Shankar: సేనాపతికి 103 ఏళ్లు, మార్షల్ ఆర్ట్స్ ఎలా సాధ్యం - ప్రేక్షకుల సందేహానికి శంకర్ క్లారిటీ

Director Shankar: కమల్ హాసన్, శంకర్ కాంబినేషన్‌లోని ‘ఇండియన్ 2’పై భారీ అంచనాలే ఉన్నాయి. తాజాగా ఇందులో కమల్ చేసిన సేనాపతి పాత్ర వయసు గురించి ట్రోల్స్ మొదలవ్వగా వాటికి దర్శకుడు క్లారిటీ ఇచ్చారు.

ఇండియన్ 2 వర్కింగ్ స్టిల్ (Image Credit: Shankar/Instagram)

Shankar About Indian 2: కోలీవుడ్ నుంచి పాన్ ఇండియన్ మూవీ వచ్చి.. హిట్ కొట్టి చాలాకాలమే అయ్యింది. అందుకే కోలీవుడ్ ప్రేక్షకుల ఆశలన్నీ ఇప్పుడు ‘ఇండియన్ 2’పైనే ఉన్నాయి. సెన్సేషనల్ డైరెక్టర్ శంకర్, లెజెండరీ యాక్టర్ కమల్ హాసన్ కాంబినేషన్‌పై ఇప్పటికే చాలా హైప్ క్రియేట్ అయ్యింది. 1996లో విడుదలయిన ‘భారతీయుడు’ మూవీకి ఇది సీక్వెల్‌గా తెరకెక్కింది. ఆ మూవీలో కమల్ హాసన్ చేసిన సేనాపతి పాత్ర వయసు 75 ఏళ్లు. ఈ లెక్క ప్రకారం.. 2024లో సేనాపతి వయసు 103 ఏళ్లు. అయితే 103 ఏళ్లు ఉన్న వ్యక్తి మార్షల్ ఆర్ట్స్, ఫైట్స్ అంత సులువుగా ఎలా చేస్తున్నాడు అనే ప్రశ్నకు దర్శకుడు శంకర్ సమాధానమిచ్చారు.

నాకు గుర్తులేదు..

103 ఏళ్లు ఉన్న సేనాపతి అలాంటి స్టంట్స్ ఎలా చేయగలడు అని నన్ను చాలామంది అడిగారు అంటూ శంకర్ చెప్పుకొచ్చారు. సేనావతి వృద్ధుడే కానీ సూపర్ మ్యాన్ అని అన్నారు. ‘‘నేను భారతీయుడు చేసినప్పుడు దాని సీక్వెల్ గురించి ఆలోచించలేదు. ఆ ఒక్క సినిమా మాత్రమే అనుకొని దానికి తగినట్టుగా కథను రాసుకున్నాను. సేనాపతిని ఫ్రీడమ్ ఫైటర్‌గా చూపించాలనుకున్నాను. అందుకే అందులో తను ఎప్పుడు పుట్టాడో భారతీయుడులో క్లియర్‌గా చూపించాను. ఆ సినిమాలో సేనాపతి గురించి పోలీసులు విచారిస్తున్నప్పుడు తను పుట్టిన తేదీ తెలిసే సీన్ ఉంటుంది. అది నాకు అసలు గుర్తులేదు’’ అని ‘భారతీయుడు’లోని సేనాపతి క్యారెక్టర్ గురించి మరోసారి వివరించారు శంకర్.

ప్రాక్టీస్‌తోనే సాధ్యం..

‘‘ఇండియన్ 2లో సేనాపతి.. చైనాలో ఉండే ఒక మార్షల్ ఆర్ట్స్ ఫైటర్‌గా కనిపిస్తాడు. ఎక్కువ సంఖ్యలో మార్షల్ ఆర్ట్స్ ఫైటర్స్ అనేవాళ్లు అక్కడే ఉన్నారు. చైనాకు చెందిన లు జిజియన్ అనే ఫైటర్ వయసు ఇప్పుడు 108 ఏళ్లు. అయినా ఇప్పటికీ యాక్టివ్‌గానే ఉంటూ గాల్లో ఎగురుతూ కిక్ కొడతారు. అది వాళ్లు నిరంతరం చేసే ప్రాక్టీస్‌తోనే సాధ్యమయ్యింది. సేనాపతి కూడా మర్మకళలో మాస్టర్. అందుకే తను నాకు ఒక సూపర్ హీరో’’ అని ‘ఇండియన్ 2’లో సేనాపతి క్యారెక్టర్ గురించి క్లారిటీ ఇచ్చారు శంకర్. అయితే ఇప్పటికే ఈ మూవీ ఎన్నో అడ్డంకులు దాటుకొని విడుదల తేదీని ఖరారు చేసుకుంది. ఫైనల్‌గా జులై 12న విడుదలకు సిద్ధమయ్యింది.

శంకర్ డిమాండ్ చేశాడు..

‘ఇండియన్ 2’లో ముసలివాడిగా కనిపించడం కోసం ప్రాస్థటిక్ మేకప్‌ను ధరించారు కమల్ హాసన్. అయితే ప్రాస్థటిక్ మేకప్ వేసుకోవడం అంత సులభం కాదు. దీంతో ఈ ఎక్స్‌పీరియన్స్ ఎలా ఉందో కమల్ బయటపెట్టారు. ‘ఇండియన్ 2’ కథ ఆసక్తిగా ఉండడం వల్ల, దర్శకుడు శంకర్ డిమాండ్ చేయడం వల్లే తాను ప్రాస్థటిక్ మేకప్ వేసుకోవడానికి ఒప్పుకున్నానని అన్నారు. ఇక అలాంటి మేకప్ వద్దని చాలాసార్లు అనుకున్నా కూడా కథలు డిమాండ్ చేయడం వల్లే మళ్లీ మళ్లీ అలాంటివి చేయాల్సి వస్తుందని తెలిపారు. ‘ఇండియన్ 2’లో కమల్ హాసన్‌తో పాటు సిద్ధార్థ్ కూడా మరో హీరోగా నటించాడు. రకుల్ ప్రీత్ సింగ్, ఎస్ జే సూర్య, బాబీ సింహా.. ఇతర కీలక పాత్రలు పోషించారు.