Mrunal Thakur: మృణాల్ కష్టాలు, టాలీవుడ్ మూవీస్ కోసం తెలుగు నేర్చుకుంటున్న ముద్దుగుమ్మ!

నటీనటుల జీవితం టర్న్ అయిపోవడానికి ఒక్క సినిమా చాలు.. ఒక్క హిట్ వారిని మోస్ట్ వాంటెడ్ యాక్టర్ చేయగలదు. అలాగే ఒక్క ఫ్లాప్ వారిని పూర్తిగా వెనక్కి తోసేయగలదు. ప్రస్తుతం అలాంటి ఒక్క హిట్ అందుకొని, కెరీర్‌లో ఫుల్ బిజీ అయిపోయింది మరాఠీ బ్యూటీ మృణాల్ ఠాకూర్. అసలైతే మృణాల్.. తన యాక్టింగ్ కెరీర్‌ను ప్రారంభించి దాదాపు పది సంవత్సరాలు అవుతోంది. కానీ తన కెరీర్‌లో ఎప్పుడూ లేనంత సక్సెస్‌ను 2022లోనే చూసింది ఈ భామ. ఒక్క తెలుగు సినిమా తన జీవితాన్ని మార్చేయడంతో పాటు మరెన్నో తెలుగు చిత్రాల్లో నటించే అవకాశాన్ని తెచ్చిపెట్టింది. అందుకే తన తెలుగు ఫ్యాన్స్ కోసం ల్యాప్‌టాప్ ముందు పెట్టుకొని మరీ తెగ కష్టపడిపోతోంది మృణాల్.

సీరియల్స్‌ ద్వారా తమ కెరీర్‌ను ప్రారంభించి.. సినిమాల్లో స్టార్లు సెటిల్ అయిపోయిన వారు చాలా తక్కువమంది ఉన్నారు. అలాంటి లిస్ట్‌లో మృణాల్ ఠాకూర్ ఒకరు. ముందుగా హిందీ సీరియల్స్‌లో సైడ్ ఆర్టిస్ట్ రోల్స్‌తో తన కెరీర్‌ను ప్రారంభించింది ఈ భామ. అలాంటి సమయంలోనే మరాఠీ చిత్రాల్లో హీరోయిన్‌గా నటించే అవకాశాలను కొట్టేసింది. మెల్లగా బాలీవుడ్ దృష్టిలో కూడా పడింది. కానీ మరాఠీ చిత్రాల్లో నటిస్తూ హిందీ సినిమాల్లో అవకాశాలు అందుకోవడానికి మృణాల్‌కు చాలా సమయం పట్టింది. అయినా కూడా తనకు హిందీ చిత్రాల్లో ముందుగా వచ్చిన అవకాశాలు నటిగా తనకు గుర్తింపును మాత్రం తీసుకురాలేకపోయాయి. ఎన్నో హిందీ చిత్రాల్లో నటించిన తర్వాత తనకు వచ్చిన మొదటి తెలుగు సినిమా అవకాశం.. తనను స్టార్ హీరోయిన్‌ను చేసింది.

‘సీతారామం’లో సీతగా..
తెలుగులో ప్రేమకథలను అందంగా తెరకెక్కించే దర్శకుల్లో హను రాఘవపూడి ఒకరు. అలాంటి దర్శకుడు తెరకెక్కించిన అందమైన ప్రేమ కావ్యమే ‘సీతారామం’. ఆ సినిమాలో సీత పాత్రలో నటించిన మృణాల్ ఠాకూర్.. తెలుగులో తన డెబ్యూతోనే అందరి దృష్టిని ఆకర్షించింది. అసలు సీత పాత్ర తనకంటే బాగా ఎవరూ చేయలేరు అనేంతగా ఉంది తన నటన. అలా ఒక్క సినిమాతోనే తెలుగు ప్రేక్షకులు మాత్రమే కాదు.. ఎంతోమంది తెలుగు మేకర్స్ కూడా తన ఫ్యాన్స్ అయిపోయారు. ఎన్‌టీఆర్, కొరటాల శివ కాంబినేషన్‌లో తెరకెక్కుతున్న ‘దేవర’లో మృణాల్.. హీరోయిన్ అంటూ వార్తలు వచ్చినా.. అవన్నీ కేవలం రూమర్స్ అని తేలిపోయింది. అది కాకుండా ప్రస్తుతం రెండు తెలుగు ప్రాజెక్ట్స్‌తో  మృణాల్.. బిజీగా ఉంది.

నాని, విజయ్ దేవరకొండతో..
నేచురల్ స్టార్ నాని హీరోగా నటిస్తున్న ‘హాయ్ నాన్న’లో మృణాల్ హీరోయిన్‌గా నటిస్తోంది. దీంతో పాటు విజయ్ దేవరకొండ హీరోగా తెరకెక్కుతున్న వీడి13లో కూడా తనే హీరోయిన్. ఇప్పటికే ‘హాయ్ నాన్న’ చిత్ర షూటింగ్ శరవేగంగా సాగుతోంది. కొన్నిరోజుల క్రితం నాని పుట్టినరోజు సందర్భంగా ఈ మూవీ గ్లింప్స్‌ను కూడా విడుదల చేశారు మేకర్స్. ఈ గ్లింప్స్‌లో ముక్కుపుడకతో, బ్లాక్ శారీలో మృణాల్.. చాలా అందంగా ఉంది. ప్రస్తుతం తన చేతిలో రెండు తెలుగు సినిమాలు ఉండడంతో ఎలాగైనా తెలుగు నేర్చుకోవాలని నిర్ణయించుకుంది మృణాల్. స్క్రిప్ట్ చేతిలో పట్టుకొని, ల్యాప్‌టాప్ ముందు పెట్టుకొని తెలుగు నేర్చుకోవడం కోసం కష్టపడుతోంది. ప్రస్తుతం మృణాల్.. తెలుగు నేర్చుకోవడానికి కష్టపడుతున్న ఫోటోలు సోషల్ మీడియాలో వైరల్ అవుతున్నాయి. దీంతో తన తెలుగు అభిమానులంతా తెగ సంతోషపడిపోతున్నారు.

Also Read: నయనతార ఆస్తుల విలువ అన్ని కోట్లా? కార్లు, ప్రైవెట్ జెట్‌తో పాటు మరెన్నో!

ముఖ్యమైన, మరిన్ని ఆసక్తికర కథనాల కోసం ‘టెలిగ్రామ్’లో ‘ఏబీపీ దేశం’లో జాయిన్ అవ్వండి.
Join Us on Telegram: https://t.me/abpdesamofficial