Nykaa Shares Down: ఫ్రీ షేర్లు ఇస్తామన్నా పడుతోంది, మీకు బాగా తెలిసిన కంపెనీయే ఇది

నవంబర్ 26, 2021న తాకిన రికార్డు గరిష్ట స్థాయి రూ.2,574 నుంచి ఇప్పటివరకు ఈ కౌంటర్‌లో 53 శాతం నష్టాలు వచ్చాయి.

ఫ్రీ షేర్లు ఇస్తామన్నా పడుతోంది

Nykaa Shares Down: ఇవాళ (శుక్రవారం) స్టాక్‌ మార్కెట్లు బలంగా, భారీ బౌన్స్‌లో ఉంటే; FSN ఈ-కామర్స్ వెంచర్స్ (Nykaa) షేర్లు మాత్రం రివర్స్‌ గేర్‌ వేశాయి. ఇంట్రా డే ట్రేడ్‌లో 1 శాతం పైగా క్షీణించి, రూ.1,198 వద్ద కొత్త కనిష్ట స్థాయిని తాకాయి. ఇది దీని కొత్త 52-వారాల కనిష్టం.

ఈ స్టాక్ గత ఏడాది నవంబర్‌ 10న లిస్ట్‌ అయింది. అప్పటి నుంచి ఇదే అత్యంత కనిష్ట స్థాయి. వరుసగా నాలుగో రోజు కూడా ఈ కౌంటర్‌ నష్టాల్లో ఉంది. ఈ నాలుగు రోజుల్లోనే 6 శాతం పడిపోయింది. 

ఇవాళ మధ్యాహ్నం 3 గంటల సమయానికి, ఈ స్క్రిప్‌ 1.17 శాతం నష్టంతో రూ.1,200.60 వద్ద ఉంది. అదే సమయానికి S&P BSE సెన్సెక్స్ 1.22 శాతం పెరిగి 57,9345 పాయింట్లకు చేరుకుంది.

నవంబర్ 26, 2021న తాకిన రికార్డు గరిష్ట స్థాయి రూ.2,574 నుంచి ఇప్పటివరకు ఈ కౌంటర్‌లో 53 శాతం నష్టాలు వచ్చాయి. ప్రస్తుతం, షేరు ఇష్యూ ధర రూ.1,125 కంటే కేవలం 7 శాతం పైన ట్రేడవుతోంది.

గత మూడు నెలల్లో, S&P BSE సెన్సెక్స్‌లో 9 శాతం పెరుగుదలతో పోలిస్తే, నైకా 15 శాతం పడిపోయి అండర్‌పెర్ఫార్మ్‌ చేసింది. గత ఆరు నెలల కాలంలో 34 శాతం, ఈ ఏడాదిలో ఇప్పటివరకు (YTD) 42 శాతం నష్టపోయింది.

ఫ్రీ షేర్లు ఇస్తామన్నా పడుతోంది
ఈ కంపెనీ మొదటి బోనస్ ఇష్యూ ప్రకటనే తుస్సుమంది. పెట్టుబడిదారులు పెద్దగా ఇంట్రెస్ట్‌ చూపలేదు. 5:1 నిష్పత్తిలో బోనస్‌ షేర్ల జారీకి ఈ నెల 3న కంపెనీ బోర్డు ఆమోదం తెలిపింది. అంటే, కంపెనీలో ఉన్న ప్రతి ఒక్క షేరుకు ఐదు బోనస్ షేర్లు ఇస్తుందట. అయితే, అప్పటి నుంచి ఈ స్టాక్ దాదాపు 8 శాతం క్షీణించింది. 

బిజినెస్‌ 
నైకా బ్రాండ్‌ పేరిట బిజినెస్‌ చేసే FSN E-కామర్స్ వెంచర్స్, ఒక కన్జ్యూమర్‌ టెక్నాలజీ ఫ్లాట్‌ఫాం. అందం, వ్యక్తిగత సంరక్షణ & ఫ్యాషన్ ఉత్పత్తులను అమ్ముతుంది. సొంత బ్రాండ్ ప్రొడక్ట్స్‌ సహా వివిధ ప్రముఖ కంపెనీల ఉత్పత్తులను కూడా తన ఫ్లాట్‌ఫాం ద్వారా విక్రయిస్తుంది.

ద్రవ్యోల్బణం వల్ల వినియోగదారులు చేసే ఖర్చులు తగ్గాయని, స్వల్పకాలంలో తమ వ్యాపారం ప్రభావం పడిందని, మధ్యకాలిక & దీర్ఘకాలిక వృద్ధి మాత్రం బలంగానే ఉందని కంపెనీ తెలిపింది.

పెద్ద సంఖ్యలో ఉన్న రిపీట్‌ కస్టమర్లు లేదా రిపీట్‌ యూసేజ్‌ బేస్‌ ఈ కంపెనీ బలంగా బ్రోకింగ్‌ హౌస్‌ ఎలారా క్యాపిటల్‌ (Elara Capital) విశ్లేషించింది. ఈ బలం కారణంగా ఆన్‌లైన్ BPCలో 26.8 శాతం మార్కెట్ వాటాతో ఆధిపత్యాన్ని  కొనసాగించవచ్చని చెబుతోంది. దేశంలోని టైర్-2, టైర్-3 నగరాల్లోకి నైకా బలంగా చొచ్చుకుపోతున్నందున కంపెనీ వృద్ధి మీడియంటర్న్‌లోనూ కొనసాగుతుందని ఎలారా క్యాపిటల్‌ ఎనలిస్ట్‌లు భావిస్తున్నారు.

Disclaimer: ఈ వార్త కేవలం సమాచారం కోసం మాత్రమే. మ్యూచువల్‌ ఫండ్లు, స్టాక్‌ మార్కెట్‌, క్రిప్టో కరెన్సీ, షేర్లు, ఫారెక్స్‌, కమొడిటీల్లో పెట్టే పెట్టుబడులు ఒడుదొడుకులకు లోనవుతుంటాయి. మార్కెట్‌ పరిస్థితులను బట్టి ఆయా పెట్టుబడి సాధనాల్లో రాబడి మారుతుంటుంది. ఫలానా మ్యూచువల్‌ ఫండ్‌, స్టాక్‌, క్రిప్టో కరెన్సీలో పెట్టుబడి పెట్టాలని లేదా ఉపసంహరించుకోవాలని 'ఏబీపీ దేశం' చెప్పడం లేదు. పెట్టుబడి పెట్టే ముందు, లేదా ఉపసంహరించుకునే ముందు అన్ని వివరాలు పరిశీలించడం ముఖ్యం. అవసరమైతే సర్టిఫైడ్‌ ఫైనాన్షియల్‌ అడ్వైజర్ల నుంచి సలహా తీసుకోవడం మంచిది.