిలిం జర్నలిస్ట్ పర్వతనేని రాంబాబు వ్యవహరిస్తున్నారు. ఈ మూవీ ఆగస్ట్ 23న రిలీజ్ కానుంది. ఈ నేపథ్యంలో ట్రైలర్‌ను లాంచ్ చేశారు. ఈ వేడుకలో దిల్ రాజు చీఫ్ గెస్టుగా పాల్గొన్నారు.

‘రేవు’ సినిమాకు నేను రివ్యూ రాస్తా- దిల్ రాజు

ఇక ట్రైలర్ లాంఛ్ వేడుకలో దిల్ రాజు ఆసక్తికర వ్యాఖ్యలు చేశారు. ఇంత వరకు వీళ్ళు(ప్రభు, రాంబాబు) సినిమాని చూసి రివ్యూ రాశారని.. ఇప్పుడు తాను ఈ సినిమా చూసి రివ్యూ రాస్తానని వెల్లడించారు. “కొత్త వాళ్లు.. కొత్త వాళ్లతో ప్రయోగం చేస్తూనే ఉంటారు. కానీ 99 శాతం ఫెయిల్యూర్. వన్ పర్సెంట్ సక్సెస్ ఉంటుంది. మురళీ వంటి వారు కొత్త వాళ్లతో సినిమాను చేశారు. ప్రభు, పర్వతనేని రాంబాబు ఈ సినిమా నిర్మాణంలో కీలక పాత్ర పోషించిన నేపథ్యంలో మేం ఇక్కడకు వచ్చాం. ఇలాంటి సినిమాను తీయడం గొప్ప కాదు. ప్రేక్షకులను థియేటర్ వరకు తీసుకు రావడం గొప్ప. ‘రేవు’ కాన్సెప్ట్ బాగుంది. రాంబాబు, ప్రభు నాకు చాలా మంచి సన్నిహితులు. వారు ఈ చిత్రం గురించి చెప్పారు. వీళ్లు వెనకాల ఉండి ఈ సినిమాను తీశారు కాబట్టి.. నేను ముందుండి నడిపించాలని అనుకున్నాను. చిన్న సినిమా అని వదిలేయకండి. థియేటర్ కి వెళ్లి చూడండి. నిజానికి ఆడియెన్స్ ను మేమే చెడగొట్టాం. ఇంట్లోనే ఉండండి, 4 వారాల్లో సినిమా ఓటీటీలోకి వస్తుందని ప్రచారం చేశాం. కానీ, సినిమాను థియేటర్లలో చూస్తే వచ్చే అనుభూతి బాగుంటుందని గుర్తించాలి” అని దిల్ రాజు వెల్లడించారు.