Khammam News: ఖమ్మం పత్తి మార్కెట్‌లో భారీ అగ్ని ప్రమాదం - అగ్నికి ఆహుతైన పత్తి బస్తాలు

Khammam News: ఖమ్మం పత్తి మార్కెట్‌లో బుధవారం రాత్రి భారీ అగ్ని ప్రమాదం చోటు చేసుకుంది. దాదాపు 800 బస్తాలు అగ్నికి ఆహుతి కాగా.. రూ.30 లక్షల వరకూ నష్టం జరిగిందని అంచనా వేస్తున్నారు.

ఖమ్మం వ్యవసాయ మార్కెట్‌లో అగ్నిప్రమాదం

Source : ABP Desam

Severe Fire Accident In Khammam Cotton Market: ఖమ్మం పత్తి మార్కెట్‌లో (Khammam Market) బుధవారం రాత్రి భారీ అగ్నిప్రమాదం సంభవించింది. ఈ ఘటనలో సుమారు 800 పత్తి బస్తాలు అగ్నికి ఆహుతయ్యాయి. దీని విలువ సుమారు రూ.30 లక్షలు ఉంటుదని అంచనా వేస్తున్నారు. సమాచారం అందుకున్న అగ్ని మాపక సిబ్బంది వెంటనే అక్కడికి చేరుకుని రెండు అగ్నిమాపక యంత్రాలతో మంటలు అదుపులోకి తెచ్చారు. అప్పటికే బస్తాల్లో ఉన్న పత్తి కాలిపోయింది. విద్యుత్ షార్ట్ సర్క్యూట్ వల్లే ప్రమాదం జరిగిందని భావిస్తున్నారు. రైతుల నుంచి కొనుగోలు చేసిన తర్వాత ఇద్దరు వ్యాపారులు తమ సరుకును ఇక్కడే నిల్వ ఉంచారు.

ఓ వ్యాపారికి చెందిన 800 బస్తాలు, మరో వ్యాపారికి చెందిన 500 బస్తాలను యార్డులో నిల్వ ఉంచారు. ప్రమాదం జరిగిన వెంటనే మార్కెటింగ్ శాఖ అధికారులు, సిబ్బంది అప్రమత్తమై కొన్ని పత్తి బస్తాలను హుటాహుటిన బయటకు తెచ్చారు. అయితే, ఓ ప్రైవేట్ ట్రేడర్‌కు చెందిన లాట్‌లో ప్రమాదం జరిగిందని.. రైతులకు ఎలాంటి నష్టం జరగలేదని అధికారులు తెలిపారు. మరోవైపు, ఈ ఘటనపై మంత్రి తుమ్మల నాగేశ్వరరావు ఆరా తీశారు. మార్కెట్లో జరిగిన సంఘటనపై పూర్తి వివరాలు సేకరించి నివేదిక ఇవ్వాలని పేర్కొన్నారు.