Ravi Babu Purna: అవును, పూర్ణతో నాకు లవ్ అఫైర్ ఉంది: రవిబాబు

దర్శకుడు రవిబాబు సినిమా అంటే పూర్ణ తప్పకుండా ఉండాల్సిందే. దీంతో వారి గురించి అనేక గాసిప్స్ చక్కర్లు కొట్టాయి. దీనిపై రవిబాబు మరోసారి స్పష్టత ఇచ్చారు.

Image Credit: Ravi Babu/Instagram

‘అవును’, ‘అవును 2’... ఇప్పుడు ‘అసలు’. ఈ సినిమాల్లో కామన్‌గా కనిపించేది ‘అ’ మాత్రమే కాదు, పూర్ణ కూడా. ఎందుకంటే.. రవిబాబుకు ఆమె నటన అంటే అంత ఇష్టమట. కాదు.. కాదు.. ప్రేమంట. ఈ విషయాన్ని ఆయనే వెల్లడించారు. ఆమెతో తనకు లవ్ అఫైర్ ఉందని, కానీ అది మీరు అనుకొనేది కాదని స్పష్టం చేశారు. దీంతో ఆయన కామెంట్స్ వైరల్ అవుతున్నాయి. 

పూర్ణ ప్రధాన పాత్రలో నటించిన ‘అసలు’ సినిమా.. ఇటీవలే ‘Etv Win’లో నేరుగా రిలీజ్ అయ్యింది. ఈ నేపథ్యంలో రవిబాబు ఓ ఇంటర్వ్యూలో మాట్లాడుతూ.. ‘అసలు’ సంగతులు చెప్పారు. ఇందులో భాగంగా పూర్ణ గురించి చెప్పుకొచ్చారు. ‘‘పూర్ణతో నాకు లవ్ అఫైర్ ఉంది. అలా అన్నానని ఇంకేదో అనుకోవద్దు. ప్రతి డైరెక్టర్‌కు తన నటులతో అలాంటి బంధమే ఉంటుంది. దర్శకుడు చెప్పేదాని కంటే పూర్ణ రెండు వందల శాతం యాడ్ చేసి నటిస్తుంది’’ అని తెలిపారు. 

నా అన్ని సినిమాలకు ఒప్పుకోదు

తన సినిమాలో హీరోయిన్ అనగానే అంతా పూర్ణాయే అనుకుంటారని, కానీ ఆమె అన్ని సినిమాలకు ఒకే చెప్పదని రవిబాబు స్పష్టం చేశారు. ఇటీవల తన కొత్త సినిమా ‘వాషింగ్ మెషీన్’ కోసం పూర్ణాను సంప్రదించానని తెలిపారు. ఏ మొహమాటం లేకుండా తాను ఆ సినిమాలో నటించనని చెప్పేసిందన్నారు. తాను ఆ పాత్రకు సరిపోతాను అనుకుంటేనే నటిస్తుందని, నా కోసం ప్రత్యేకంగా అంగీకరించదని తెలిపారు. అందుకే తనకు నచ్చిన సినిమాల్లోనే ఆమె నటించిందన్నారు. 

పూర్ణ బిజీ బిజీ

పూర్ణ ఇప్పటికే పలు టీవీ షోస్‌లో బిజీ బిజీగా గడిపేస్తున్న సంగతి తెలిసిందే. కొద్ది నెలల కిందట పెళ్లి చేసుకున్న పూర్ణ.. ఇటీవలే బిడ్డకు కూడా జన్మనిచ్చింది. దీంతో ఆమె షూటింగులకు విరామం ఇచ్చింది. మళ్లీ టీవీ షోస్‌లో బిజీ అయ్యేందుకు సిద్ధమవుతోంది. పూర్ణ 2007లో శ్రీహరి ప్రధాన పాత్రలో నటించిన ‘శ్రీ మహాలక్ష్మి’ సినిమాతో టాలీవుడ్‌కు పరిచయమైంది. ఆ తర్వాత 2011లో అల్లరి నరేష్‌తో ‘సీమటపాకాయ్’ సినిమా హీరోయిన్‌గా ఎంట్రీ ఇచ్చింది. ఆ సినిమాలో పూర్ణకు గుర్తింపు వచ్చినా.. అవకాశాలు మాత్రం రాలేదు. 2012లో రవిబాబు ‘అవును’ సినిమాతో పూర్ణకు తెలుగులో లైఫ్ ఇచ్చారు. ఆ తర్వాత ‘లడ్డు బాబు’, ‘అవును 2’, ‘అదుగో’ సినిమాల్లో నటించింది. ‘అఖండ’ మూవీలో కీలక పాత్రలో నటించి మరోసారి మెప్పించింది.

‘అసలు’ హర్రర్ కాదు

‘అసలు’ సినిమా ట్రైలర్ ప్రకారం.. ఇది ఒక మర్డర్ మిస్టరీ థ్రిల్లర్. ఓ దారుణమైన హత్యను చేధించే పనిలో ఉంటాడు ఓ పవర్ఫుల్ పోలీస్ ఆఫీసర్ (రవిబాబు). ఈ క్రమంలో నలుగురు వ్యక్తులపై అనుమానం వ్యక్తం చేస్తారు. ఈ హత్య వెనుక ఓ రహస్యాలు ఏమిటి ఆ నలుగురు అనుమానితులకు హత్యకు సంబంధం ఏంటి అనే అంశాలను సినిమాలో చూడొచ్చు. సాధారణంగా రవిబాబు సినిమాలలో సస్పెన్స్ అంశాలు చాలా ఎక్కువగా ఉంటాయి. నెక్స్ట్ ఏం జరుగుతుందా అనే ఉత్కంఠతో పాటు ఒకింత భయం కూడా కలుగుతుంది. ఆయన స్క్రీన్ ప్రజెన్స్ అలా ఉంటుంది. ప్రస్తుతం ఈ మూవీ ఓటీటీలో స్ట్రీమవుతుంది.