Cyber Crime : గూగుల్ లో నెంబర్ సెర్చ్ చేస్తే రూ.1.24 లక్షలు మాయం

Cyber Crime : ఏ అడ్రస్ కావాలన్నా, ఏ వివరాలు తెలుసుకోవాలన్నా వెంటనే గూగుల్ చేస్తున్నారు. అలా ఓ వ్యక్తి చేసిన పని అతడి బ్యాంక్ బ్యాలెన్స్ మాయం చేసింది. లక్షా 24 వేల రూపాయలు అకౌంట్లోంచి డెబిట్ అయ్యేలా చేసింది.

ఆన్ లైన్ మోసం

Cyber Crime : ఆన్ లైన్ మోసాలకు అడ్డూఆపూ లేకుండా పోతోంది. ఇటీవల నెల్లూరు జిల్లాలో కూడా ఆన్ లైన్ మోసాలు వెలుగులోకి వచ్చాయి. అయితే ఈ ఆన్ లైన్ మోసాలకు కొంత మంది గూగుల్ ని వేదికగా ఉపయోగించుకోవడం ఇప్పుడు సంచలనంగా మారింది. ఏ చిన్న అవసరం వచ్చినా ఇప్పుడు గూగుల్ చేయడం అందరికీ అలవాటైపోయింది. ఏ అడ్రస్ కావాలన్నా, ఏ ఫోన్ నెంబర్ తెలుసుకోవాలన్నా వెంటనే గూగుల్ చేస్తున్నారు. అలా ఓ వ్యక్తి చేసిన పని అతడి బ్యాంక్ బ్యాలెన్స్ మాయం చేసింది. ఒకటి కాదు రెండు కాదు, ఏకంగా లక్షా 24 వేల రూపాయలు అకౌంట్లో నుంచి డెబిట్ అయ్యేలా చేసింది.  

అసలేం జరిగింది? 

నెల్లూరు నగరం చిన్నబజారు కామాటి వీధికి చెందిన చింతల సాయి గణేష్ ఇంట్లో గ్యాస్ సిలిండర్ లీక్ అవుతుందని కుటుంబ సభ్యులు చెప్పారు. దాని రిపేర్ కోసం తీసుకెళ్లాలి. అయితే రిపేర్ చేసే వ్యక్తిని ఇంటికే పిలుద్దామనే ఉద్దేశంతో కంపెనీ టోల్ ఫ్రీ నెంబర్ కోసం వెదికాడు సాయి గణేష్. ఆ నెంబర్ కనిపించకపోవడంతో గూగుల్ లో సెర్చ్ చేశాడు. గూగుల్ లో కనిపించిన టోల్ ఫ్రీ నెంబర్ కి కాల్ చేశాడు. అవతలి వ్యక్తి కాల్ లిఫ్ట్ చేసి, మా ప్రతినిధి వెంటనే మిమ్మల్ని సంప్రదిస్తాడని చెప్పి పెట్టేశాడు. ఆ తర్వాత అసలు కథ మొదలైంది. మెల్లిగా ఉచ్చులో చిక్కుకున్నాడు సాయి గణేష్. ఈసారి ఫోన్ చేసిన ఆ ముఠా సభ్యులు సాయి గణేష్ ఫోన్  లో ఎనీ డెస్క్ యాప్ ని ఇన్ స్టాల్ చేయాలమని చెప్పారు. ఆ యాప్ ఇన్ స్టాల్ చేయగానే ఆఫోన్ ని అవతలి వ్యక్తులు హ్యాక్ చేశారు. ఆ తర్వాత వారు ఓటీపీ నెంబర్లను తెలుసుకున్నారు. దీంతో సాయి గణేష్ బ్యాంక్ బ్యాలెన్స్ ఖాళీ అయింది. మొత్తం రూ.1,24,605 తన అకౌంట్ నుంచి కట్ అయినట్టు మెసేజ్ వచ్చింది. ఆ తర్వాత సాయి గణేష్ మళ్లీ టోల్ ఫ్రీ నెంబర్ కి కాల్ చేయగా స్విచాఫ్ చేసినట్టు వచ్చింది. దీంతో మోసపోయానని గుర్తించిన బాధితుడు సంతపేట పోలీస్ స్టేషన్లో ఫిర్యాదు చేశాడు. ఇన్‌ స్పెక్టర్‌ షేక్‌ అన్వర్‌ బాషా కేసు నమోదు చేసి, వివరాలు సేకరించారు. బాధితుడిని తీసుకెళ్లి చెన్నైలో దర్యాప్తు కొనసాగిస్తున్నారు. 

గూగుల్ అన్నీ నిజాలు చెబుతుందా..?

గూగుల్ లో అన్నీ సరైన వివరాలే దొరుకుతాయా? గూగుల్ లో వెదికినవన్నీ కరెక్ట్ గానే ఉంటాయా ? ఇటీవల చాలామంది మోసగాళ్లు బ్యాంక్ వెబ్ సైట్లను పోలిన నకిలీ వెబ్ సైట్లను రూపొందిస్తున్నారు. గూగుల్ లో వెదికితే, అసలు వెబ్ సైట్ తో పాటు, ఈ నకిలీ వెబ్ సైట్లు కూడా ఉంటాయి. అందులో వివరాలు నమోదు చేస్తే, బ్యాంక్ బ్యాలెన్స్ ఖాళీ అవుతుంది. ఇలాంటిదే ఈ మోసం కూడా. ఇక్కడ నేరుగా బాధితుడు మోసగాళ్లకే ఫోన్ చేసి ఇరుక్కుపోయాడు. ఒకవేళ తెలియని వ్యక్తులతో ఫోన్లో మాట్లాడాల్సి వస్తే, మన వివరాలు పూర్తిగా చెప్పకపోవడమే మంచిది. అందులోనూ యాప్ లను ఇన్ స్టాల్ చేసుకుంటే అసలుకే మోసం వస్తుంది. ఇంటర్నెట్ వల్ల ఎంత లాభం ఉందో, అంతే నష్టం కూడా జరిగే అకాశముంది. అందుకే నిత్యం అప్రమత్తంగా ఉండాలని చెబుతున్నారు పోలీసులు. ఆన్ లైన్ ఫ్రాడ్ కి సంబంధించి వెంటనే తమకు ఫిర్యాదు చేయాలంటున్నారు.