Forex Reserves: వావ్‌, $600 బిలియన్ మార్క్‌ దాటిన ఫారెక్స్‌ రిజర్వ్స్‌
విదేశీ మారక నిల్వలు 12.74 బిలియన్ డాలర్లు పెరిగి 609.022 బిలియన్ డాలర్లకు చేరుకున్నాయి.
India Forex Reserves: భారతదేశ విదేశీ మారక నిల్వలు మరోసారి 600 బిలియన్ డాలర్ల మార్క్‌ దాటాయి. వరుసగా మూడో వారం కూడా అప్‌టిక్‌ చూపించాయి. జులై 14, 2023తో ముగిసిన వారంలో ఫారిన్‌ రిజర్వ్స్‌ అమాంతం 12.74 బిలియన్ డాలర్లు పెరిగాయి. ఇది బిగ్గెస్ట్‌ వీక్లీ జంప్‌. జులై 7, 2023తో ముగిసిన వారంలో ఈ నిల్వలు 1.23 బిలియన్ డాలర్లు పెరిగాయి. దీని కంటే ముందు, జూన్ 30, 2023తో ముగిసిన వారంలో ఫారెక్స్‌ కిట్టీ వాల్యూ 1.85 బిలియన్ డాలర్ల మేర పెరిగింది.
రిజర్వ్ బ్యాంక్‌ (RBI) రిలీజ్‌ చేసిన డేటా ప్రకారం, జులై 14తో ముగిసిన వారంలో దేశంలోని విదేశీ మారక నిల్వలు 12.74 బిలియన్ డాలర్లు పెరిగి 609.022 బిలియన్ డాలర్లకు చేరుకున్నాయి. ఇది 15 నెలల గరిష్ట స్థాయి.
డేటా ప్రకారం, విదేశీ కరెన్సీ ఆస్తులు (Foreign Currency Assets) 11.198 బిలియన్ డాలర్ల జంప్‌తో 540.16 బిలియన్ డాలర్లకు పెరిగాయి. ఫారిన్‌ కరెన్సీ అసెట్స్‌ అంటే.. విదేశీ మారక నిల్వల్లో ఉన్న యూరో, పౌండ్, యెన్ వంటి అమెరికాయేతర కరెన్సీ యూనిట్ల విలువలో పెరుగుదల లేదా తరుగుదల విలువ. అమెరికన్‌ డాలర్ల రూపంలో ఈ విలువను చెబుతారు.
దేశంలో బంగారం నిల్వలు
దేశంలో గత కొన్ని వారాలుగా తగ్గుతూ వస్తున్న బంగారం నిల్వలు (Gold reserves In India) కూడా ఈసారి పెరిగాయి. జులై 14, 2023తో ముగిసిన వారంలో గోల్డ్‌ ఛెస్ట్‌ విలువ 1.13 బిలియన్ డాలర్ల గ్రోత్‌ తో 45.19 బిలియన్ డాలర్లకు చేరుకుంది. ఇంటర్నేషనల్‌ మానిటరీ ఫండ్‌ (IMF) వద్ద ఉన్న ఇండియన్‌ రిజర్వ్స్‌ 158 మిలియన్ డాలర్లు పెరిగాయి, 5.17 బిలియన్లను రీచ్‌ అయ్యాయి.
రూపాయి మారకం విలువ
శుక్రవారం (14 జులై 2023), డాలర్‌తో పోలిస్తే రూపాయి విలువ అతి స్వల్పంగా బలపడింది. కరెన్సీ మార్కెట్ ముగిసే సమయానికి, డాలర్‌తో పోలిస్తే రూపాయి 22 పైసలు తగ్గి రూ. 81.95 వద్ద క్లోజ్‌ అయింది. దీనికి ముందు సెషన్‌లో రూ. 81.99 వద్ద ముగిసింది.
ఆల్ టైమ్ హై లెవెల్ ఇది
భారతదేశ విదేశీ మారక నిల్వలు 2021 అక్టోబర్‌ నెలలో అత్యధిక స్థాయికి, 645 బిలియన్ డాలర్లకు చేరుకున్నాయి. ఇది, ఆల్ టైమ్ హై రికార్డ్‌. అప్పటి నుంచి RBI వద్ద విదేశీ మారకద్రవ్య నిల్వలు తగ్గుముఖం పట్టాయి. 2022 సంవత్సరం ప్రారంభంలోనూ, మన దేశ విదేశీ మారక నిల్వలు 633 బిలియన్ డాలర్లుగా ఉన్నాయి. వివిధ ప్రతికూల కారణాల వల్ల విదేశీ పెట్టుబడిదార్లు భారత్‌లోని తమ పెట్టుబడులను భారీగా ఉపసంహరించుకుని డాలర్ల రూపంలో ఆ డబ్బును వెనక్కు తీసుకెళ్లారు. ఈ కారణంగా, విదేశీ మారక నిల్వలు తగ్గుతూ వచ్చాయి, రష్యా - ఉక్రెయిన్ యుద్ధం నుంచి ఉత్పన్నమయిన ప్రపంచ ఉద్రిక్తతలు కూడా మన దేశ ఫారెక్స్‌ రిజర్వ్స్‌పై ప్రభావం చూపాయి. క్రూడ్ ఆయిల్ ధరలు భారీగా పెరిగాయి. ముడి చమురు కొనుగోళ్ల కోసం డాలర్ల రూపంలో ఎక్కువగా వ్యయం చేయాల్సి వచ్చింది. 2022లో US ఫెడ్ రిజర్వ్ వడ్డీ రేట్ల పెంపు ప్రారంభించడంతో విదేశీ పెట్టుబడిదార్లు తమ పెట్టుబడులను వెనక్కు తీసుకోవడం ప్రారంభించారు. దీంతో, రూపాయి విలువలో బలహీనత కనిపించింది. ఆ సమయంలో డాలర్‌తో పోలిస్తే రూపాయి మారకం విలువ 10 శాతం పడిపోయి రూ.83 కనిష్ట స్థాయికి చేరుకుంది. రూపాయికి మద్దతు ఇవ్వడానికి, ఆర్‌బీఐ డాలర్లను విక్రయించాల్సి వచ్చింది. ఈ కారణంగానూ విదేశీ మారక నిల్వలు క్షీణించాయి.
ఏ దేశంలోనైనా, సౌకర్యవంతమైన స్థాయిలో ఉండే విదేశీ మారక నిల్వలు ఆ దేశ ఆర్థిక స్థిరత్వాన్ని పెంచుతాయి. విదేశీ మారక నిల్వల్లో క్షీణతను ఆర్థిక వ్యవస్థపై పడుతున్న ఒత్తిడిగా చూడాలి. నిల్వలు పెరుగుతుంటే, ఆ దేశ ఆర్థిక వ్యవస్థ పునాదులు బలపడుతున్నాయని భావించాలి.
మరో ఆసక్తికర కథనం: కారు నీళ్లలో మునిగితే ఈ పొరపాటు చేయకండి, ఇన్సరెన్స్‌ కవరేజ్‌ రాదు
Join Us on Telegram: https://t.me/abpdesamofficial
టాప్ హెడ్ లైన్స్
ట్రెండింగ్ వార్తలు
