Satyam Sundaram Movie: 'సత్యం సుందరం' సినిమాకు నాగార్జున రివ్యూ - ఆ రోజులు గుర్తొచ్చాయట, కార్తీ హార్ట్ టచింగ్ రిప్లై

Karthi Thanks Nagarjuna: పాజిటివ్ మౌత్ టాక్ తో అదరగొడుతున్న 'సత్యం సుందరం' మూవీపై కింగ్ నాగార్జున తాజాగా రివ్యూ ఇచ్చారు. ఈ మూవీ ఆయనకు ఎలా అన్పించిందో తెలుసుకుందాం పదండి.

సత్యం సుందరం మూవీకి నాగార్జున ఇచ్చిన రివ్యూ ఏమిటో తెలుసా?

Source : ABPLIVE AI

Nagarjuna On Karthi's Satyam Sundaram Movie: కోలీవుడ్ స్టార్ హీరో కార్తీ, అరవింద్ స్వామి కలిసి నటించిన తమిళ మల్టీస్టారర్ 'సత్యం సుందరం' మూవీ తెలుగులో మంచి పాజిటివ్ టాక్ తో 'దేవర'కు పోటీ ఇవ్వడానికి ట్రై చేస్తోంది. సినిమాపై ప్రేక్షకులతో పాటు విమర్శకులు కూడా ప్రశంసల వర్షం కురిపిస్తున్నారు. ఈ నేపథ్యంలోనే తాజాగా టాలీవుడ్ కింగ్ నాగార్జున 'సత్యం సుందరం' మూవీనీ చూసి సోషల్ మీడియా వేదికగా సినిమా ఎలా ఉందనే విషయంపై తన రివ్యూ ఇచ్చారు. 

'సత్యం సుందరం' మూవీపై నాగార్జున రివ్యూ 
ఇటీవల కాలంలో స్టార్ హీరోల మధ్య మంచి సహకారం కనిపిస్తోంది. మంచి కంటెంట్ ఉన్న సినిమాలను చూసి తమ తోటి హీరోలను అప్రిషియేట్ చేయడానికి స్టార్ హీరోలు ఏమాత్రం వెనకాడట్లేదు. ఇప్పటి దాకా ఈ లిస్టులో చిరంజీవి, మహేష్ బాబు యాక్టివ్ గా కనిపించగా, తాజాగా నాగార్జున కూడా అందులో చేరిపోయారు. 'సత్యం సుందరం' మూవీపై ఎలా ఉందో చెబుతూ, ఆయన సోషల్ మీడియాలో చేసిన పోస్ట్ వైరల్ అవుతుంది. చిత్ర బృందాన్ని మెచ్చుకుంటూ నాగార్జున "డియర్ కార్తీ బ్రదర్... నిన్న రాత్రి 'సత్యం సుందరం' మూవీని చూశాను. అందులో నువ్వు, అరవింద్ స్వామి అద్భుతంగా నటించారు. సినిమాను చూస్తున్నంత సేపు నేను హ్యాపీగా నవ్వుతూనే ఉన్నాను. అదే నవ్వుతో ప్రశాంతంగా వెళ్లి పడుకున్నాను. సినిమాను చూసినంత సేపు చిన్ననాటి జ్ఞాపకాలు బాగా గుర్తొచ్చాయి. ముఖ్యంగా 'ఊపిరి' రోజులను ఈ సినిమా గుర్తు చేసింది. మనసుకు హత్తుకునే ఇలాంటి అద్భుతమైన సినిమాలను సినీ ప్రియులతో పాటు విమర్శకులు మెచ్చుకోవడం చూస్తుంటే సంతోషంగా ఉంది.. టీం అందరికీ నా అభినందనలు' అంటూమనస్పూర్తిగా చిత్రబృందంపై నాగ్ ప్రశంసల వర్షం కురిపించారు. 

Dear brother Karthi, I saw your film #SatyamSundaram last night!! You and Arvind ji were just too too good… I had a smile throughout watching you and went to sleep with the same smile… Brought back so many childhood memories… and also memories of our film #oopiri .
I’m so…

— Nagarjuna Akkineni (@iamnagarjuna) September 30, 2024

నాగార్జున రివ్యూపై కార్తి రియాక్షన్ 
ఇక నాగార్జున అలా ట్వీట్ చేశారో లేదో వెంటనే 'సత్యం సుందరం' మూవీ హీరో కార్తీ రియాక్ట్ అయ్యారు. కార్తీ స్పందిస్తూ "థాంక్యూ సో మచ్ అన్నయ్యా... మీ ట్వీట్ మాకు ఎంతో ఆనందాన్ని కలిగించింది. సినిమా మీకు నచ్చడం పట్ల మేము హ్యాపీగా ఉన్నాము. మంచి సినిమాపై మీరు చూపించే ఆదరణ మాలో మరింత స్ఫూర్తిని నింపుతుంది" అంటూ కామెంట్ చేశారు.

Thank you so much @iamnagarjuna annayya. We are elated to hear your words and so happy that you enjoyed the film. Your appreciation for good cinema constantly inspires us to strive for excellence. https://t.co/Iy654VzA3F

— Karthi (@Karthi_Offl) September 30, 2024

కార్తీ, నాగార్జున కలిసి గతంలో 'ఊపిరి' అనే మూవీలో నటించిన విషయం తెలిసిందే. కాగా '96' అనే ఎమోషనల్ లవ్ స్టోరీని మనసుకు హత్తుకునేలా చూపించి, మంచి డైరెక్టర్ గా పేరు తెచ్చుకున్న ప్రేమ్ కుమార్ 'సత్యం సుందరం' మూవీని రూపొందించారు. ఆరేళ్ల తర్వాత డైరెక్టర్ ప్రేమ్ కుమార్ తెరకెక్కించిన మూవీ ఇదే కాగా, '96' మూవీకి మించి సున్నితమైన కథాంశంతో 'సత్యం సుందరం' ప్రేక్షకులను థియేటర్లలో ఆకట్టుకుంటుంది. తమిళంతో పాటు తెలుగు రాష్ట్రాల్లో ఈ శనివారం రిలీజ్ అయిన 'సత్యం సుందరం' మూవీ మంచి మౌత్ టాక్ తో డీసెంట్ కలెక్షన్లు రాబడుతోంది. ఈ సినిమాను 2డి ఎంటర్టైన్మెంట్స్ బ్యానర్ పై సూర్య, జ్యోతిక కలిసి నిర్మించారు. గోవింద్ వసంత్ సంగీతం అందించారు.