కొత్త కలర్‌ థీమ్‌తో మార్కెట్‌లోకి దిగిన TVS Ronin Agonda Edition - ధర ₹1.31 లక్షలే
గోవా అగొండా బీచ్‌ నుంచి ప్రేరణ పొందిన TVS Ronin Agonda Edition లాంచ్‌ అయింది. కొత్త వైట్‌-బ్లూ-రెడ్‌ కలర్‌ స్కీమ్‌తో వచ్చిన ఈ లిమిటెడ్ ఎడిషన్ ధర ₹1.31 లక్షలు (ఎక్స్‌-షోరూమ్‌).
TVS Ronin Agonda Edition Specs: టీవీఎస్‌ కంపెనీ, తాజాగా, గోవా అగొండా బీచ్‌ స్పూర్తితో రూపొందించిన కొత్త లిమిటెడ్ ఎడిషన్ బైక్‌ను మార్కెట్‌లోకి తీసుకొచ్చింది. ఆ బీచ్‌ పేరే దీనికి కూడా అదే పెట్టింది - TVS Ronin Agonda Edition. ఈ ఎడిషన్ TVS MotoSoul 2025 ఈవెంట్‌లో ప్రత్యేక ఆకర్షణగా నిలిచింది. Ronin ప్లాట్‌ఫామ్‌పై ఆధారపడి తయారైన మొదటి లిమిటెడ్ ఎడిషన్ ఇదే కావడం కూడా ఆసక్తికర అంశం.
ధర
ముందుగా ధర విషయానికి వస్తే, ఈ ప్రత్యేక ఎడిషన్ ₹1.31 లక్షల ఎక్స్‌-షోరూమ్‌ వద్ద లభిస్తుంది. ఇది బేస్‌ Ronin కంటే ₹5,000 మాత్రమే ఎక్కువ. ప్రస్తుతం హైదరాబాద్‌, విజయవాడ వంటి నగరాల్లో కూడా ఈ మోడల్‌ ఈ నెలాఖరుకు షోరూమ్‌లకు చేరుకోనుంది.
కొత్త కలర్‌ స్కీమ్‌ ప్రధాన ఆకర్షణ
Ronin Agonda Editionలో ముఖ్యంగా చూపులు ఆకర్షించేది దాని పెయింట్‌ థీమ్‌. ఇందులో వైట్‌ బేస్‌పై క్లాసిక్‌ బ్లూ, రెడ్‌ పిన్ స్ట్రైప్స్‌ ట్యాంక్‌పై షార్ప్‌గా కనిపిస్తాయి. ట్యాంక్‌ మీద ఉన్న ప్రత్యేక Agonda బ్యాడ్జ్‌ దీనికి అదనపు అందాన్ని జత చేస్తుంది. అదనంగా కొత్త డిజైన్‌తో సీటు కవర్‌ కూడా ఈ ఎడిషన్‌కు ప్రత్యేకతను తీసుకొచ్చింది.
ఈ కలర్‌ కాంబినేషన్‌ యువత, టూరింగ్‌ రైడర్స్‌ ఇద్దరికీ ఆకర్షణీయంగా అనిపించేలా ఉంది. గోవా అగొండా బీచ్‌ నిశ్శబ్దాన్ని, అక్కడి ప్యూర్‌ ఎస్తేటిక్‌ను మోటార్‌సైకిల్‌లో ప్రతిబింబించాలని TVS చేసిన ప్రయత్నం బైక్‌ని చూస్తూనే తెలుస్తుంది.
ఇంజిన్‌, పనితీరు - ఇప్పటికే నిరూపించుకున్న అదే శక్తి
డిజైన్‌లో కొత్తదనం ఉన్నా, ఇంజిన్‌ భాగం మాత్రం బేస్‌ Ronin లాగే ఉంటుంది. ఇందులో
225.9cc సింగిల్‌-సిలిండర్‌, ఆయిల్‌-కూల్‌డ్‌ ఇంజిన్‌
20.4hp శక్తి @ 7,750rpm
19.9Nm టార్క్ @ 3,750rpm
5-స్పీడ్‌ గేర్‌బాక్స్‌
స్లిప్పర్‌ & అసిస్ట్‌ క్లచ్‌
లాంటివన్నీ లభిస్తాయి. పట్టణ రైడింగ్‌కైనా, వీకెండ్‌ రైడ్‌లకైనా సరిపోయే శక్తిమంతమైన ఇంజిన్‌ సెటప్‌ ఇది.
ఫీచర్లు - బేస్‌ వెర్షన్‌ ఆధారంగా
Agonda Edition బేస్‌ Roninపై ఆధారపడి ఉండటంతో, ఇందులో సింగిల్‌-ఛానల్‌ ABS, బ్లూటూత్‌ కనెక్టివిటీతో వచ్చిన LCD కన్సోల్‌ లాంటి ఆప్షన్లు మాత్రమే లభిస్తాయి. అయితే డ్యూయల్‌-ఛానల్‌ ABS, అడ్జస్టబుల్‌ లీవర్స్‌, గోల్డెన్‌ USD ఫోర్క్‌ వంటి ఫీచర్లు మాత్రం ఈ ఎడిషన్‌లో లేవు. అంటే... ఇది ఫీచర్ల కంటే స్టైల్‌ & ఎక్స్‌క్లూజివిటీని ప్రధానంగా చూపించే ఎడిషన్ అని అర్థం.
ఎవరికి బాగా సరిపోతుంది?
స్టైల్‌కి ప్రాధాన్యత ఇచ్చే యువ రైడర్స్‌కి, అందరూ కళ్లప్పగించి చూసేలా తమ బైక్‌ ఉండాలని కోరుకునే వాళ్లకు TVS Ronin Agonda Edition బాగా నప్పుతుంది. పెర్ఫార్మెన్స్‌ విషయంలో Ronin ప్లాట్‌ఫామ్‌ ఇప్పటికే తన సత్తా నిరూపించుకుంది. అందుకే ప్రత్యేక లుక్స్‌ కావాలనుకునే వారికి ఇది మంచి ఎంపిక.
తెలుగు రాష్ట్రాల్లో దీని స్థానమేంటి?
ఆంధ్రప్రదేశ్‌ & తెలంగాణ మార్కెట్లలో Ronin సిరీస్‌కు మంచి ఫాలోయింగ్‌ ఉంది. కొత్త Agonda Edition ఈ సిరీస్‌కి ఒక ప్రత్యేకతను జోడిస్తుంది. ముఖ్యంగా హైదరాబాద్‌, వరంగల్‌, విజయవాడ, విశాఖ వంటి నగరాల్లోని యువత ఈ కలర్‌ స్కీమ్‌ను బాగా ఇష్టపడే అవకాశాలు ఉన్నాయి.
కొత్త TVS Ronin Agonda Edition పెద్ద ఫీచర్‌ అప్‌డేట్‌లు లేకపోయినా, లుక్‌, ఫీలింగ్‌, స్టైల్‌ విషయంలో మాత్రం పూర్తిగా ప్రత్యేకమైన మోటార్‌సైకిల్‌. Ronin సిరీస్‌ని కొంచెం డిఫరెంట్‌గా ఆస్వాదించాలనుకునేవాళ్లకు ఇది సరైన ఆప్షన్‌.
ఇంకా ఇలాంటి ఆటోమొబైల్‌ వార్తలు & అప్‌డేట్స్‌ - "ABP దేశం" 'ఆటో' సెక్షన్‌ని ఫాలో అవ్వండి.
టాప్ హెడ్ లైన్స్
ట్రెండింగ్ వార్తలు
