మొబైల్ సిమ్ పోర్టింగ్ తరహాలో FASTagకూ పోర్టింగ్.. స్టిక్కర్ మార్చకుండానే బ్యాంక్‌ను ఎలా మార్చుకోవాలంటే?
FASTag బ్యాంక్‌ను మార్చుకునే అవకాశం వచ్చింది. OneTag ద్వారా అదే స్టిక్కర్, FASTag ID & వాహన నంబర్‌తో మరో బ్యాంక్‌కు మారవచ్చు.
FASTag OneTag Guide Telugu: ఫాస్టాగ్ యాజర్ల సౌలభ్యం కోసం కేంద్ర ప్రభుత్వం కీలక మార్పు తీసుకొచ్చింది. ఇకపై, FASTag బ్యాంక్ సేవలు మీకు నచ్చకపోతే ఆ సర్వీస్‌ను మరో బ్యాంక్‌కు మార్చుకోవచ్చు. ఇందుకోసం వాహనంపై ఉన్న FASTag స్టిక్కర్‌ను తొలగించాల్సిన అవసరం లేదు, కొత్త స్టిక్కర్ తీసుకోవాల్సిన పనీ ఉండదు. ఇదంతా OneTag పోర్టబిలిటీ విధానంతో సాధ్యం కానుంది.
మొబైల్ వినియోగదారులు తమ ఫోన్ నంబర్ మార్చుకోకుండా నెట్‌వర్క్‌ను మార్చుకున్నట్లే.. FASTag వినియోగదారులు కూడా అదే స్టిక్కర్‌తో బ్యాంక్‌ను మార్చుకోవచ్చు. FASTag ID, వాహన రిజిస్ట్రేషన్ నంబర్ కూడా మారవు. వన్‌ట్యాగ్‌ (OneTag) పేరుతో దీనిని కేంద్ర రోడ్డు రవాణా శాఖ మంత్రి నితిన్ గడ్కరీ గ్లోబల్ ఫిన్‌టెక్ ఫెస్ట్ 2026లో ముంబైలో ప్రారంభించారు. ఈ విధానాన్ని ఇండియన్ హైవేస్ మేనేజ్‌మెంట్ కంపెనీ లిమిటెడ్ & NPCI కలిసి అభివృద్ధి చేశాయి. FASTag జారీ చేసే బ్యాంక్‌ను సులభంగా మార్చుకోవడం ఈ విధానం ప్రధాన ఉద్దేశం.
బ్యాంక్‌ను ఎలా మార్చుకోవాలి?
FASTag బ్యాంక్‌ను మార్చుకోవాలంటే ముందుగా NHAIకి చెందిన "రాజ్‌మార్గ్‌యాత్ర" (Rajmarg Yatra) మొబైల్ యాప్‌ను డౌన్‌లోడ్‌ చేసుకోవాలి. అందులో OneTag పోర్టబిలిటీ సదుపాయాన్ని ఎంచుకోవాలి. ఇప్పటికే ఉన్న FASTag వివరాలు & వాహన వివరాలను నమోదు చేయాలి. ఆ తర్వాత ఆ FASTag పోర్టింగ్‌కు అర్హత ఉందో లేదో పరిశీలించాలి.
అర్హత నిర్ధారణ అయిన తర్వాత ప్రస్తుత బ్యాంక్ నుంచి FASTagను మరో బ్యాంక్‌కు మార్చేందుకు వినియోగదారు సమ్మతి ఇవ్వాలి. అనంతరం OneTagలో భాగమైన బ్యాంకుల జాబితా నుంచి తమకు నచ్చిన బ్యాంక్‌ను ఎంచుకోవచ్చు.
మీరు ఎంచుకున్న కొత్త బ్యాంక్ అవసరమైన ధ్రువీకరణ ప్రక్రియను పూర్తి చేస్తుంది. కస్టమర్ ధ్రువీకరణ పూర్తయిన తర్వాత FASTag నిర్వహణ కొత్త బ్యాంక్‌కు మారుతుంది.
ఇది కూడా చదవండి: 2026 మారుతి బలెనోలో ఏం మారింది? ఇంజిన్ పవర్, మైలేజ్‌, ఫీచర్లు పెరిగాయా, తగ్గాయా?
స్టిక్కర్‌కు ఏమవుతుంది?
ఇక్కడే OneTag విధానం ప్రత్యేకత ఉంది. బ్యాంక్ మారినా వాహనంపై ఉన్న పాత RFID స్టిక్కర్ అలాగే ఉంటుంది. దాన్ని తొలగించాల్సిన అవసరం లేదు. కొత్త స్టిక్కర్‌ను అతికించాల్సిన అవసరం కూడా ఉండదు. FASTag ID & వాహన రిజిస్ట్రేషన్ నంబర్ కూడా అలాగే కొనసాగుతాయి. కొత్త బ్యాంక్ వివరాలను NPCI, NETC నెట్‌వర్క్‌లో అప్‌డేట్ చేస్తుంది. ఆ తర్వాత టోల్ ప్లాజాల వద్ద FASTag ద్వారా చెల్లింపులు సాధారణంగానే జరుగుతాయి.
పాత బ్యాంక్ ఖాతా సంగతేంటి?
పోర్టింగ్ పూర్తయిన వెంటనే పాత బ్యాంక్‌కు సంబంధించిన అన్ని అంశాలు పూర్తిగా ముగిసిపోవు. గత లావాదేవీలు, పెండింగ్ మొత్తాలు, రీఫండ్‌లు & సెక్యూరిటీ డిపాజిట్‌కు సంబంధించిన వ్యవహారాలను పాత బ్యాంకే పరిష్కరించాల్సి ఉంటుంది. FASTag నిర్వహణ మాత్రం కొత్త బ్యాంక్ చేతికి వెళ్తుంది. ఈ మార్పుతో FASTag వినియోగదారులకు బ్యాంక్ ఎంపికలో మరింత స్వేచ్ఛ లభించనుంది. బ్యాంక్ సేవలు నచ్చకపోయినా, కస్టమర్ సేవల్లో ఇబ్బందులు ఉన్నా స్టిక్కర్ మార్చే తంటా లేకుండా మరో బ్యాంక్‌కు మారవచ్చు.
ప్రస్తుతం దేశంలో FASTag వినియోగం 98 శాతానికి మించి ఉందని కేంద్రం చెబుతోంది. సుమారు 13 కోట్ల FASTagలు జారీ కాగా, దాదాపు 6 కోట్ల ట్యాగ్‌లు క్రియాశీలంగా ఉన్నట్లు సమాచారం.
ఇది కూడా చదవండి: నెలకు కేవలం రూ.10 వేలతో ఎలక్ట్రిక్‌ కారు సొంతం - పెట్రోల్ భారం నుండి విముక్తి పొందే ఐడియా
ఇంకా ఇలాంటి ఆటోమొబైల్‌ వార్తలు & అప్డేట్స్ కోసం "ABP దేశం" 'ఆటో' సెక్షన్‌ని ఫాలో అవ్వండి.
టాప్ హెడ్ లైన్స్
ట్రెండింగ్ వార్తలు
