SivaKarthik: ఎవరీ శివకార్తీక్? 'జోష్' to 'శంబాల' వయా 'అఖండ'... తెలుగులో వంద సినిమాలు చేసిన నటుడి గురించి తెలుసా?

Shambala Movie OTT: 'శంబాల'తో ఆది సాయికుమార్ హిట్ అందుకున్నారు. నటుడు శివకార్తీక్ సైతం మంచి గుర్తింపు తెచ్చుకున్నారు. ఓటీటీలో విడుదలైన తర్వాత తనకు మరింత గుర్తింపు వచ్చిందని సంతోషం వ్యక్తం చేశారు.

నటుడిగా గుర్తింపు, డ్రీమ్ ప్రాజెక్ట్ గురించి శివకార్తీక్ ఇంటర్వ్యూ

Source : ABPLIVE AI

Show Quick Read

Key points generated by AI, verified by newsroom

కథానాయకుడిగా విజయం కోసం ఎదురు చూస్తున్న ఆది సాయికుమార్ (Aadi Saikumar) ఆకలి తీర్చిన సినిమా 'శంబాల'. థియేటర్లలో విడుదలైన తర్వాత మంచి వసూళ్లు, ప్రశంసలు అందుకుంది. ఇప్పుడు ఓటీటీలోకి వచ్చిన తర్వాత మరోసారి ట్రెండ్ అవుతోంది. ఆ సినిమాతో నటుడిగా గుర్తింపు పొందిన మరొకరు శివకార్తీక్. దాంతో ఆయన సంతోషం వ్యక్తం చేశారు. కెరీర్ గురించి శివకార్తీక్ చెప్పిన విశేషాలు...
 
నటుడిగా 'జోష్'తో మొదటి అడుగు
మాది వ్యవసాయ కుటుంబం. మా నాన్న రైతు. గుంటూరు జిల్లాలోని వరగాని మా సొంతూరు. మాకు ఎటువంటి సినీ నేపథ్యం లేదు. నేను ఒంటరిగా చిత్రసీమలోకి వచ్చా. 'జోష్' నా మొదటి సినిమా. అందులో నటించేందుకు వేల మంది ఆడిషన్స్ ఇస్తే.... సెలెక్ట్ అయిన వారిలో నేనొకడిని. ఆ తర్వాత 'భీమిలి కబడ్డీ జట్టు', 'పిల్లా జమీందార్' తదితర సినిమాలు చేశా.

'లజ్జ'తో హీరోగా అడుగు వేసిన శివకార్తీక్
నేను కారెక్టర్ ఆర్టిస్ట్‌గా బిజీగా ఉన్న సమయంలో హీరోగా చేసే అవకాశం వచ్చింది. 'లజ్జా' చేశా. దాని కోసం రెండున్నరేళ్లు కష్టపడినా... అంతగా వర్కౌట్ కాలేదు. ఆ సినిమా వల్ల అటు హీరోగా, ఇటు కారెక్టర్ ఆర్టిస్టుగా గ్యాప్ వచ్చింది. అప్పుడు చాలా కష్టాలు పడ్డా. ఆ టైంలో బాబీ గారు 'పంతం' చూసి నా నటనను మెచ్చుకున్నారు. దాంతో మరింత పైస్థాయికి వెళ్లాలని కసిగా కష్టపడ్డాను.

'అఖండ'లో అవకాశం ఎలా వచ్చిందంటే?
బాబీ గారి మాటలతో కష్టపడుతున్న నాకు... రామ్ గోపాల్ వర్మ గారి 'భైరవగీత'లో ఓ మంచి పవర్ ఫుల్ రోల్‌ చేసే ఛాన్స్ వచ్చింది. దాని వల్ల బోయపాటి గారి దృష్టిలో పడ్డాను. నా నటనను ఆయన మెచ్చుకున్నారు. ఆ తర్వాత 'అఖండ'లో అవకాశం ఇచ్చారు. 'ఉగ్రం', 'తండేల్' సినిమాల్లో మంచి పాత్రలు చేసే అవకాశాలు వచ్చాయి. దర్శకులు, హీరోల సహకారం వల్ల నా నటనకు మంచి పేరొచ్చింది.

'శంబాల' దర్శకుడికి రుణపడి ఉంటాను
ఎప్పుడూ సింపతీ పాత్రలు చేయకూడదని, విలక్షణ పాత్రల్లో కనిపించాలని నేను ప్రయత్నిస్తున్న సమయంలో మనీష్ అని కో దర్శకుడి ద్వారా యుగంధర్ ముని గారి దగ్గరకు వద్దకు నేను వెళ్లా. ఆడిషన్స్ ఇచ్చిన తర్వాత 'శంబాల'లో పొగరుతో పాటు నెగెటివ్ షేడ్స్ ఉన్న రోల్ చేసే అవకాశం ఇచ్చారు. ఆ పాత్రలో చాలా ఎమోషన్స్ ఉంటాయి. 'శంబాల'లో అవకాశం ఇచ్చిన దర్శకుడు యుగంధర్ మునికి ఎప్పటికీ రుణ పడి ఉంటాను. ఆది సాయికుమార్ గారు 'శంబాల' కోసం ఎంతో కష్టపడ్డారు. ఆయన డెడికేషన్ చూసి మాలో కసి పెరిగింది. మేమంతా 100 శాతం ఎఫర్ట్స్ పెట్టారు.

'శివ పుత్రుడు' లాంటి సినిమా చేయాలని కోరిక!
ఇప్పుడు నటుడిగా నేను సంతృప్తికరంగా ఉన్నా. చియాన్ విక్రమ్ గారు చేసిన 'శివ పుత్రుడు' లాంటి డిఫరెంట్ రోల్స్ చేయాలన్నది నా కోరిక. అది నా డ్రీమ్. ఇప్పుడు 'హైందవ', 'వృషకర్మ' సినిమాలు చేస్తున్నాను. అవి ఈ ఏడాది విడుదల అవుతాయి. తెలుగులో వంద సినిమాలు చేశా. ఇప్పుడు కెరీర్ కొత్త టర్న్ తీసుకుంది. మరింత మంచి సినిమాలు, క్యారెక్టర్లు చేసే అవకాశం రావడం సంతోషంగా ఉంది