Mahesh Babu - Sandeep Reddy Vanga: మహేష్‌తో ఎందుకు మిస్సింగ్? - నెక్స్ట్ రామ్ చరణ్‌తో కూడా!

తెలుగులో 'అర్జున్ రెడ్డి', హిందీలో 'కబీర్ సింగ్' సినిమాలతో విజయాలు అందుకున్న సందీప్ రెడ్డి వంగా... డిసెంబర్ 1న 'యానిమల్'తో ప్రేక్షకుల ముందుకు వస్తున్నారు. ఈ సినిమా విడుదల సందర్భంగా ఇంటర్వ్యూ ఇచ్చారు. 

రామ్ చరణ్, సందీప్ రెడ్డి వంగా, మహేష్ బాబు

Animal movie director Sandeep Reddy Vanga interview: సందీప్ రెడ్డి వంగా... ఈ పేరు ఒక సంచలనం! విజయ్ దేవరకొండ స్టార్ హీరో కావడం వెనుక, యువతలో ఆయనకు విపరీతమైన ఫాలోయింగ్ రావడం వెనుక కారణం సందీప్ రెడ్డి! ఆయన దర్శకత్వం వహించిన 'అర్జున్ రెడ్డి' సినిమా! తొలి సినిమాతో సందీప్ రెడ్డి వంగా సంచలనాలు సృష్టించారు. 'అర్జున్ రెడ్డి' తర్వాత సూపర్ స్టార్ మహేష్ బాబు కథానాయకుడిగా ఓ సినిమా చేసే అవకాశం ఆయనకు వచ్చిందని టాలీవుడ్ ఫిలిం నగర్ వర్గాలు తెలిపాయి. అయితే..‌. ఆ సినిమా ఇప్పటికీ పట్టాలు ఎక్కలేదు. మహేష్ బాబుతో సినిమా ఎందుకు మిస్ అయ్యిందో లేదో చెప్పారు సందీప్ రెడ్డి వంగా.

తెలుగులో 'అర్జున్ రెడ్డి' సినిమాతో భారీ విజయం అందుకున్న సందీప్ రెడ్డి వంగా... ఆ తర్వాత అదే కథను హిందీలో 'కబీర్ సింగ్' పేరుతో రీమేక్ చేశారు. షాహిద్ కపూర్, కియారా అడ్వాణీ జంటగా నటించిన చిత్రమది. అక్కడ కూడా భారీ వసూళ్లు సాధించింది. 'కబీర్ సింగ్' తర్వాత సందీప్ రెడ్డి వంగా దర్శకత్వం వహించిన సినిమా 'యానిమల్'. బాలీవుడ్ స్టార్ హీరో రణబీర్ కపూర్, నేషనల్ క్రష్ రష్మికా మందన్న జంటగా నటించిన ఈ సినిమా డిసెంబర్ ఒకటిన విడుదల కానుంది. ఈ సందర్భంగా ఇచ్చిన ఇంటర్వ్యూలో మహేష్, గ్లోబల్ స్టార్ రామ్ చరణ్, పాన్ ఇండియా రెబల్ స్టార్ ప్రభాస్ గురించి దర్శకుడు మాట్లాడారు.

మహేష్ బాబుకు కథ నచ్చింది కానీ...
''మహేష్ బాబు గారికి నేను ఒక కథ చెప్పాను. అది ఆయనకు నచ్చింది. అయితే వేరే కమిట్మెంట్స్ ఉండడం వలన ఆ సినిమా ముందుకు వెళ్లలేదు. మహేష్ బాబు గారితో మాత్రమే కాదు రామ్ చరణ్ గారితోనూ, మిగతా హీరోలతోనూ నాకు సినిమాలు చేయాలని ఉంది'' అని సందీప్ రెడ్డి వంగా తెలిపారు.

ఎలక్షన్ ఫాంటసీ గేమ్ ను ఆడండి. 10వేల రూపాయల విలువైన గాడ్జెట్లు పొందండి. 🏆 *T&C Apply

'యానిమల్' తర్వాత ప్రభాస్ 'స్పిరిట్'!
'యానిమల్' తర్వాత సందీప్ రెడ్డి వంగా తెలుగులోని అగ్ర హీరోలలో ఒకరైన, దేశ వ్యాప్తంగా గుర్తింపు ఉన్న ప్రభాస్ కథానాయకుడిగా భారీ సినిమా చేయడానికి రెడీ అవుతున్నారు. 'యానిమల్' నిర్మించిన టి సిరీస్ భూషణ్ కుమార్ నిర్మాణ భాగస్వామ్యంలో 'స్పిరిట్' సినిమా చేస్తారు. అది వచ్చే ఏడాది పట్టాలు ఎక్కుతుంది. 

రణబీర్ కపూర్, రష్మిక మందన్నాతో కలిసి దర్శకుడు సందీప్ రెడ్డి వంగా ఇటీవల గాడ్ ఆఫ్ మాసెస్, నట సింహం నందమూరి బాలకృష్ణ హోస్ట్ చేస్తున్న 'అన్ స్టాపబుల్' కార్యక్రమానికి విచ్చేసిన సంగతి తెలిసిందే. ఆ షోలో 'స్పిరిట్' సినిమాలో ఏదైనా ఒక చిన్న క్యారెక్టర్ ఉంటే ప్రభాస్ అన్నతో కలిసి నటించడానికి తాను రెడీ అని రణబీర్ కపూర్ చెప్పారు.