Krishnamma Release Date: ఎట్టకేలకు కొరటాల శివ సినిమాకి విముక్తి - 'కృష్ణమ్మ' రిలీజ్ డేట్ ఫిక్స్!

కొరటాల శివ సమర్పణలో సత్య దేవ్ హీరోగా రూపొందుతున్న తాజా చిత్రం 'కృష్ణమ్మ'. అప్పుడెప్పుడో షూటింగ్ పూర్తి చేసుకున్న ఈ సినిమా విడుదల తేదీని మేకర్స్ తాజాగా ప్రకటించారు.

సత్య దేవ్ 'కృష్ణమ్మ' రిలీజ్ డేట్ ఫిక్స్ (Image Credit: X)

హీరో సత్యదేవ్ వైవిధ్యమైన కథలు, విలక్షణమైన పాత్రలతో ఇండస్ట్రీలో తనకంటూ ప్రత్యేకమైన గుర్తింపు తెచ్చుకున్నారు. ఓవైపు ప్రధాన పాత్రలు పోషిస్తూనే.. మరోవైపు అవకాశం వచ్చినప్పుడు మంచి క్యారెక్టర్ రోల్స్ చేయడానికి కూడా వెనుకాడటం లేదు. చివరిసారిగా 'గుర్తుందా శీతాకాలం' సినిమాతో పలకరించిన విలక్షణ నటుడు.. కాస్త గ్యాప్ తీసుకొని బ్యాక్ టూ బ్యాక్ ప్రాజెక్ట్స్ తో అలరించడానికి రెడీ అవుతున్నారు. ఇందులో భాగంగా ముందుగా 'కృష్ణమ్మ' అనే చిత్రంతో ప్రేక్షకుల ముందుకు రాబోతున్నారు. తాజాగా ఈ మూవీ రిలీజ్ డేట్ ను మేకర్స్ అఫిషియల్ గా అనౌన్స్ చేసారు. 

సత్య దేవ్ కథానాయకుడిగా తెరకెక్కిన రా అండ్ రస్టిక్ యాక్షన్ మూవీ 'కృష్ణమ్మ'. ఇందులో అధిరా రాజ్, కృష్ణ తేజా రెడ్డి, మీసాల లక్ష్మణ్ కీలక పాత్రలు పోషించారు. ఈ సినిమాతో వి.వి. గోపాల కృష్ణ అనే కొత్త దర్శకుడు ఇండస్ట్రీకి పరిచయం అవుతున్నారు. అరుణాచల క్రియేషన్స్ పతాకంపై కృష్ణ కొమ్మలపాటి నిర్మిస్తున్నారు. అగ్ర దర్శకుడు కొరటాల శివ ఈ చిత్రానికి సమర్పకులుగా వ్యవహరిస్తున్నారు. అప్పుడెప్పుడో షూటింగ్ పూర్తి చేసుకున్న ఈ సినిమా.. వివిధ కారణాలతో లేట్ అవుతూ వచ్చింది. అయితే ఎట్టకేలకు ఇప్పుడు విడుదల తేదీని ఫిక్స్ చేసుకుంది. 2024 మే 3న ఈ చిత్రాన్ని వరల్డ్ వైడ్ గ్రాండ్ గా థియేటర్లలోకి తీసుకురాబోతున్నట్లు మేకర్స్ ప్రకటించారు. ఈ సందర్భంగా అనౌన్స్ మెంట్ వీడియోని ఆవిష్కరించారు. 

'కృష్ణమ్మ' రిలీజ్ డేట్ వీడియో గ్లింప్స్ లోకి వెళ్తే.. రాజమండ్రి సెంట్రల్ జైలులో ఖైదీగా స‌త్య‌దేవ్ కనిపిస్తుండగా, అక్కడికి వచ్చిన మరో ఖైదీ లక్ష్మణ్ ''భద్రా.. రిలీజ్ అవ్వ‌బోతున్నాం రా'' అంటాడు. దీనికి స‌త్య‌దేవ్ 'ఎప్పుడు?' అని అడగ్గా.. మే 3వ తారీఖున ఈ చిత్రాన్ని విడుద‌ల చేస్తున్నట్లు వెల్లడించడం ఆసక్తిని కలిగిస్తుంది. ఇందులో సత్యదేవ్ పెద్ద కత్తి పట్టుకొని కోపంగా ఎవరి మీదనో దాడి చేయడానికి పరుగెత్తడం, జైల్లో పోలీసులు అతన్ని హింసించడం వంటి కొన్ని యాక్షన్ సన్నివేశాల షాట్స్ చూపించారు. దీనికి బ్యాగ్రౌండ్ స్కోర్ ప్రధాన ఆకర్షణగా నిలిచింది. 

డైరెక్టర్ గోపాల కృష్ణ ఒక వైవిధ్యమైన ఇంటెన్స్ థ్రిల్లర్‌ కథాంశంతో 'కృష్ణమ్మ' సినిమాని రూపొందించినట్లు తెలుస్తోంది. స్నేహానికి ఉన్న విలువను, స్నేహితుల మధ్య ఉండే అనుబంధాన్ని ఈ చిత్రంలో ప్రత్యేకంగా చూపించబోతున్నారు. సినిమా కథంతా విజయవాడ కృష్ణా నది పరీవాహక ప్రాంతంలో జరుగుతుంది. అందుకే బ్యాక్ డ్రాప్ కు తగ్గట్టుగా కృష్ణమ్మ అనే టైటిల్ పెట్టినట్లు అర్థమవుతోంది. ఇప్పటికే ఈ సినిమా నుంచి వచ్చిన ఫస్ట్ లుక్, రెండు సాంగ్స్ కు ఆడియన్స్ నుంచి మంచి రెస్పాన్స్ వచ్చింది. టీజర్ లో సత్యదేవ్‌ ఇంతకుముందెన్నడూ చూడని విధంగా మాస్ యాక్షన్ అవతార్‌ లో, చాలా వైలెంట్ గా కనిపించాడు.

'కృష్ణమ్మ' సినిమాలో అర్చన, రఘుకుంచె, నంద గోపాల్ తదితరులు ఇతర పాత్రల్లో నటించారు. కాల భైరవ సంగీతం సమకూరుస్తున్న ఈ చిత్రానికి సన్నీ కూరపాటి సినిమాటోగ్రఫీ నిర్వహించారు. రామ్ కుమార్ ఆర్ట్ డైరెక్టర్ గా, తమ్మిరాజు ఎడిటర్ గా వర్క్ చేసారు. సమ్మర్ స్పెషల్ గా కొరటాల శివ సమర్పణలో రాబోతున్న ఈ సినిమా ఎలాంటి విజయాన్ని అందుకుంటుందో చూడాలి.