My South Diva Calendar 2025: మై సౌత్ దివా... పన్నెండు మంది అందాల భామలతో క్యాలెండర్ - ఎవరెవరు ఫోటోషూట్ చేశారో తెలుసా?

సౌత్ ఇండియాలో క్యాలెండర్ కల్చర్ తక్కువ. తెలుగులో ప్రముఖ ఫొటోగ్రాఫర్‌ మనోజ్‌ కుమార్ ప్రతి ఏడాది స్టార్ హీరోయిన్లతో క్యాలెండర్ రిలీజ్ చేస్తారు. ఈ ఏడాది కూడా ఆయన చేశారు. ఎవరెవరు ఆ షూట్ చేశారో తెలుసా?

మై సౌత్ దివా 2025 క్యాలెండర్ షూట్ ఎవరెవరు చేశారో తెలుసా?

Source : ABPLIVE AI

కింగ్ ఫిషర్ క్యాలెండర్లకు ఒక క్రేజ్ ఉండేది. విజయ్ మాల్యా ఒక వెలుగు వెలిగిన రోజుల్లో అందాల భామలతో బికినీ షూట్స్ చేయించి మరీ ప్రతి ఏడాది క్యాలెండర్ రిలీజ్ చేసేవారు. సౌత్ ఇండియాలో ఆ తరహా క్యాలెండర్ కల్చర్ లేదు. అయితే, మరీ అందాల ప్రదర్శనకు వెళ్లకుండా హైదరాబాద్ బేస్డ్ ఫొటోగ్రాఫర్‌ మనోజ్‌ కుమార్ ప్రతి ఏడాది 'మై సౌత్ దివా' పేరుతో ఒక క్యాలెండర్ రిలీజ్ చేస్తున్నారు. ఈ ఏడాది (2025) క్యాలెండర్ రీసెంట్‌గా రిలీజ్ చేశారు. మరి, దీని కోసం ఎవరెవరు స్పెషల్ ఫోటోషూట్స్ చేశారో తెలుసా?       

పన్నెండు మంది అందాల భామలు!
'మై సౌత్‌ దివా' క్యాలెండర్‌ ఫోటోషూట్ చేసిన కొందరు అందాల భామలు ఆ తర్వాత తెలుగులో హీరోయిన్లుగా అవకాశాలు అందుకున్నారు. అలాగే, స్టార్స్ సైతం ఈ క్యాలెండర్ కోసం ఫోజులు ఇచ్చారు. వాళ్ళు ఎవరంటే?

చిరంజీవి, నాగార్జున, బాలకృష్ణ, వెంకటేష్ వంటి అగ్ర హీరోలతో పాటు తర్వాత తరం హీరోలతోనూ బ్లాక్ బస్టర్ సినిమాలు చేసిన శ్రియా శరణ్, చందమామ కాజల్ అగర్వాల్ 'మై సౌత్ దివా - 2025' క్యాలెండర్ షూట్ చేశారు. అలాగే, యంగ్ హీరోయిన్లు మాళవికా శర్మ, తాన్యా హోప్, ఐశ్వర్య కృష్ణ, కుషితా కొల్లాపు, వినాలీ భట్నాగర్, రియా సచ్ దేవ్, కనిక మాన్, పాలక్ అగర్వాల్ తదితరులు క్యాలెండర్ షూట్ చేశారు. శుక్రవారం హైదరాబాద్‌లో ఈ క్యాలెండర్ ఆవిష్కరించారు. దీనికి క్యాలెండర్ ఫౌండర్ మనోజ్ కుమార్ కటొకర్, భారతి సిమెంట్స్ మార్కెటింగ్ డైరెక్టర్ రవీందర్ రెడ్డి, ప్రముఖ సినిమాటోగ్రాఫర్ జ్ఞానశేఖర్, దర్శకుడు కరుణ కుమార్,  ఇంకా సుజనా రావు హాజరు అయ్యారు.

'మై సౌత్ దివా - 2025' క్యాలెండర్ చూశానని, అందులో కలర్స్‌ బాగున్నాయని ప్రముఖ సినిమాటోగ్రాఫర్ జ్ఞానశేఖర్ చెప్పారు. మనోజ్ డెడికేటెడ్ వర్కింగ్ పర్సన్ అన్నారు. 'పలాస' సమయంలో మనోజ్ తనకు ఎంతో సాయం చేశారని, అతనితో తనది ఐదేళ్ల ప్రయాణం అని, ఇప్పటికీ హీరోయిన్స్ కోసం ఆయన రిఫరెన్స్ తీసుకుంటానని దర్శకుడు కరుణ కుమార్ తెలిపారు.

మై సౌత్ దివా క్యాలెండర్ ఫౌండర్, ఫోటోగ్రాఫర్ మనోజ్ కుమార్ మాట్లాడుతూ... ''9 ఏళ్లుగా మా క్యాలెండర్ వస్తోంది. నాకు మద్దతు ఇస్తున్న ప్రతి ఒక్కరికీ థాంక్స్. ఈ ఇయర్ క్యాలెండర్ కూడా అందరికీ నచ్చుతుంది. ఈ ఏడాది ఐదుగురు అమ్మాయిల్ని పరిచయం చేస్తున్నాం '' అని చెప్పారు. 'హైడ్ అండ్ సీక్' హీరోయిన్ రియా సచ్‌దేవ్, రాజ్ తరుణ్ 'తిరగబడర సామి' హీరోయిన్ మాల్వీ మల్హోత్రా, ఐశ్వర్య కృష్ణ, పలక్ అగర్వాల్, కనిక మాన్, అను శ్రీ, రిచా జోషి, జెస్సీ తదితరులు ఈ కార్యక్రమంలో పాల్గొన్నారు.