Chiranjeevi: చిరంజీవి హిట్ సినిమా... ఓసారి ర‌జ‌నీ, మ‌రోసారి ధ‌నుష్‌ - రెండు తమిళ్ రీమేక్స్ ఏవో తెలుసా?

చిరంజీవి హీరోగా న‌టించిన ఓ తెలుగు సినిమాను రెండుసార్లు త‌మిళంలో రీమేక్ చేశారు. ఈ రీమేక్‌ల‌లో కోలీవుడ్ సూప‌ర్ స్టార్ ర‌జ‌నీకాంత్‌, ధ‌నుష్ హీరోలుగా న‌టించారు. ఆ సినిమాలు ఏవో తెలుసా?

చిరంజీవి సినిమాను రెండుసార్లు రీమేక్ చేసిన స్టార్ హీరోలు! ఆ బ్లాక్బస్టర్ మూవీ ఏంటో తెలుసా?

Source : ABPLIVE AI

ఇప్పుడు ఓటీటీలలో సినిమాలు చూసే వీక్షకుల సంఖ్య పెరగడంతో రీమేక్ ట్రెండ్ త‌గ్గింది. కానీ 2000లకు ముందు ఆ ట్రెండ్ చాలా పాపుల‌ర్‌. బోలెడు రీమేక్స్ వచ్చేవి. ఓ భాష‌కు చెందిన సినిమా హిట్ట‌యితే చాలు ఆ సినిమా రీమేక్ రైట్స్ కోసం ప్రొడ్యూస‌ర్లు పోటీప‌డేవారు. టాలీవుడ్ టాప్ హీరోలు అందరూ రీమేక్ సినిమాల‌తో పెద్ద పెద్ద విజయాలు అందుకున్న సంద‌ర్భాలు ఉన్నాయి. వెంక‌టేష్ కెరీర్‌లో స్ట్రెయిట్ సినిమాల కంటే రీమేక్ సినిమాలే ఎక్కువ‌. మన హీరోలు రీమేక్స్ చేయడం కాదు... మన హీరోల సినిమాలను ఇతర భాషల్లో రీమేక్స్ చేసిన సందర్భాలు ఉన్నాయి. అందులో చిరంజీవి సినిమాను రెండుసార్లు రీమేక్ చేశారు.

రజనీకాంత్ ఒకసారి...
ధనుష్ మరోసారి - ఆ రీమేక్ ఏది?
తెలుగు హీరోల‌ సినిమాలు ఇత‌ర భాష‌ల్లోకి రీమేక్ అయ్యాయి. చిరంజీవి హీరోగా న‌టించిన ఓ తెలుగు సూప‌ర్ హిట్ సినిమాను మాత్రం రెండు సార్లు త‌మిళంలో రీమేక్ చేశారు. ఓసారి కోలీవుడ్ సూపర్ స్టార్ ర‌జ‌నీకాంత్ రీమేక్ చేయ‌గా... మ‌రోసారి ఆయన మాజీ అల్లుడు - కోలీవుడ్ యంగ్ స్టార్ హీరోలలో ఒకరైన ధ‌నుష్ రీమేక్ చేశారు. ఆ రెండు రీమేకులూ బ్లాక్ బస్టర్స్ అయ్యాయి. అంతే కాదు... ఆ రీమేక్‌ల‌లో ఒక‌ సినిమాలో చిరంజీవి అతిథి పాత్రలో నటించ‌డ‌మే కాకుండా నిర్మాతగా కూడా వ్య‌వ‌హ‌రించారు. ఆ సినిమా ఏదో తెలుసా?

అత్త‌కు య‌ముడు అమ్మాయికి మొగుడు
చిరంజీవి కథానాయకుడిగా కోదండ‌రామిరెడ్డి ద‌ర్శ‌క‌త్వంలో రూపొందిన సినిమా 'అత్త‌కు య‌ముడు అమ్మాయికి మొగుడు' (Attaku Yamudu Ammayiki Mogudu Movie). ఆ సినిమా బిగ్గెస్ట్ బ్లాక్‌ బ‌స్ట‌ర్‌. తెలుగులో 1989లో విడుదలైన ఆ సినిమా ఆ ఏడాది హ‌య్యెస్ట్ క‌లెక్ష‌న్స్ రాబ‌ట్టిన సినిమాగా రికార్డ్ క్రియేట్ చేసింది.

'అత్త‌కు య‌ముడు అమ్మాయికి మొగుడు' సినిమాను 'మాప్ఫిళ్లై' పేరుతో ర‌జ‌నీకాంత్ త‌మిళంలో రీమేక్ చేశారు. ఆ త‌మిళ చిత్రానికి మెగాస్టార్ చిరంజీవి సమర్పకులుగా వ్య‌వ‌హ‌రించారు. ఇంతకీ, తమిళ సినిమా నిర్మాత ఎవరో తెలుసా? చిరంజీవి బావ, ప్రముఖ నిర్మాత అల్లు అర‌వింద్. 'మాప్పిళ్లై' మూవీలో ర‌జ‌నీకాంత్ స్నేహితునిగా చిరంజీవి అతిథి పాత్రలో సందడి చేశారు. క్లైమాక్స్‌లో ఓ యాక్ష‌న్ ఎపిసోడ్‌లో క‌నిపిస్తారు. చిరంజీవి ఎంట్రీ ఈ సినిమాకు అప్ప‌ట్లో ఓ స్పెష‌ల్ అట్రాక్ష‌న్‌గా నిలిచింది. 'మాప్పిళ్లై' త‌మిళంలో బాక్సాఫీస్ రికార్డుల‌ను తిర‌గ‌రాసింది. 

'మాప్పిళ్లై'లో ర‌జ‌నీకాంత్‌కు జోడీగా అమ‌ల అక్కినేని హీరోయిన్‌గా న‌టించింది. ఆ తర్వాత మ‌రోసారి 'మాప్పిళ్లై' పేరుతో 'అత్త‌కు య‌ముడు అమ్మాయికి మొగుడు'ను ధ‌నుష్ కూడా రీమేక్ చేశాడు. ఇందులో హ‌న్సిక హీరోయిన్‌గా న‌టించ‌గా... అత్త పాత్ర‌లో మ‌నీషా కొయిరాలా క‌నిపించింది. మ‌ణిశ‌ర్మ మ్యూజిక్ అందించారు. ధ‌నుష్ న‌టించిన సినిమా కూడా హిట్టు టాక్‌ను తెచ్చుకుంది.