Digital Payment Incentive: ఈ డెబిట్‌ కార్డుతో చెల్లింపులు చేస్తే రూ.1300 కోట్ల బహుమతులు.. కేబినెట్‌ ఆమోదం!

డిజిటల్‌ చెల్లింపులపై ప్రోత్సాహకాలు, ప్రధాన మంత్రి కృషి సించాయి యోజన, సెమీ కండక్టర్ల తయారీకి ప్రోత్సాహకాలు ప్రకటించింది. కేబినెట్‌ ఆమోదించిన నిర్ణయాలను మంత్రులు వెల్లడించారు.

డిజిటల్‌ చెల్లింపులు

కేంద్ర కేబినెట్‌ బుధవారం కొన్ని కీలక నిర్ణయాలు తీసుకొంది. డిజిటల్‌ చెల్లింపులపై ప్రోత్సాహకాలు, ప్రధాన మంత్రి కృషి సించాయి యోజన, సెమీ కండక్టర్ల తయారీకి ప్రోత్సాహకాలు ప్రకటించింది. కేబినెట్‌ ఆమోదించిన నిర్ణయాలను కేంద్ర సమాచార, ప్రసార శాఖా మంత్రి అనురాగ్‌ ఠాకూర్‌ వెల్లడించారు.

'రూపే డెబిట్‌ కార్డు, భీమ్‌ యూపీఐ ద్వారా డిజిటల్‌ చెల్లింపులను పెంచేందుకు ప్రోత్సాహకాలు ఇచ్చేందుకు ప్రభుత్వం ఆమోదం తెలిపింది. ఇందుకోసం రూ.1300 కోట్లను ఖర్చు చేయనున్నాం' అని మంత్రి అనురాగ్‌ తెలిపారు. రైతుల కోసం 2021-2026 మధ్య కాలానికి ప్రధానమంత్రి కృషి సించాయి యోజన పథకానికి ప్రభుత్వం ఆమోదించింది. ఈ పథకంతో దేశవ్యాప్తంగా 22 లక్షల రైతులకు ప్రయోజనం కలగనుందని వ్యవసాయ శాఖ మంత్రి గజేంద్ర సింగ్‌ షెకావత్‌ అన్నారు. దేశంలోని వనరులను మెరుగ్గా ఉపయోగించుకొని ఉత్పత్తిని పెంచడమే దీని ముఖ్యోద్దేశమని వెల్లడించారు.

సెమీ కండక్టర్ల కొరతను అధిగమించేందుకు ప్రభుత్వం ఓ ప్రణాళికను సిద్ధం చేసింది. దేశంలోనే చిప్‌ల తయారీ చేపట్టేందుకు అనువైన వాతావరణం కల్పించనుంది. ఇందుకోసం ఆరేళ్లకు గాను రూ.76,000 కోట్లను ఖర్చు చేయనుంది. ఉత్పత్తి ఆధారిత ప్రోత్సాహకాల్లో భాగంగా దీనిని చేపట్టనుంది.

'ఈ రోజు మనం 75 బిలియన్‌ డాలర్ల ఎలక్ట్రానిక్స్‌ తయారీకి చేరుకున్నాం. ఈ వేగంతో రాబోయే ఆరేళ్లలో భారత్‌ 300 బిలియన్‌ డాలర్ల విలువైన ఎలక్ట్రానిక్స్‌ తయారీకి చేరుకోనుంది. ప్రపంచంలోని సెమీ కండక్టర్ల తయారీ పరిశ్రమలో పనిచేస్తున్న ఇంజినీర్లలో 20 శాతం మంది భారతీయులే. అందుకే 85వేల మంది క్వాలిఫైడ్‌ ఇంజినీర్ల కోసం చిప్స్‌ టు స్టార్టప్‌ ప్రోగ్రామ్‌ను రూపొందించేందుకు కేబినెట్‌ నిర్ణయించింది' అని ఐటీ శాఖా మంత్రి అశ్విని వైష్ణవ్‌ తెలిపారు.

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి