Sivakarthikeyan: శివకార్తికేయన్‌తో చేతులు కలపనున్న సల్మాన్ ఖాన్ - ఆ దర్శకుడి కోసమే!

Sivakarthikeyan - Salman Khan: సల్మాన్ ఖాన్, శివకార్తికేయన్ స్క్రీన్ షేర్ చేసుకోనున్నారు అనే వార్త వినడానికే చాలా డిఫరెంట్‌గా అనిపిస్తోంది కదా.. కానీ ఒక సీనియర్ డైరెక్టర్ ఈ కాంబినేషన్‌ను సెట్ చేశారట.

సల్మాన్ ఖాన్, శివకార్తికేయన్ (Image Credit: Instagram)

Sivakarthikeyan - Salman Khan In SK 23: ఈరోజుల్లో సౌత్ సినిమాల్లో నటించడానికి బాలీవుడ్ స్టార్ హీరోలు సైతం ఓకే చెప్పేస్తున్నారు. యంగ్ హీరోలు, సీనియర్ హీరోలు అని తేడా లేకుండా సౌత్ సినిమాల్లో గెస్ట్ రోల్స్ చేయడానికి బీ టౌన్ స్టార్లు ముందుకొస్తున్నారు. ఇప్పుడు అలాంటి ఒక డిఫరెంట్ కాంబినేషన్ వెండితెరపై కలిసి కనిపించడానికి సిద్ధమవుతోంది. తమిళ హీరో శివకార్తికేయన్ కెరీర్‌లో 23వ చిత్రాన్ని సీనియర్ దర్శకుడు మురుగదాస్ డైరెక్ట్ చేయనున్నారు. ఇక ఈ మూవీలో బాలీవుడ్ బడా హీరో ఒక గెస్ట్ రోల్‌లో కనిపించనున్నట్టు అటు బాలీవుడ్‌లో, ఇటు కోలీవుడ్‌లో రూమర్స్ వైరల్ అవుతున్నాయి.

మినిమమ్ గ్యారెంటీ హీరో..

ఏ బ్యాక్‌గ్రౌండ్ లేకుండా బుల్లితెర నుంచి వెండితెరకు వచ్చి టాలెంటెడ్ హీరోగా గుర్తింపు దక్కించుకున్నాడు శివకార్తికేయన్. గత కొన్నేళ్లుగా ఈ హీరో నటించిన సినిమాలు అన్నీ మినిమమ్ గ్యారెంటీ హిట్లుగా నిలుస్తున్నాయి. అందుకే స్టార్ డైరెక్టర్ అయిన మురుగదాస్ సైతం శివకార్తికేయన్‌తో సినిమా చేయడానికి ముందుకొచ్చారు. ఇప్పటికే శివకార్తికేయన్, మురుగదాస్ కాంబినేషన్‌లో తెరకెక్కుతున్న మూవీ.. పూజా కార్యక్రమాలు పూర్తి చేసుకొని షూటింగ్ కూడా మొదలుపెట్టింది. ఎప్పటికప్పుడు ఎస్‌కే 23 గురించి ఏదో ఒక అప్డేట్ బయటికొస్తూనే ఉంది. తాజాగా ఈ మూవీలో సల్మాన్ ఖాన్ ఒక గెస్ట్ రోల్‌లో నటించనున్నాడనే రూమర్.. ఒక్కసారిగా ప్రేక్షకులను షాక్‌కు గురిచేసింది.

విలన్‌గా విద్యుత్ జమ్వాల్..

శివకార్తికేయన్, మురుగదాస్ కాంబినేషన్‌లో తెరకెక్కుతున్న మూవీలో హీరోయిన్‌గా కన్నడ బ్యూటీ రుక్మిణి వసంత్ నటిస్తోంది. ఇక తాజాగా ఈ సినిమాలో బాలీవుడ్ యాక్షన్ హీరో విద్యుత్ జమ్వాల్ విలన్‌గా నటించనున్నాడని నిర్మాణ సంస్థ అయిన లక్ష్మి మూవీస్ రివీల్ చేసింది. విద్యుత్ జమ్వాల్‌తో పాటు ఈ మూవీలో మరో బాలీవుడ్ హీరో కూడా నటించే ఛాన్స్ ఉందని ఎప్పటినుండో కోలీవుడ్‌లో వార్తలు వైరల్ అవుతున్నాయి. ఈ గెస్ట్ రోల్ కోసం పలువురు బీ టౌన్ బడా హీరోల పేర్లు కూడా వినిపించాయి. మొన్నటివరకు సంజయ్ దత్ చేస్తాడనుకున్న ఈ గెస్ట్ రోల్‌లో సల్మాన్ ఖాన్ నటించడానికి సిద్ధమవుతున్నట్టు సమాచారం.

ఫ్రెండ్‌షిప్ కోసమే..

మురుగదాస్, సల్మాన్ ఖాన్‌కు మధ్య మంచి ఫ్రెండ్‌షిప్ ఉంది. అంతే కాకుండా త్వరలోనే వీరిద్దరూ కలిసి ‘సికందర్’ అనే సినిమాను కూడా చేయనున్నారు. ఇప్పటికే ఈ మూవీకి సంబంధించిన అఫీషియల్ అనౌన్స్‌మెంట్ కూడా వచ్చేసింది. అందుకే శివకార్తికేయన్‌తో తాను చేస్తున్న సినిమాలో గెస్ట్ రోల్‌లో కనిపించమని సల్మాన్‌ను కోరగా తాను కూడా ఓకే చేసినట్టుగా రూమర్స్ వినిపిస్తున్నాయి. ఇక ఎస్‌కే 23లో సల్మాన్ ఖాన్ పాత్ర కనీసం 20 నిమిషాల పాటు ఉండనుందని సమాచారం. ఇప్పటికే సౌత్ హీరోలు, సౌత్ ఇండస్ట్రీపై తనకు ఉన్న ఇష్టాన్ని బయటపెట్టిన సల్మాన్ ఖాన్.. శివకార్తికేయన్‌తో కలిసి స్క్రీన్ షేర్ చేసుకోనున్నాడనే వార్త ఫ్యాన్స్‌ను ఎగ్జైట్ చేస్తోంది. నిజంగానే ఈ రూమర్ నిజమయితే బాగుంటుందని ఎస్‌కే ఫ్యాన్స్ అనుకుంటున్నారు.