Crime News: 'భారతీయుడు - 2' సినిమా చూస్తుండగా కత్తితో పొడిచేశాడు - భయంతో ప్రేక్షకుల పరుగులు

Warangal News: థియేటర్‌లో సినిమా చూస్తుండగానే ఓ యువకునిపై వ్యక్తి కత్తితో దాడికి పాల్పడ్డాడు. ఈ ఘటన వరంగల్ జిల్లా వర్థన్నపేటలో శుక్రవారం సాయంత్రం జరిగింది. నిందితున్ని పోలీసులు అదుపులోకి తీసుకున్నారు.

సినిమా చూస్తుండగా యువకునిపై కత్తితో దాడి

Source : Twitter (X)

Young Man Attacked With Knife While Watching Movie In Warangal: 'భారతీయుడు - 2' సినిమా చూస్తుండగా ఓ వ్యక్తి యువకుడిపై కత్తితో దాడి చేశాడు. ఈ ఘటనతో భయాందోళనకు గురైన ప్రేక్షకులు ఒక్కసారిగా పరుగులు తీశారు. వరంగల్ జిల్లా వర్ధన్నపేటలో ఈ ఘటన జరిగింది. పోలీసులు తెలిపిన వివరాల ప్రకారం.. వరంగల్ (Warangal) జిల్లా వర్థన్నపేటలోని ఓ థియేటర్‌లో కృష్ణ అనే వ్యక్తి విజయ్ అనే యువకున్ని కత్తితో పొడిచాడు. దీంతో ప్రేక్షకులు ఆందోళన చెంది బయటకు పరుగులు తీశారు. తీవ్ర గాయాలైన విజయ్‌ను స్థానికులు ఆస్పత్రికి తరలించారు. సమాచారం అందుకున్న పోలీసులు ఘటనా స్థలానికి చేరుకుని వివరాలు సేకరించారు. నిందితుడిని అదుపులోకి తీసుకున్న పోలీసులు కేసు నమోదు చేసి దర్యాప్తు చేస్తున్నారు.

అదే కారణమా.?

స్థానికులు తెలిపిన వివరాల ప్రకారం.. మహబూబాబాద్ జిల్లా వర్ధన్నపేట మండలం ఇల్లంద గ్రామానికి చెందిన ఊర కృష్ణ, రాజ్ కుమార్‌లు అన్నదమ్ములు. ఇల్లందలో కృష్ణ, రాజ్ కుమార్‌లు వర్ధన్నపేటలో పాత ఇనుప సామాను కొట్టు నడుపుకొంటున్నారు. తొర్రూరు మండలం అమ్మాపురం గ్రామానికి చెందిన కళ్లెం విజయ్ కొన్ని నెలలుగా వర్థన్నపేట మండలం ఇల్లందలో తన బంధువుల ఇంట్లో ఉంటున్నాడు. రాజ్ కుమార్ వద్ద పనికి కుదిరాడు. ఈ క్రమంలో కృష్ణ కూతురితో ప్రేమలో పడ్డాడు. విషయం తెలుసుకున్న కృష్ణ పెద్ద మనుషుల సమక్షంలో పంచాయతీ పెట్టి రూ.50 వేల జరిమానా విధించాడు. అయితే, తన కూతుర్ని ప్రేమించడాన్ని మనసులో పెట్టుకున్న కృష్ణ శుక్రవారం విజయ్‌పై దాడికి పాల్పడ్డాడు. శుక్రవారం ఇరు కుటుంబాలతో పాటు వారి సామాజిక వర్గానికి చెందిన ఇంకొన్ని కుటుంబాలన్నీ కలిసి వనభోజనాల కోసం బయటకు వెళ్లారు. అక్కడ విందు అనంతరం వర్ధన్నపేటలో సినిమాకు వెళ్లారు. 

ఇదే క్రమంలో కృష్ణ కోపంతో తనతో తెచ్చుకున్న కత్తితో ముందు సీట్లో కూర్చున్న విజయ్‌పై దాడికి పాల్పడ్డాడు. కడుపు, వెన్ను భాగంలో బలంగా పొడిచాడు. అడ్డుకోబోయిన మరో యువకుడిపైనా దాడి చేశాడు. అప్పటివరకూ సినిమా చూస్తూ సందడి చేసిన తోటి ప్రేక్షకులు ఈ ఘటనతో ఒక్కసారిగా ఆందోళనకు గురై బయటకు పరుగులు తీశారు. బాధితున్ని స్థానికులు ఆస్పత్రికి తరలించారు. విజయ్‌పై దాడి చేసిన కృష్ణ నేరుగా ఇల్లంద వెళ్లి అక్కడ అతని బంధువులపైనా దాడికి పాల్పడ్డాడు. వారు భయంతో పోలీసులకు సమాచారం అందించగా అక్కడికి చేరుకున్న పోలీసులు నిందితున్ని అదుపులోకి తీసుకున్నారు. కేసు దర్యాప్తు చేస్తున్నారు.

కాగా, ఇటీవలే వరంగల్ జిల్లా తనను ప్రేమించిన అమ్మాయిని దూరం చేశారనే అక్కసుతో ఓ యువకుడు యువతి తల్లిదండ్రులను దారుణంగా హతమార్చాడు. ఆ ఘటన మరువక ముందే మరో హత్యాయత్నం జరగడంతో ఆందోళన నెలకొంది.