Kottagudem: పాల్వంచ కుటుంబం ఆత్మహత్య కేసు... వనమా రాఘవేంద్రకు మరో 14 రోజుల రిమాండ్‌

కుటుంబం ఆత్మహత్య కేసులో ఆరోపణలు ఎదుర్కొంటున్న వనమా రాఘవేంద్ర రిమాండ్ ను కోర్టు పొడిగింది. ఫిబ్రవరి 4 వరకు రిమాండ్ గడువు పొడిగిస్తున్నట్లు స్థానిక కోర్టు తెలిపింది.

వనమా రాఘవేంద్ర(ఫైల్ ఫొటో)

భద్రాద్రి కొత్తగూడెం ఎమ్మెల్యే వనమా వెంకటేశ్వరావు కుమారుడు వనమా రాఘవేంద్రకు స్థానిక కోర్టు రిమాండ్‌ పొడిగించింది. మరో 14 రోజులు రిమాండ్ గడువు పెండింది.  ఇవాళ్టితో రిమాండ్ గడువు ముగియడంతో జైలు అధికారులు కోర్టులో వర్చువల్‌గా రాఘవను హాజరుపరిచారు. కొత్తగూడెం రెండో అదనపు జ్యుడీషియల్ కోర్టులో వాదనలు జరిగాయి. అనంతరం ఆయనకు ఫిబ్రవరి 4 వరకు రిమాండ్‌ గడువు పొడిగిస్తున్నట్లు కోర్టు వెల్లడించింది. రాష్ట్రవ్యాప్తంగా సంచలనం రేపిన భద్రాద్రి కొత్తగూడెం జిల్లా పాల్వంచలో నాగరామకృష్ణ కుటుంబం ఆత్మహత్య ఉదంతంలో ప్రధాన సూత్రధారిగా వనమా రాఘవ ఆరోపణలు ఎదుర్కొంటున్న విషయం తెలిసిందే. రాఘవ బెదిరింపులకు తట్టుకోలేక నాగరామకృష్ణ కుటుంబం ఆత్మహత్యకు పాల్పడటంతో ఒక్కసారిగా రాఘవ అరాచకాలపై అందరి దృష్టి పడింది. మీడియాతోపాటు సామాజిక మాద్యమాల్లో రాఘవ నేరాకృత్యాలపై విమర్శలు రావడంతో పోలీసులు పరుగులు పెట్టారు. రాఘవకు సంబంధించిన కేసులపై దృష్టి సారించారు. పెండింగ్‌ కేసుల విచారణ వేగవంతం చేశారు. ఈ మేరకు పాల్వంచ ఏఎస్సీ, ఐపీఎస్‌ అధికారి రోహిత్‌ రాజ్‌ రాఘవపై 12 కేసుల్లో తీవ్ర నేరారోపణలు ఉన్నాయని, అతనిపై రౌడీషీట్‌ నమోదు చేస్తామని ప్రకటించారు.

రామకృష్ణ కుటుంబం ఆత్మహత్య

జనవరి 3వ తేదీన పాల్వంచకు చెందిన నాగ రామకృష్ణ ఇద్దరు చిన్నారులు, భార్యతో సహా ఆత్మహత్య చేసుకున్నారు. భార్య, పిల్లలపై పెట్రోల్‌ పోసి నిప్పంటించుకున్నారు. ఈ ఘటనలో రామకృష్ణ, శ్రీలక్ష్మి, సాహిత్య అక్కడికక్కడే మృతిచెందారు. పెద్ద కుమార్తె సాహితీ చికిత్స పొందుతూ ఆస్పత్రిలో మృతి చెందింది. రామకృష్ణ బావమరిది జనార్దన్‌ ఫిర్యాదుతో పాల్వంచ పోలీస్ స్టేషన్ కేసు నమోదు చేశారు. 

గతంలో నమోదైన కేసులపై కూడా విచారణ

అయితే ఆత్మహత్యకు ముందు రామకృష్ణ సూసైడ్ నోట్, సెల్ఫీ వీడియో తీసుకున్నారు. ఈ వీడియో కొత్తగూడెం ఎమ్మెల్యే కుమారుడు వనమా రాఘవపై ఆరోపణలు చేశారు. తన ఆత్మహత్యకు ఆర్థిక ఇబ్బందులతో పాటు ఇతర ఉన్నాయని వీడియోలో చెప్పారు. రాఘవ, సూర్యవతి, మాధవి కారణంగానే ఆత్మహత్య చేసుకుంటున్నామని తెలిపారు. ఈ సూసైడ్ ఘటన బయటకు రాగానే వనమా రాఘవ పరారీలో ఉన్నాడు. అతడి కోసం 8 ప్రత్యేక బృందాలను గాలించాయి. వనమా రాఘవను దమ్మపేట మండలం మందలపల్లి వద్ద రాఘవను అరెస్టు చేశారు. ఈ కేసులో బాధితుల నుంచి లభించిన ఆధారాలను సీజ్‌ చేసి కోర్టుకు సమర్పించారు.