Kangana Ranaut: బాలీవుడ్ మాఫియా దేశం విడిచి వెళ్లేలా చేసింది, కంగనా రనౌత్ షాకింగ్ కామెంట్స్

సినిమా పరిశ్రమలో తనకు అవకాశాలు రాకుండా కొంతమంది కుట్రలు చేశారని నటి కంగనా రౌత్ ఆరోపించింది. వారి టార్చర్ తట్టుకోలేక దేశం విడిచి వెళ్లాలనుకున్నట్లు వెల్లడించింది.

నటి కంగనా రనౌత్

Source : Kangana Ranaut/Instagram

Kangana Ranaut About Bollywood Mafia: బాలీవుడ్ నటి కంగనా రనౌత్ స్వీయ దర్శకత్వంలో తెరకెక్కిన తాజా చిత్రం ‘ఎమర్జెన్సీ’. సెప్టెంబర్ 6న ఈ సినిమా ప్రేక్షకుల ముందుకు రాబోతోంది. ఈ నేపథ్యంలో చిత్రబృందం ప్రమోషన్ కార్యక్రమాలను నిర్వహిస్తోంది. తాజాగా ఓ ఇంటర్వ్యూలో పాల్గొన్న కంగనా రనౌత్ తన కెరీర్ లో ఎదుర్కొన్న ఇబ్బందుల గురించి కీలక విషయాలు వెల్లడించింది. కొంతమంది తనకు కావాలని అవకాశాలు లేకుండా చేశారని ఆరోపించింది. దేశం వెళ్లిపోయేలా కుట్ర పన్నారని ఆవేదన వ్యక్తం చేసింది.     

దశాబ్దం పాటు అవకాశాలు లేకుండా చేశారు- కంగనా

బాలీవుడ్ మాఫియా కుట్రలను తట్టుకోలేక దేశం విడిచి వెళ్లి పోవాలనుకున్నట్లు కంగనా వెల్లడించింది. “సినిమా పరిశ్రమ అంటే నాకు చిన్నప్పటి నుంచి ఎంతో ఇష్టం ఉండేది. ఎప్పటికైనా మంచి హీరోయిన్ కావాలి అనుకునేదాన్ని. అదే ఆశతో 2004లో ముంబైకి వచ్చాను. 2005-06లో ‘గ్యాంగ్ స్టర్’, ‘వోహ లమ్హే’ సినిమాల్లో నటించాను. రెండు సినిమాల్లోనూ మంచి క్యారెక్టర్లు చేశాను. నా యాక్టింగ్ కు చాలా మంది నుంచి ప్రశంసలు దక్కాయి. ఆ తర్వాత నాకు పెద్దగా అవకాశాలు లేవు. ఒకటి రెండు కాదు, ఏకంగా 10 సంవత్సరాలు అవకాశాలు రాలేదు. ఎన్నో ప్రయత్నాలు చేసినా ఛాన్సులు దొరకలేదు. నాకు ఆఫర్లు రాకపోవడానికి కారణం బాలీవుడ్ మాఫియా అని అర్థం అయ్యింది. ఛాన్సులు రాకుండా చేసి ఇండస్ట్రీ నుంచి వెళ్లిపోయేలా చేశారు. ఒకానొక సమయంలో దేశం నన్ను బహిష్కరించినట్లు అనిపించింది. విదేశాలకు వెళ్లిపోవాలనుకున్నాను” అని వెల్లడించింది.

అమెరికాకు వెళ్లి షార్ట్ ఫిల్మ్ తీశా- కంగనా

బాలీవుడ్ లో అవకాశాలు రాకపోవడంతో అమెరికాకు వెళ్లిపోయినట్లు కంగనా వెల్లడించింది. “ఇండస్ట్రీలో అవకాశాలు రాకపోవడంతో అమెరికాకు వెళ్లాను. కాలాబాసాస్‌ లో ఓ ఇంటిని కొన్నాను. ఓ ఏజెంట్ ను ఏర్పాటు చేసుకున్నాను. అతడితో కలిసి ఓ షార్ట్ ఫిలిమ్ చిత్రీకరించాను. చాలాసార్లు బాలీవుడ్ మాఫియా గురించి ఆలోచించాను. ఎందుకు తనలాంటి వారికి అవకాశాలు రాకుండా చేశారో అర్థం కాలేదు. కానీ, 2014లో విడుదలైన ‘క్వీన్’ సినిమా నా కెరీర్ ను పూర్తిగా మలుపు తిప్పింది” అని కంగనా చెప్పుకొచ్చింది. 

డైరెక్టర్ గా ఉండటమే చాలా ఇష్టం- కంగనా

ఇక నటిగా చేయడం కంటే దర్శకురాలిగా ఉండటమే చాలా ఇష్టమని కంగనా చెప్పుకొచ్చింది. “నాకు యాక్టింగ్ చేయడం అనేది చాలా ఈజీ పని. కానీ, నటిగా చేయడం పెద్దగా ఇష్టంలేదు. దానికి కారణలు ఉన్నాయి. నటిగా ఉంటే సెట్స్ లో ఏం జరుగుతుందో పూర్తిగా తెలియదు. అదే డైరెక్టర్ గా ఉంటే పూర్తి విషయాలు తెలుస్తాయి. అంతేకాదు, సెట్స్ లో డైరెక్టర్ కు ఎక్కువ గౌరవం ఉంటుంది. నేనూ సెట్స్ లో నటీనటులను గౌరవంగా చూసుకుంటాను. వారికి ఇబ్బంది కలగకుండా ముందుగానే అన్ని విషయాలు చెప్పేస్తాను” అని కంగనా వెల్లడించింది.

‘ఎమర్జెన్సీ’ మూవీలో కంగనా రనౌత్ మాజీ ప్రధాని ఇందిరా గాంధీ పాత్రలో కనిపించనుంది. ఇందిరా హయాంలో విధించిన ఎమర్జెన్సీ కథాంశంతో ఈ సినిమాను తెరకెక్కించారు. ఈ మూవీలో అనుపమ్‌ ఖేర్‌, మహిమా చౌదరి సహా పలువురు కీలక పాత్రల్లో కనిపించనున్నారు.