Vishnu Manchu - Ginna Title Song : నాతో పెట్టుకుంటే ఊరుకోను, నాకు ఎవరు సాటి లేరు - వచ్చిండు చూడు మన 'జిన్నా' భాయ్

విష్ణు మంచు కథానాయకుడిగా నటించిన 'జిన్నా' సినిమా టైటిల్ సాంగ్ ఈ రోజు విడుదల చేశారు.

'జిన్నా'లో విష్ణు మంచు

విష్ణు మంచు (Vishnu Manchu) కథానాయకుడిగా నటించిన హారర్ కామెడీ ఫిల్మ్ 'జిన్నా' (Ginna Movie). ఈ రోజు సినిమా టైటిల్ సాంగ్ విడుదల చేశారు. దీనికి సంగీత దర్శకుడు అనూప్ రూబెన్స్ మాంచి ఎనర్జిటిక్ ట్యూన్ అందించారు.
 
'నా పేరు జిన్న రా...
అందరికి అన్న రా!
నకారల్ చేస్తే కిస్సా ఖల్లాస్ రా' అంటూ మొదలైన ఈ పాటను ప్రేమ్ రాశారు. యంగ్ సింగింగ్ సెన్సేషన్ పృథ్వీ చంద్ర ఆలపించారు.
 
'వచ్చిండు చూడు మన జిన్నా భాయ్...
తొడ గొట్టిండు చూడు మన జిన్నా భాయ్...
ఎప్పటికైనా ఎవడితోటి వీడికి పోటీ లేదురా

వీడి గుండె నిండా మండే ఫైర్ నిండి ఉందిరా
నీకు అంత దమ్ము ఉంటే వచ్చి ముందు నించోరా

వీడికింక ఎవరు అసలు సాటి లేరు లే...

రా... నువ్వొస్తే మంచి చెడ్డ రెండు నేర్పుతా!
కానీ నాతో పెట్టుకుంటే అసలు ఊరుకోను!
నీకు ఉన్న తీట తీర్చి తిప్పి పంపుతాను!' అంటూ 'జిన్నా' టైటిల్ సాంగ్ సాగింది. ఈ లిరిక్స్ సెన్సేషన్ క్రియేట్ చేసేలా ఉన్నాయని నెటిజన్లు అభిప్రాయ పడుతున్నారు. దీనిపై ఎటువంటి స్పందన వస్తుందో చూడాలి.

విజయ దశమికి 'జిన్నా' ట్రైలర్ లాంచ్!
Ginna Movie Trailer Release On Dussehra 2022 : తొలుత 'జిన్నా' సినిమాను విజయ దశమికి విడుదల చేయాలనుకున్నారు. అయితే... దసరాకు ట్రైలర్  విడుదల చేయనున్నట్లు విష్ణు మంచు తెలిపారు. సినిమాను అక్టోబర్ 21న ప్రేక్షకుల ముందుకు తీసుకు వస్తామని ఆయన పేర్కొన్నారు.  

అక్టోబర్ 5న చిరంజీవి 'గాడ్ ఫాదర్', అక్కినేని నాగార్జున 'ది ఘోస్ట్', బెల్లంకొండ గణేష్ కథానాయకుడిగా పరిచయం అవుతున్న 'స్వాతి ముత్యం' ప్రేక్షకుల ముందుకు వస్తున్నాయి. విష్ణు మంచు సినిమా వస్తే థియేటర్లలో గట్టి పోటీ ఉండేది. ఆయన సినిమాను వాయిదా వేయడం వల్ల ఆ పోటీ తప్పింది.

'జిన్నా' సినిమాతో పాన్ ఇండియా మార్కెట్ మీద విష్ణు మంచు కన్నేశారు. తెలుగు  సహా హిందీ, మలయాళం భాషల్లో సినిమాను విడుదల చేయడానికి సన్నాహాలు చేస్తున్నారు. అందుకని, ఏ విషయంలోనూ కాంప్రమైజ్ కావడం లేదు. హారర్ కామెడీగా రూపొందిన ఈ సినిమాలో ఫైట్లు, పాటల మీద ప్రత్యేక దృష్టి పెట్టారు. ముఖ్యంగా ఒక్కో పాటకు ఒక్కో స్టార్ కొరియోగ్రాఫర్ చేత స్టెప్పులు కంపోజ్ చేయించారు. 'జిన్నా'లో 'గోలి సోడా' పాటకు ప్రభుదేవా కొరియోగ్రఫీ చేశారు. గణేష్ ఆచార్య మరో సాంగ్ చేశారు. 'జిన్నా' టైటిల్ సాంగ్‌కు ప్రేమ్ రక్షిత్ కొరియోగ్రఫీ అందించారు. 

సన్నీ లియోన్... పాయల్... ఇద్దరు హీరోయిన్లు!
'జిన్నా'లో ఇద్దరు హీరోయిన్లు ఉన్నారు. స్వాతి పాత్రలో పాయల్ రాజ్‌పుత్‌ (Payal Rajput), రేణుకగా సన్నీ లియోన్ (Sunny Leone) నటించారు. ఈ సినిమా 'చంద్రముఖి' తరహాలో ఉంటుందని, బాక్సాఫీస్ బరిలో భారీ వసూళ్లు సాధిస్తుందని విష్ణు మంచు ఆశాభావం వ్యక్తం చేశారు.

కలెక్షన్ కింగ్ డా. మంచు మోహన్ బాబు ఆశీస్సులతో అవ ఎంట‌ర్‌టైన్‌మెంట్స్‌ పతాకంపై ఈ సినిమా తెరకెక్కుతోంది. దర్శకుడు జి. నాగేశ్వర రెడ్డి మూల కథ అందించగా... కోన వెంకట్ కథ, స్క్రీన్ ప్లే అందిస్తున్నారు. క్రియేటివ్ ప్రొడ్యూసర్ కూడా ఆయనే. ఈషాన్ సూర్య దర్శకత్వం వహిస్తున్నారు. చోటా కె. నాయుడు ఛాయాగ్రహణం అందించారు. అనూప్ రూబెన్స్ సంగీతం అందిస్తున్నారు. 'వెన్నెల' కిశోర్, 'చమ్మక్' చంద్ర, రఘుబాబు, సద్దాం తదితరులు కీలక పాత్రలు చేశారు.