'ఆదిపురుష్'పై నెగటివ్ రివ్యూ - యువకుడిని చితకబాదిన అభిమానులు

రెబల్ స్టార్ ప్రభాస్ మైథలాజికల్ మూవీ 'ఆదిపురుష్' సినిమా రిలీజైంది. ఈ నేపథ్యంలో మూవీపై తన అభిప్రాయాన్ని చెప్పినందుకు ప్రభాస్ ఫ్యాన్స్ అందరూ చూస్తుండగానే ఓ వ్యక్తిని కొట్టారు. ఈ వీడియో వైరల్ గా మారింది.

ఆదిపురుష్( Image Credits: Adipurush/Twitter)

Aadipurush : భారీ బడ్జెట్ అండ్ 'ఆదిపురుష్' సినిమా విడుదలై సెన్సేషన్ సృష్టిస్తోంది. భారీ అంచనాలతో రిలీజైన ఈ మూవీపై మిశ్రమ స్పందన వస్తోంది. ఈ నేపథ్యంలో 'ఆదిపురుష్' కు వ్యతిరేకంగా రివ్యూ ఇచ్చిన వారిపై ప్రభాస్ ఫ్యాన్స్ దాడులకు పాల్పడుతున్నారు. దీన్ని చూసిన కొందరు నెటిజన్లు 'వరెస్ట్ బిహేవియర్' అంటూ అభిమానులపై మండిపడుతున్నారు.

'ఆదిపురుష్' సినిమాపై విమర్శలు చేసినందుకు ఓ వ్యక్తిని కొందరు అభిమానులు కొట్టిన వీడియో ఇంటర్నెట్‌లో చక్కర్లు కొడుతోంది. ఈ ఘటన హైదరాబాద్‌లో జరిగినట్టు సమాచారం. ఈ వీడియో యువకుడు మాటిన మాటలు కూడా వైరల్ గా మారాయి. “ఆచార్య సినిమాలో చిరంజీవి గారిని గ్రాఫిక్స్ లో ఎలా చూశామో.. ఈ సినిమాలో ప్రభాస్ ను కూడా అలాగే చూపించారు. ఇందులో ప్లే స్టేషన్ గేమ్స్ నుంచి అన్ని రాక్షసులను తీసుకువచ్చిన ఉంచారు. హనుమాన్, బ్యాక్‌గ్రౌండ్ మ్యూజిక్ స్కోర్, అక్కడక్కడా కొన్ని 3డి షాట్లు తప్ప ఈ సినిమాలో మరేమీ లేవు. ప్రభాస్ నటన గురించి చెప్పాలంటే రాముడి గెటప్‌ ఆయనకు అస్సలు సూట్ కాలేదు. బాహుబ‌లిలో ఒక రాజులా ఉండేవాడు, రాజ‌కీయ ప‌రిస్థితులు ఉండేవి. అందులోని రాయల్టీని చూసి ఈ పాత్రకు ఆయన్ను తీసుకున్నారు. డైరెక్టర్ ఓం రౌత్.. ఆదిపురుష్ లో ప్రభాస్‌ని సరిగ్గా చూపించలేదు" అని ఓ యువకుడు వీడియోలో తెలిపారు.

ఈ సమయంలో పక్కనే ఉన్న ఓ వ్యక్తి తిట్టడం మొదలుపెట్టాడు. "కళ్లు ఎక్కడ పెట్టుకుని చూశావ్" అంటూ.. అతనితో పాటు మరికొందరు కూడా ఆ యువకుడిని కొట్టేందుకు మీదికి వచ్చారు. "దెబ్బలు తినకుండా వెంటనే ఇక్కడ్నుంచి వెళ్లిపో" అంటూ అరుస్తూ హెచ్చరించారు. "కళ్లద్దాలు తీసి సినిమా చూసినట్టున్నాడు.. అందుకే ఇలా చెప్తున్నాడం"టూ బూతులతో అతన్ని బెదిరించారు. ఈ క్రమంలోనే యువకుడి టీ షర్టు పట్టుకుని కొట్టడం మొదలుపెట్టారు. అంతలోనే అక్కడికి వచ్చిన మరికొందరు యువకులు వారిని ఆపి, యువకుడిని రక్షించారు. ఈ వీడియో ప్రస్తుతం తెగ షేర్ అవుతోంది. 

ఈ వీడియోపై కొందరు విమర్శల వర్షం కురిపిస్తున్నారు. జెన్యూన్ రివ్యూ ఇచ్చినందుకు ప్రభాస్ ఫ్యాన్స్ ఈ పని చేశారంటూ వీడియోను పలు సోషల్ మీడియా ప్లాట్ ఫామ్స్ లలో పంచుకోవడంతో ఈ న్యూస్ హాట్ టాపిక్ గా మారింది. ఇక ఈ వీడియోపై కామెంట్లు కూడా అదే స్థాయిలో వస్తున్నాయి. విజయ్ ఫ్యాన్స్ లాగే చేస్తున్నారని కొందరు కామెంట్స్ పెడుతుండగా.. విజయ్, అజిత్ ఫ్యాన్స్ ట్విట్టర్ ఎప్పుడూ కొట్టుకునే వాళ్లలాగే ఉన్నారని మరికొందరు అంటున్నారు. ఆ యువకుడు చెప్పింది జెన్యూన్ రివ్యూ అంటూ ఇంకొందరు అతనికి సపోర్ట్ గా నిలుస్తున్నారు.

ఇక ఆదిపురుష్ సినిమా విషయానికొస్తే ఓం రౌత్ దర్శకత్వంలో తెరకెక్కిన ఈ సినిమాలో ప్రభాస్ రాముడిగా, హీరోయిన్ కృతి సనన్ సీతగా, బాలీవుడ్ నటుడు సైఫ్ అలీఖాన్ రావణుడిగా నటించారు.