Jiiva in YS Jagan Role: ముందుగా వైఎస్ జగన్ పాత్రలో నటించడానికి ఒప్పుకోని జీవా - తర్వాత ఏమైందంటే?

Yatra 2: ఆంధ్రప్రదేశ్ ముఖ్యమంత్రి వైఎస్ జగన్ పాదయాత్రపై తెరకెక్కిన సినిమానే ‘యాత్ర 2’. ఈ సినిమాలో హీరోగా నటించడానికి ముందుగా జీవా ఒప్పుకోలేదనే వార్త టాలీవుడ్‌లో వైరల్ అయ్యింది.

Image Credit: mahivraghav/Instagram

Yatra 2 Movie: తమిళ హీరో జీవా.. తెలుగు ప్రేక్షకులకు కూడా సుపరిచితుడే. ఇప్పటివరకు ఈ హీరో నేరుగా ఒక్క తెలుగు సినిమాలో కూడా నటించకపోయినా.. తమిళ డబ్బింగ్ చిత్రాలతోనే ఇక్కడి ప్రేక్షకులకు దగ్గరయ్యాడు. ఇక త్వరలోనే ‘యాత్ర 2’తో మొదటిసారి స్ట్రెయిట్ తెలుగు సినిమాతో ఆడియన్స్ ముందుకు రావడానికి సిద్ధమయ్యాడు. వైఎస్ జగన్ బయోపిక్‌గా తెరకెక్కిన ఈ మూవీలో జీవా.. జగన్ పాత్రలో కనిపించనున్నాడు. ముందుగా ఈ సినిమా ఆఫర్ తన దగ్గరకు వచ్చినప్పుడు జీవా.. ఇందులో నటించడానికి ఒప్పుకోలేదట. మరి ఈ హీరో.. ‘యాత్ర 2’లో నటించడానికి ఒప్పుకోవడం వెనుక డైరెక్టరే కారణమని టాలీవుడ్‌లో గుసగుసలు వినిపిస్తున్నాయి.

వైఎస్ జగన్ పాదయాత్రపై సినిమా..

‘యాత్ర 2’ సినిమాను మహీ వి రాఘవ తెరకెక్కించాడు. ‘యాత్ర’ సినిమాను కూడా ఆయనే డైరెక్ట్ చేశాడు. దివంగత ముఖ్య వైఎస్ రాజశేఖర్ రెడ్డి బయోపిక్‌గా తెరకెక్కిన చిత్రమే ‘యాత్ర’. ఈ సినిమా అప్పట్లో ఎంతోమంది ప్రేక్షకులను మెప్పించి క్లీన్ హిట్‌గా నిలిచింది. ఇందులో ముఖ్యంగా రాజశేఖర్ రెడ్డి పాదయాత్రపైనే ఫోకస్ చేశాడు దర్శకుడు మహీ వి రాఘవ. ఇక ‘యాత్ర’ విడుదలయినప్పుడే దానికి సీక్వెల్ కూడా ఉంటుందని బయటపెట్టాడు. అంతే కాకుండా ‘యాత్ర’లాగానే ‘యాత్ర 2’ కూడా పాదయాత్రపైనే ఫోకస్ చేసే కథతో ప్రేక్షకుల ముందుకు వస్తుందని క్లారిటీ ఇచ్చాడు. ఇక ఇన్నాళ్లకు వైఎస్ జగన్ పాదయాత్ర ఆధారంగా ‘యాత్ర 2’ మూవీ విడుదలకు సిద్ధమవుతోంది. కానీ ఇందులో హీరోగా జీవా నటించడానికి ఒప్పుకోలేదని తాజాగా ఒక వార్త బయటికొచ్చింది.

జగన్ లుక్‌లో పర్ఫెక్ట్..

‘యాత్ర 2’లో హీరోగా, వైఎస్ జగన్ పాత్రలో జీవా నటిస్తే బాగుంటుందని మహీ వి రాఘవ ముందు నుండే ప్లాన్ చేసుకున్నాడట. కానీ ఈ సినిమా స్క్రిప్ట్‌తో జీవాను వెళ్లి కలిసినప్పుడు తను ఈ మూవీలో నటించడానికి ఒప్పుకోలేదట. స్క్రిప్ట్‌పై నమ్మకం లేకపోవడమే దీనికి కారణమని ఇండస్ట్రీలో గుసగుసలు వినిపిస్తున్నాయి. ఆ తర్వాత మహీ వి రాఘవ తెరకెక్కించిన ‘యాత్ర’ను జీవాకు చూపించిన తర్వాత ఈ ప్రాజెక్ట్‌పై నమ్మకంతో ఇందులో హీరోగా చేయడానికి ఒప్పుకున్నాడని సమాచారం. వైఎస్ జగన్ పాత్రలో జీవా సరిగ్గా సరిపోయాడని ఫస్ట్ లుక్‌ను చూసిన ప్రేక్షకులు భావించారు. ఇక ఈ మూవీ ట్రైలర్ చూసిన తర్వాత జగన్ మ్యానరిజంను కూడా జీవా కరెక్ట్‌గా ఫాలో అయ్యాడని ప్రశంసిస్తున్నారు. సినిమాలో కూడా తన పర్ఫార్మెన్స్ చాలా బాగుంటుందని మేకర్స్ హామీ ఇస్తున్నారు.

ఎలక్షన్స్‌పై ఎఫెక్ట్..

2019లో దాదాపు ఎలక్షన్స్ సమయంలోనే ‘యాత్ర’ విడుదలయ్యింది. ఇప్పుడు కూడా ఆంధ్రప్రదేశ్‌లో రాజకీయాల సెగ మొదలయ్యింది. ఇదే సమయంలో ‘యాత్ర 2’ ప్రేక్షకుల ముందుకు రావడానికి సిద్ధమవుతోంది. 2024 ఫిబ్రవరీ 8న ‘యాత్ర 2’ విడుదల అవుతున్నట్టు మేకర్స్ క్లారిటీ ఇచ్చారు. మాస్ మహారాజా రవితేజ హీరోగా నటించిన ‘ఈగల్’ మూవీకి సోలో రిలీజ్‌ను కల్పించాలని దిల్ రాజులాంటి నిర్మాతలు ‘యాత్ర 2’ టీమ్‌తో కాంటాక్ట్ అవ్వాలని అనుకున్నారు. కానీ వారు స్పందించలేదు. దీన్ని బట్టి చూస్తే ఎట్టి పరిస్థితుల్లో ‘యాత్ర 2’లో ముందుగా అనుకున్నట్టు  ఫిబ్రవరీ 8నే విడుదల చేయాలని మేకర్స్ ఫిక్స్ అయినట్టు తెలుస్తోంది.