Visakha Crime: గంజాయి రవాణా చేసేది కొరియర్ బాయ్ లే: విశాఖ సీపీ సంచలన విషయాలు వెల్లడి

Visakhapatnam News In Telugu: విశాఖ నగర పరిధిలో గంజాయిని తరలించేది పలు రకాల కొరియర్ సంస్థలకు చెందిన బాయ్ లేనని నగర పోలీస్ కమిషనర్ డా.రవిశంకర్ సంచలన విషయాలు వెల్లడించారు.

విశాఖపట్నం పోలీస్ కమిషనర్ డా.రవిశంకర్

Vizag CP Ravishankar: విశాఖపట్నం: విశాఖ నగర పరిధిలో గంజాయిని తరలించేది పలు రకాల కొరియర్ సంస్థలకు చెందిన బాయ్ లేనని నగర పోలీస్ కమిషనర్ డా.రవిశంకర్ సంచలన విషయాలు వెల్లడించారు. టాస్క్ ఫోర్స్ పోలీసులతో కలిసి సిపి బుధవారం నేరుగా టూటౌన్ పరిధిలోని కొబ్బరి తోట ప్రాంతాల్లో దాడుల్లో పాల్గొన్నారు. ఈ సందర్భంగా రవాణాకి సిద్దంగా ఉంచిన 200 కేజీల గంజాయి (Ganja)ని స్వాధీనం చేసుకున్నారు. ఈ సందర్భంగా సీపీ రవిశంకర్ మాట్లాడుతూ, తమకు పక్కా సమాచారం రావడంతో దాడులు చేరసినట్టు ఆయన తెలియజేశారు. 

నగరంలో పలువురు కొరియర్ బాయ్ ల ద్వారా గంజాయి మెటీరియల్ రవాణా జరుగుతుందని అన్నారు. అలాంటి వారిపై నిఘా పెట్టామని చెప్పిన సీపీ, ప్రస్తుతం రవాణాకి పాల్పడుతున్నవారు పరారీలో ఉన్నారని చెప్పారు. నగరంలోని ఏ కొరియర్ కంపెనీ అయినా నిబంధనలు అతిక్రమించి ఇలాంటి చట్ట వ్యతిరేక, నిషేధిత గంజాయిని రవాణా చేస్తే కఠిన చర్యలు తీసుకుంటామని హెచ్చరించారు. ఈ విషయంలో ఎలాంటి వారినైనా ఉపేక్షించేది లేదని, మొహమాటం లేకుండా లోపలేస్తామని ఘాటుగా హెచ్చరించారు. ప్రస్తుతం అనుమానితులపై నిఘాపెట్టామని, నగరం మొత్తం వారి కోసం జల్లెడ పడుతున్నట్టు ఆయన వివరించారు. 

ప్రస్తుతం గంజాయి స్వాధీనం చేసుకున్న ఇంటిలో వున్న వ్యక్తులు పలు రాష్ట్రాలు, ఇతర దేశాలకు కూడా ఇక్కడి నుంచే ఏడాదిన్న కాలంగా గంజాయి సరఫరా చేస్తున్నట్టు సమాచారం ఉందని తెలియజేశారు. మరికొన్ని ప్రాంతాల్లో కూడా గంజాయి గంజాయి రవాణా అవుతున్నట్టు సమాచారం వచ్చిందని అక్కడ కూడా ప్రత్యేక బృందాలు దాడులు నిర్వహిస్తాయని చెప్పారు. నగరంలో ప్రజలు అద్దెకి ఇళ్లు ఇచ్చేవారు అద్దెకి దిగేవారి వివరాలను పూర్తిగా కనుక్కున్న తరువాత మాత్రమే ఇళ్లు అద్దెకి ఇవ్వాలన్నారు. ఈ దాడుల్లో టూటౌన్ పోలీసులు పాల్గొన్నారు