Khammam జిల్లాలో కీచకపర్వం, ఆసుపత్రికి వెళ్లిన మైనర్‌పై ఆర్ఎంపీ అత్యాచారయత్నం, మరోచోట దివ్యాంగురాలిపై !

Khammam News: ఉమ్మడి ఖమ్మం జిల్లాలో మైనర్ బాలికలు, మహిళలపై అత్యాచార ఘటనలు కలకలం రేపుతున్నాయి. వైద్యం కోసం వచ్చిన వారిని సైతం వదిలిపెట్టడం లేదు.

ఖమ్మంలో కీచకపర్వం

Molestation on Minor Girl : ఎన్ని కఠిన చట్టాలు తీసుకొచ్చినా, కొందరి ప్రవర్తనలో మార్పు రావడం లేదు. బాలికలు, మహిళలపై లైంగిక దాడులకు పాల్పడుతూ వారిని నిత్యం వేధిస్తున్న కేసులు రోజూ ఏదోచోట వెలుగుచూస్తూనే ఉన్నాయి. తాజాగా ఉమ్మడి ఖమ్మం జిల్లాలో రెండు అత్యాచార సంఘటనలు సంచలనం సృష్టించాయి. ఖమ్మం జిల్లా నేలకొండపల్లిలో ఆర్‌ఎంపీ వైద్యుడు తన వద్దకు వైద్యానికి వచ్చిన మైనర్‌ బాలికపై ఆత్యాచారయత్నానికి పాల్పడగా.. భద్రాద్రి కొత్తగూడెం జిల్లా లక్ష్మీదేవిపల్లి మండలం పునుకుడుచెలకలో దివ్యాంగురాలిపై ఓ కామాందుడు లైంగికదాడికి పాల్పడిన సంఘటన సంచలనం సృష్టించింది. ఒకే రోజు రెండు సంఘటనలు ఉమ్మడి ఖమ్మం జిల్లాలో వెలుగులోకి వచ్చాయి.
వైద్యానికి వెళ్లిన మైనర్‌ బాలికపై..
కడుపునొప్పితో వైద్యం తీసుకునేందుకు ఆర్‌ఎంపీ వైద్యుడి వద్దకు వెళ్లగా ఆ వైద్యుడు ఆ బాలిక (Minor Girl)పై అత్యాచారయత్నానికి పాల్పడిన సంఘటన ఖమ్మం జిల్లా నేలకొండపల్లి మండలంలో చోటు చేసుకుంది. నేలకొండపల్లి మండలం అమ్మగూడెం గ్రామానికి చెందిన ఓ మైనర్‌ బాలిక కడుపునొప్పి వస్తుండటంతో తన సోదరుడిని తీసుకుని రాజేశ్వరాపురంలోని ఆర్‌ఎంపీ వైద్యుడు సాంబమూర్తి వద్దకు వెళ్లాడు. వైద్యం పేరుతో ఆర్‌ఎంపీ వైద్యుడు అసభ్యంగా ప్రవర్తిస్తూ ఆమెపై అత్యాచారయత్నానికి పాల్పడటంతో పోలీసులకు ఫిర్యాదు చేశారు. ఫిర్యాదు స్వీకరించిన పోలీసులు ఆర్‌ఎంపీ వైద్యుడిపై పోక్సో చట్టం (Pocso Act) ప్రకారం కేసు నమోదు చేశారు. వైద్యుడిపై కఠిన చర్యలు తీసుకోవాలని బాధిత కుటుంబం కోరుతోంది.
దివ్యాంగురాలిపై లైంగికదాడి..
భద్రాద్రి కొత్తగూడెం జిల్లా పునుకుడుచెలక గ్రామ పంచాయతీ మర్రిగూడెం గ్రామానికి చెందిన ఓ దివ్యాగురాలు ఈ నెల 14వ తేదీన బహిర్భూమికి బయటకు వెళ్లింది. అదే గ్రామానికి చెందిన ఎట్టి కృష్ణ బాలిక ఒంటరిగా బయటకు వెళ్లడాని గమనించి ఆమెపై లైంగిక దాడికి పాల్పడ్డాడు. బాలికకు తీవ్ర రక్తస్రావం జరగడంతో ఏం జరిగిందని తల్లిదండ్రులు ప్రశ్నించారు. దీంతో జరిగిన విషయం తల్లిదండ్రులకు చెప్పింది. ఈ విషయం గ్రామ పెద్దలకు చెప్పగా పరిష్కరిస్తామని చెప్పిన గ్రామ పెద్దలు విషయాన్ని బయటకు రాకుండా చూశారు. అయితే తమకు జరిగిన అన్యాయంపై ఎలాంటి న్యాయం జరగకపోవడంతో బాదితురాలి తల్లిదండ్రులు పోలీసులను ఆశ్రయించారు. లక్ష్మీదేవిపల్లి పోలీసులు కేసు నమోదు చేసుకుని ధర్యాప్తు చేస్తున్నారు.