Nani: హిట్ 3లో హీరో ఎవరో అప్పుడే తెలుస్తుంది - ప్రీ-రిలీజ్ ఈవెంట్లో నాని ఏమన్నారంటే?
సోమవారం జరిగిన హిట్ 2 ప్రీ-రిలీజ్ ఈవెంట్లో ఈ సినిమాను నిర్మించిన హీరో నాని మాట్లాడారు.
‘హిట్ 3’లో హీరో ఎవరో ‘హిట్ 2’ చూస్తే అర్థం అవుతుందని సినిమాను నిర్మించిన హీరో నాని అన్నారు. హిట్ ఫ్రాంచైజీలో మొత్తంగా ఏడు సినిమాలు ఉంటాయని తెలిపారు. ఏడో సినిమాలో అందరు హీరోలు కలుస్తారని చెప్పారు. ‘హిట్ 2’ ప్రీ-రిలీజ్ ఈవెంట్లో నాని మాట్లాడారు. ఈ సందర్భంగా ఆయన ఏమన్నారంటే...
‘ముందుగా ఇక్కడికి వచ్చిన అతిథులందరికీ థ్యాంక్స్. శ్రీవల్లి, రమా రాజమౌళి ఈ ఫంక్షన్‌కు వస్తే మా అమ్మ, పిన్ని వచ్చినట్లు ఉంటుంది. మీ ఇద్దర్నీ చూస్తే ఒక పాజిటివ్ వైబ్ వస్తుంది. ఈ సినిమా గురించి ఎక్కువ మాట్లాడను. డిసెంబర్ 2వ తేదీన సినిమా విడుదల అయ్యాక ఎలా ఉందో మీరు చూసి నాకు చెప్పండి. ఇది ఒక గ్రిప్పింగ్ సినిమా. మిమ్మల్ని కచ్చితంగా ఎంటర్‌టైన్ చేస్తుందని నమ్ముతున్నాం.’
‘రాజమౌళి గారికి చాలా థ్యాంక్స్. ప్రపంచం మొత్తం తిరిగి ఇవాళే వచ్చారు. దిగిన వెంటనే ఈ ఫంక్షన్‌కు రావడం చాలా సంతోషంగా ఉంది. వారాహి సాయి సినిమాల తర్వాత నా సినిమాల ఫంక్షన్లకే రాజమౌళి వస్తారు. ఇది ఆయనకు కూడా సొంత నిర్మాణ సంస్థ లాంటిదే. ‘అ’, ‘హిట్ 1’లకి వచ్చారు. ఇప్పుడు ‘హిట్ 2’కి కూడా వచ్చారు. ఆయన్ని ఇబ్బంది పెట్టాలని లేదు. కానీ ఇబ్బంది పెడుతున్నాను.’
‘ఈ మధ్యే సూట్ వేసుకుని రెడ్ కార్పెట్ మీద చూశాను. ఆ స్టైల్, ఆ ఆటిట్యూడ్, ఆ లుక్ చాలా బాగున్నాయి. కార్తికేయ చాలా అందంగా ఉంటాడు. హీరోల పక్కన నించున్నా అందంగా కనబడతాడు. కానీ మీ పక్కన మాత్రం అస్సలు కనిపించలేదు. దేశమంతా రాజమౌళి సినిమాలో హీరో ఎవరు అని ఎదురు చూస్తారు. కానీ నేను మాత్రం ఆ ఫొటో చూశాక రాజమౌళి ఎప్పుడు హీరో అవుతారా అని ఎదురు చూస్తున్నా. మీరు జేమ్స్‌బాండ్‌లా ఉన్నారని మెసేజ్ పెడితే, నేను ఇయాన్ ఫ్లెమింగ్ (జేమ్స్‌బాండ్ రచయత) లానే ఉంటా అని ఆయన రిప్లై ఇచ్చారు. మీ తర్వాతి సినిమా కోసం ఎదురు చూస్తున్నాం.’
‘ఈ టీం అందరికీ పేరుపేరునా థ్యాంక్స్. సుహాస్ నన్ను చాలా ఇష్టపడతాడు. తను హీరో అయినా ఎప్పుడు వాల్ పోస్టర్ నుంచి ఫోన్ వెళ్లినా చిన్న రోల్ అయినా చేస్తాడు. తనకు కూడా థ్యాంక్స్. శేష్ చాలా టెర్రిఫిక్ యాక్టర్. శైలేష్ దర్శకుడు అవ్వకముందు ఒక సైంటిస్ట్. రీసెర్చ్ ఎక్కువ చేస్తాడు. హిట్ లాంటి ఇన్వెస్టిగేటివ్ థ్రిల్లర్ ఫ్రాంచైజీకి రీసెర్చ్ చాలా అవసరం. తన రీసెర్చ్ టాలెంట్ ఈ సినిమాకి చాలా పనికొచ్చింది.’
‘హిట్ 3, 4, 5, 6, 7 కూడా ఉంటాయి. హిట్ 7లో అందరు హీరోలను కలుపుతానని చెప్పాడు. నేను ప్రొడ్యూసర్‌గా కంటే కూడా ఒక ప్రేక్షకుడిగా ఆ సినిమా కోసం ఎదురుచూస్తున్నాను. హిట్ 3లో హీరో ఎవరో చెప్పమని శేష్ నాకు చెప్తున్నాడు. కానీ దానికి పెద్ద టైం లేదు. హిట్ 2 చూసేటప్పుడు హిట్ 3 హీరో ఎవరో తెలిసిపోతుంది.’ అన్నారు.
టాప్ హెడ్ లైన్స్
ట్రెండింగ్ వార్తలు
