2023 Telugu Disaster Movies: హిట్లు తక్కువ ఫ్లాప్‌లు ఎక్కువ - 2023లో అవన్నీ అట్టర్ ఫ్లాప్‌లే!

2023 Telugu Disaster Movies: 2023లో ఎన్నో అంచనాలతో వచ్చిన చాలా సినిమాలు ప్లాప్ అయ్యాయి. టాలీవుడ్ బాక్సాఫీస్ వద్ద బోల్తా కొట్టిన ఆ సినిమాలివే...

2023 ఫ్లాప్‌ సినిమాలు (Image Credit: X)

2023 Telugu Disaster Movies: 2023 సంవత్సరం టాలీవుడ్ కు పెద్దగా కలిసి రాలేదు. గడిచిన ఏడాది కాలాన్ని రివైండ్ చేసి చూస్తే, హిట్స్ కంటే ఫ్లాపులే ఎక్కువ ఉన్నాయి. సంక్రాంతి సీజన్ తో ఘనంగా ప్రారంభించినప్పటికీ, క్రిస్మస్ సీజన్ పూర్తయ్యే నాటికి కేవలం ఐదారు శాతం సక్సెస్ రేట్ తో ముగింపు పలకాల్సి వచ్చింది. ఎలాంటి అంచనాలు లేకుండా వచ్చిన కొన్ని చిన్న చిత్రాలు బ్లాక్ బస్టర్ విజయాలు అందుకొని నిర్మాతలకు లాభాలు తెచ్చిపెట్టాయి. అదే సమయంలో భారీ అంచనాలతో వచ్చిన పెద్ద సినిమాలు మాత్రం ఊహించని విధంగా బాక్సాఫీస్ వద్ద బోల్తా కొట్టాయి.. తీవ్ర నష్టాలను మిగిల్చాయి. ఈ ఏడాదిలో ప్రేక్షకులను నిరాశ పరిచిన ఆ సినిమాలేంటో ఇప్పుడు చూద్దాం.

జనవరిలో సంతోష్ శోభన్ నటించిన 'కళ్యాణం కమనీయం'.. సుధీర్ బాబు చేసిన 'హంట్' సినిమాలు ప్లాప్ అయ్యాయి. ఫిబ్రవరిలో సందీప్ కిషన్ పాన్ ఇండియా మూవీ 'మైఖేల్' తో పాటుగా కళ్యాణ్ రామ్ 'అమిగోస్', సితార ఎంటర్‌టైన్‌మెంట్స్ వారి 'బుట్టబొమ్మ' సినిమాలు పరాజయం పాలయ్యాయి. సంతోష్ 'శ్రీదేవి శోభన్ బాబు' మూవీతో ఈ ఏడాది రెండో ప్లాప్ ను మూట గట్టుకున్నాడు. మార్చిలో నాగశౌర్య నటించిన 'ఫలానా అబ్బాయి ఫలానా అమ్మాయి'.. కృష్ణవంశీ డైరెక్ట్ చేసిన 'రంగమార్తండ' సినిమాలను ఆడియన్స్ రిజెక్ట్ చేశారు.

అటు రావణాసుర.. ఇటు శాకుంతల...
ఏప్రిల్ నుంచే టాలీవుడ్ కు అసలైన డిజాస్టర్ సినిమాలు పడ్డాయని చెప్పాలి. 'ధమాకా' 'వాల్తేరు వీరయ్య' వంటి రెండు బ్యాక్ టూ బ్యాక్ హిట్స్ తర్వాత రవితేజ నటించిన 'రావణాసుర' సినిమా బిగ్గెస్ట్ డిజాస్టర్ అనిపించుకుంది. స్టార్ హీరోయిన్ సమంత రూత్ ప్రభు టైటిల్ రోల్ పోషించిన 'శాకుంతలం' సినిమా కూడా అల్ట్రా డిజాస్టర్ అయింది. ఇది తన కెరీర్ లోనే అతి పెద్ద జర్క్ అని నిర్మాత దిల్ రాజు కామెంట్ చేసారంటే, ఈ మూవీ ఎంత పెద్ద పరాజయమో అర్థం చేసుకోవచ్చు. మధ్యలో కిరణ్ అబ్బవరం 'మీటర్' తో పరాజయం రుచి చూశాడు. 

నిరాశ పరిచిన అక్కినేని బ్రదర్స్...
అక్కినేని అఖిల్ ఈ ఏడాది 'ఏజెంట్' సినిమాతో భారీ ప్లాప్ అందుకుంటే, ఆయన సోదరుడు నాగచైతన్య 'కస్టడీ' మూవీతో నిరాశ పరిచారు. గోపీచంద్ నటించిన 'రామబాణం' సినిమా కూడా డిజాస్టర్స్ లిస్టులో చేరిపోయింది. సంతోష్ శోభన్ కు 'అన్నీ మంచి శకునములే' సక్సెస్ ఇవ్వలేకపోయింది. అహింస, నేను స్టూడెంట్ సర్, టక్కర్ లాంటి సినిమాలు ఇలా వచ్చి అలా వెళ్లిపోయాయి. ప్రభాస్ హీరోగా తెరకెక్కిన 'ఆదిపురుష్' మూవీ ఈ ఏడాది బిగ్ ప్లాప్స్ లో ఒకటిగా మారింది. ఎన్నో వివాదాలు, కోర్టు కేసుల మధ్య రిలీజైన ఈ సినిమా కనీసం డార్లింగ్ ఫ్యాన్స్ కు కూడా నచ్చలేదు.

'మెగా' ప్లాప్స్...
మెగా మేనమామ మేనల్లుడు పవన్ కళ్యాణ్, సాయిధరమ్ కలిసి నటించిన రీమేక్ మూవీ 'బ్రో' అందరినీ నిరాశ పరిచింది. చిరంజీవి చేసిన రీమేక్ మూవీ 'భోళా శంకర్' బిగ్గెస్ట్ డిజాస్టర్ అయింది. ఇది మెగాస్టార్ కెరీర్ లోనే అట్టర్ ప్లాప్ అనిపించుకుంది. వరుణ్ తేజ్ చేసిన 'గాండీవధారి అర్జున' సైతం పరాజయాల జాబితాలోకి ఎక్కింది. 'ఆదికేశవ' సినిమా వైష్ణవ్ తేజ్ కు ప్లాప్ ఇచ్చింది. 'కార్తికేయ 2' తర్వాత నిఖిల్ నటించిన పాన్ ఇండియా మూవీ 'స్పై' మెప్పించలేకపోయింది. నాగశౌర్య 'రంగబలి', శ్రీ సింహా కోడూరి 'భాగ్ సాలే' సినిమాలు పరాజయం చెందాయి.

భయపెట్టిన బోయపాటి.. గర్జించలేకపోయిన 'టైగర్'...
బోయపాటి శ్రీను - రామ్ పోతినేని కాంబినేషన్ లో తెరకెక్కిన 'స్కంద' సినిమా ఫ్లాప్ అవ్వడమే కాదు, ఓటీటీలోకి వచ్చిన తర్వాత ట్రోలింగ్ కు గురైంది. రిలీజ్ కు ముందే రెండు పార్టులుగా అనౌన్స్ చేయబడిన 'పెదకాపు 1' సినిమా మిస్-పైర్ అయింది. సుధీర్ బాబు 'మామామశ్చీంద్ర', కిరణ్ అబ్బవరం 'రూల్స్ రంజన్' చిత్రాలతో పరాజయాల పరంపరను కొనసాగించారు. రవితేజ నటించిన పాన్ ఇండియా మూవీ 'టైగర్ నాగేశ్వరరావు' కూడా ప్లాప్ లిస్ట్ లోకి చేరిపోయింది. నితిన్ ఎన్నో ఆశలు పెట్టుకున్న 'ఎక్స్ట్రా ఆర్డినరీమ్యాన్' సినిమా బాక్సాఫీస్ బరిలో క్లిక్ అవ్వలేదు. ఇలా చెప్పుకుంటూ పోతే ఈ ఏడాది హిట్టైన సినిమాల కంటే ఫ్లాపులే ఎక్కువ ఉన్నాయి. మరి వచ్చే సంవత్సరమైనా టాలీవుడ్ లో సక్సెస్ రేట్ రెట్టింపు అవుతుందేమో చూడాలి.