Chittor Crime: కడుపు నొప్పి అని బాలికను ఆస్పత్రికి తీసుకెళ్లిన తల్లి, గర్భం దాల్చినట్లు వైద్యులు చెప్పడంతో షాక్!

స్కూల్‌కు వెళ్తున్న మైనర్ బాలికకు మాయ మాటలు చెప్పి ఓ యువకుడు కొన్ని నెలలుగా అఘాయిత్యానికి పాల్పడుతున్నాడు. గర్భవతి కావడంతో దారుణ ఘటన ఆలస్యంగా వెలుగు చూసింది.

బాలికపై యువకుడు అఘాయిత్యం ( Image Source : Representational Image/Getty )

చిత్తూరు జిల్లాలో దారుణమైన ఘటన ఆలస్యంగా వెలుగు చూసింది. స్కూల్‌కు వెళ్తున్న మైనర్ బాలికకు మాయ మాటలు చెప్పి ఓ యువకుడు కొన్ని నెలలుగా అఘాయిత్యానికి పాల్పడుతున్నాడు. చివరికి మైనర్ బాలిక ఆరు నెలల గర్భవతి కావడంతో దారుణ ఘటన ఆలస్యంగా వెలుగు చూసింది. బాలిక కడుపు నొప్పి అని తల్లికి చెప్పడంతో ఆసుపత్రికి తీసుకెళ్ళింది. మైనర్ బాలికను పరీక్షించిన వైద్యులు ఆ తల్లికి షాక్‌కు గురి చేసే విషయాన్ని తెలిపారు. ఆ బాలిక గర్భం దాల్చిందని, ఇప్పుడు ఆరు నెలల గర్భం అంటూ వైద్యులు నిర్ధారించడంతో బాలిక తల్లి న్యాయం కోసం పొలీసులను ఆశ్రయించారు.. ఆ వివరాలిలా ఉన్నాయి.

పోలీసుల కథనం ప్రకారం.. చిత్తూరు జిల్లా, సోమల మండలం, నంజంపేట గ్రామానికి చెందిన 13 సంవత్సరాల మైనర్ బాలిక రోజూ‌ యథావిధిగా ప్రక్క గ్రామం అయిన పొదరుగుట్ట పల్లెకు ఒంటరిగా స్కూల్ కి వెళ్లి వస్తోంది. ఈ క్రమంలో పొదరుగుట్ట పల్లె గ్రామానికి చేందిన రాజేష్ (22) అనే యువకుడు మైనర్ బాలికను ఫాలో కావడం మొదలుపెట్టాడు. మైనర్ పై కన్నేసిన రాజేష్ మైనర్ బాలిక స్కూల్ కి వెళ్తూ, తిరిగి ఇంటికి వెళ్తున్న సమయాల్లో కలిసి ఏవో మాయ మాటలు చెప్పేవాడు. బాలిక తనను నమ్మేందుకు చాక్లెట్స్, బిస్కట్స్ ఇచ్చి మచ్చిక చేసుకున్నాడు. తనను పూర్తిగా నమ్ముతుందని భావించిన తరువాత బాలికపై అఘాయిత్యం చేయాలని ప్లాన్ చేశాడు.

రోజూలాగే స్కూల్ నుంచి తిరిగి ఇంటికి వెళ్ళే సమయంలో ఎవరూ చూడని సమయంలో మార్గం మధ్యలో మైనర్ బాలికను నిర్మానుష్య ప్రదేశానికి తీసుకెళ్లి అఘాయిత్యానికి పాల్పడుతూ ఉండేవాడు. ఈ విషయాన్ని ఎవ్వరికీ చెప్పవద్దని బెదిరించడంతో బాలికకు ఏం చేయాలో అర్థమయ్యేది కాదు. ఓవైపు తనపై అఘాయిత్యం చేయడం, మరోవైపు తనకు ఏం జరుగుతుదో తెలియక ఆందోళనకు గురైనా రాజేష్ బెదిరింపులకు భయపడి విషయం ఇంట్లో చెప్పలేదు. ఈ క్రమంలో మైనర్ బాలిక మంగళవారం కడుపు నొప్పి అనడంతో బాలిక తల్లిదండ్రులు స్థానిక ప్రభుత్వాసుపత్రిలో చికిత్సలు చేయించారు.
షాకింగ్ న్యూస్ చెప్పిన వైద్యులు
మైనర్ బాలికను పరిక్షించిన వైద్యులు బాలిక ఆరు నెలల కడుపుతో ఉందని నిర్ధారించారు. దీంతో దిక్కు తోచని స్ధితిలో పడిన మైనర్ బాలిక తల్లితండ్రులు, గర్భం దాల్చడానికి కారకుడైన యువకుడి వివరాలు తెలుసుకుని  సోమల పోలీసులకు ఆశ్రయించారు. మైనర్ బాలిక తల్లిదండ్రుల ఫిర్యాదు మేరకు సోమల పోలీసులు కేసు నమోదు చేసి దర్యాప్తు చేపట్టారు. అయితే విషయం తెలుసుకున్న నిందితుడు రాజేష్ పరారీలో ఉన్నాడు. సోమల పోలీసులు నిందుతుడు రాజేష్ ఆచూకీ కోసం గాలిస్తున్నారు.