Tubeless Tyre: పంక్చర్ అయిన తర్వాత ఎంత దూరం వెళ్లవచ్చు ? ట్యూబ్‌లెస్ టైర్లు ఎలా పనిచేస్తాయి
Car Care Tips: ట్యూబ్‌లెస్ టైర్లలో మేకు గుచ్చుకున్నా లొపలి రబ్బర్ గాలిని బంధించడం వల్ల గాలి వెంటనే బయటకు పోదు. చిన్న పంక్చర్ అయినప్పుడు వాహనాన్ని కొంతదూరం వరకు నడపవచ్చు.
ప్రస్తుతం వాహనాల్లో కొత్త టెక్నాలజీతో వాహనదారులకు కొన్ని సమస్యలు తగ్గుతున్నాయి. టైర్లు కూడా గతంలో కంటే చాలా మెరుగయ్యాయి. అప్పట్లో టైర్ పంచర్ అయినప్పుడు మీ కారు, బైక్ వెంటనే ఆగిపోయేది. తరువాత స్టెపనీ మార్చాల్సి వచ్చేది. అందుకోసం చాలా శ్రమించాలి. కానీ ఇప్పుడు ట్యూబ్‌లెస్ టైర్లు ఈ ఇబ్బందిని చాలా వరకు తగ్గించేశాయి. ఈ టైర్లు పంక్చర్ అయిన తర్వాత కూడా కొంత దూరం వరకు వెళ్లవచ్చు. దీనివల్ల కారు నడిపేవారికి టైర్ మార్చాలన్న టెన్షన్ కాస్త తగ్గుతుంది.
ట్యూబ్‌లెస్ టైర్లలో గాలి వెంటనే ఎందుకు పోదు?
ట్యూబ్‌లెస్ టైర్ లోపల విడిగా ట్యూబ్ అంటూ ఉండదు. దీని లోపల గాలి బయటకు పోకుండా అడ్డుకునే ఒక స్పెషల్ లేయర్ ఉంటుంది. అలాగే ఈ టైర్ రిమ్ (Rim) కు గట్టిగా అతుక్కుని ఉండటం వల్ల గాలి బయటకు రాదు. ఇందులో ఏదైనా మేకు లేదా వస్తువు గుచ్చుకున్నప్పుడు, అది అక్కడే ఇరుక్కుపోయి ఉండటం వల్ల గాలి నెమ్మదిగా బయటకు వెళ్తుంది. ఇదే కారణంతో ట్యూబ్‌లెస్ టైర్ పంక్చర్ అయినా వెంటనే మీ కారు ఆగిపోదు.
పంక్చర్ అయిన తర్వాత ఎంత దూరం వరకు వెళ్లొచ్చు ?
ట్యూబ్‌లెస్ టైర్‌కు చిన్న మేకు గుచ్చుకుని, అది బయటకు రాకుండా ఉంటే, వాహనాన్ని నెమ్మదిగా 50 నుండి 100 కిలోమీటర్ల వరకు నడిపేందుకు అవకాశం ఉంది. ఈ సమయంలో గాలి చాలా నెమ్మదిగా బయటకు పోతుంది. దాంతో మీకు దగ్గరలోని ఏదైనా పంచర్ షాపునకు చేరుకోవడానికి సమయం దొరుకుతుంది. కానీ ఒకవేళ టైర్‌కు పెద్ద Cut పడినా లేదా గాలి చాలా వేగంగా బయటకు పోతున్నా వాహనాన్ని నడపడం సరికాదు. అటువంటప్పుడు వెంటనే మీ వెహికల్ ఆపివేయడం మంచిది. లేకపోతే టైర్, రిమ్ రెండూ పాడయ్యే అవకాశం ఉంటుంది.
ట్యూబ్‌లెస్ టైర్ల వల్ల ప్రయోజనాలు
ట్యూబ్‌లెస్ టైర్ల వల్ల కలిగేపెద్ద ప్రయోజనం ఏంటంటే, ఇందులో గాలి చాలా నెమ్మదిగా బయటకు పోతుంది. దీనివల్ల వాహనంపై నియంత్రణ కోల్పోకుండా ఉండవచ్చు. ఈ టైర్లు బరువు తక్కువగా ఉంటాయి. దీనివల్ల వాహనంపై ఎక్కువ భారం పడదు. మైలేజ్ కూడా కొంత మెరుగ్గా ఉంటుంది. ఇవి ఎక్కువ వేడి ఉత్పత్తి చేయవు. కనుక ఎక్కువ కాలం మన్నిక ఉంటుంది. చిన్న చిన్న పంక్చర్లను టైర్ విప్పకుండానే సులభంగా రిపేర్ చేయవచ్చు. అందుకే ప్రస్తుతం చాలా వాహనాల్లో ట్యూబ్‌లెస్ టైర్లు వినియోగించడం వైపు మొగ్గు చూపుతున్నారు.
టాప్ హెడ్ లైన్స్
ట్రెండింగ్ వార్తలు
