Road Accident: రంగారెడ్డి జిల్లాలో ఘోర ప్రమాదం - చిరు వ్యాపారులపైకి దూసుకెళ్లిన లారీ, నలుగురు మృతి

Telangana News: రంగారెడ్డి జిల్లా హైదరాబాద్ - బీజాపూర్ రహదారిపై ఓ లారీ బీభత్సం సృష్టించింది. ఫుట్‌పాత్‌పై ఉన్న చిరు వ్యాపారులపై దూసుకెళ్లగా నలుగురు ప్రాణాలు కోల్పోయారు. 10 మందికిపైగా గాయాలయ్యాయి.

రంగారెడ్డి జిల్లాలో ఘోర ప్రమాదం

Source : Twitter (X)

Road Accident In Rangareddy District: రంగారెడ్డి జిల్లాలో (Rangareddy District) సోమవారం ఘోర ప్రమాదం చోటు చేసుకుంది. చేవెళ్ల మండలం ఆలూరు స్టేజీ వద్ద ఓ లారీ బీభత్సం సృష్టించింది. హైదరాబాద్ - బీజాపూర్ రహదారి వద్ద దాదాపు 50 మంది కూరగాయలు విక్రయిస్తుండగా.. వారిపైకి ఓ లారీ అదుపు తప్పి దూసుకెళ్లింది. ఈ దుర్ఘటనలో నలుగురు మృతి చెందగా.. 10 మందికి పైగా గాయాలైనట్లు తెలుస్తోంది. స్థానికులు క్షతగాత్రులను చేవెళ్ల ప్రభుత్వాస్పత్రికి తరలించారు. పలువురి పరిస్థితి విషమంగా ఉండగా.. మృతుల సంఖ్య మరింత పెరిగే అవకాశం ఉన్నట్లు సమాచారం. 

దూసుకొస్తోన్న లారీని చూసిన వ్యాపారులు ఒక్కసారిగా భయంతో పరుగులు తీశారు. వ్యాపారులపైకి దూసుకెళ్లిన అనంతరం లారీ చెట్టును ఢీకొని ఆగిపోగా.. డ్రైవర్ మాత్రం క్యాబిన్‌లో ఇరుక్కుపోయాడు. లారీ వేగంగా ఢీకొట్టడంతో చెట్టు నేలకూలింది. ఈ ఘటనతో రహదారిపై భయాందోళన నెలకొంది. సమాచారం అందుకున్న పోలీసులు ఘటనా స్థలానికి చేరుకుని సహాయక చర్యలు చేపట్టారు. మృతులు రాములు (ఆలూరు), ప్రేమ్ (ఆలూరు), సుజాత (ఖానాపూర్)గా గుర్తించారు. ఘటనపై పోలీసులు కేసు నమోదు చేసి దర్యాప్తు చేస్తున్నారు. ఘటనా స్థలంలో మృతుల బంధువులు కన్నీరు మున్నీరుగా విలపించారు.

ఎటు చూసిన భీతావహమే

ప్రమాదం జరిగిన తర్వాత హైదరాబాద్ - బీజాపూర్ రహదారిపై ఎటు చూసినా భీతావహ వాతావరణమే నెలకొంది. దాదాపు 100 మీటర్ల నుంచే లారీ అదుపు తప్పిన విషయాన్ని గమనించిన వ్యాపారులు పరుగులు తీశారు. లారీ బీభత్సం సృష్టించిన అనంతరం చెట్టును ఢీకొని ఆగిపోయింది. డ్రైవర్ క్యాబిన్‌లో ఇరుక్కుపోయి తీవ్రగాయాలతో ఆర్తనాదాలు చేశాడు. రంగంలోకి దిగిన పోలీసులు స్థానికుల సాయంతో అతన్ని బయటకు తీసి సికింద్రాబాద్ ఆస్పత్రికి తరలించారు. కూలిన చెట్టును జేసీబీతో పక్కకు తొలగించారు. లారీ హైదరాబాద్‌లో అన్‌లోడ్ చేసి తిరిగి వికారాబాద్ వస్తోన్న క్రమంలో అదుపు తప్పడంతో ఈ ఘటన జరిగినట్లు పోలీసులు ప్రాథమికంగా పేర్కొన్నారు. అయితే, ఘటనా స్థలానికి కి.మీల దూరంలో ఆదివారం కూడా రోడ్డు ప్రమాదం జరిగింది. లారీ, కారు ఢీకొని బీడీఎల్ ఉద్యోగి దంపతులు మృతి చెందారు. వరుస ఘటనలపై స్థానికులు ఆందోళన వ్యక్తం చేస్తున్నారు. ఈ రోడ్డును విస్తరించాలని ఏళ్ల తరబడి కోరుతున్నా పట్టించుకోవడం లేదని ఆగ్రహం వ్యక్తం చేస్తున్నారు.

సీఎం రేవంత్ రెడ్డి దిగ్భ్రాంతి

అటు, ప్రమాద ఘటనపై సీఎం రేవంత్ రెడ్డి తీవ్ర దిగ్భ్రాంతి వ్యక్తం చేశారు. మృతుల కుటుంబాలకు ప్రగాఢ సానుభూతి తెలియజేశారు. క్షతగాత్రులకు మెరుగైన వైద్యం అందించాలని అధికారులను ఆదేశించారు.