Renault Kiger Facelift vs Old Model: రెనాల్ట్ కిగర్ ఫేస్లిఫ్ట్ - పాత మోడల్ కంటే బాగుందా, కొత్తగా వచ్చిన ఫీచర్లేంటి?
Renault Kiger Facelift 2025: కొత్త రెనాల్ట్ కిగర్ ఫేస్లిఫ్ట్ ఇంటీరియర్ గతంలో కంటే స్మార్ట్‌గా మారింది. పాత మోడల్ & కొత్త మోడల్ డిజైన్, ఇంటీరియర్ & ఫీచర్లలో గట్టి మార్పులు జరిగాయి.
Renault Kiger Facelift Features Comparison: కొత్త రెనాల్ట్ కిగర్ ఫేస్‌లిఫ్ట్‌ను చూస్తే, మన దృష్టిని ఆకర్షించే మొదటి విషయం దాని ఫ్రంట్ డిజైన్. ఇప్పుడు, ఫేస్లిఫ్ట్ వెర్షన్‌కు కొత్త ఫ్రంట్ బంపర్, కంపెనీ కొత్త లోగోతో నయా గ్రిల్ & సిల్వర్ స్కిడ్ ప్లేట్ ఉన్నాయి. ఫాగ్ ల్యాంప్‌లు కారు దిగువ భాగంలో ఉన్నాయి, పైభాగంలో సన్నని DRLs (డేటైమ్ రన్నింగ్ లైట్లు) & మధ్యలో LED హెడ్‌ల్యాంప్‌లు ఉన్నాయి. గ్రిల్ పైభాగంలో DRLతో కూడిన బ్లాక్ కలర్ ట్రిమ్ ఉంది, ఇది మునుపటి కంటే మోడ్రన్‌గా కనిపిస్తోంది.
సైడ్ ప్రొఫైల్ ఎలా ఉంది?
పక్క నుండి చూస్తే, కిగర్ ఫేస్లిఫ్ట్ మరింత స్పోర్టీగా & ప్రీమియంగా కనిపిస్తుంది. దీనికి డ్యూయల్-టోన్ డిజైన్, ఫంక్షనల్ రూఫ్ రెయిల్స్ & కొత్త 16-అంగుళాల డైమండ్-కట్ అల్లాయ్ వీల్స్ ఉన్నాయి. స్పోర్టీ టచ్ కోసం ఎరుపు బ్రేక్ కాలిపర్లు, బ్లాక్ డోర్ హ్యాండిల్స్ & మిర్రర్లు ఇచ్చారు. ఇవి ఈ కారుకు యంగ్ & డైనమిక్ లుక్స్‌ ఆపాదించాయి.
రియర్‌ డిజైన్‌లో మార్పులు
నిజానికి, రెనాల్ట్ కిగర్ ఫేస్లిఫ్ట్ వెనుక భాగంలో పెద్దగా మార్పులు చేయలేదు. అయితే, ఇప్పుడు దీనికి C-ఆకారపు LED టెయిల్-ల్యాంప్‌తో స్మోక్డ్ ఫినిషింగ్ వచ్చింది. దీనితో పాటు, కొత్త స్కిడ్ ప్లేట్ & కొత్త కిగర్ బ్యాడ్జ్ జోడించారు, ఇది ఈ కారుకు స్టైలిష్‌గా కనిపిస్తోంది.
కొత్త ఫీచర్లు మునుపటి కంటే మరింత ఆధునికం
కొత్త రెనాల్ట్ కిగర్ ఫేస్లిఫ్ట్ ఇంటీరియర్ గతంలో కంటే మరింత ప్రీమియం & హైటెక్‌గా మారింది. దీని అతి పెద్ద మార్పు కలర్ థీమ్‌లో కనిపిస్తుంది, గతంలో బ్లాక్ థీమ్ మాత్రమే ఇచ్చారు, ఇప్పుడు దానిలో తెల్లటి డ్యూయల్-టోన్ ఇంటీరియర్ ఉపయోగించారు. ఎయిర్ కండిషనింగ్ కోసం రోటరీ కంట్రోల్స్, పైభాగంలో 8-అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్, కొత్త స్టీరింగ్ వీల్ & అప్‌డేటెడ్‌ రెనాల్ట్ లోగో ఉన్నాయి. సీట్లపై సెమీ-లెదరింగ్‌ అందుబాటులోకి తెచ్చారు. వీటన్నింటి కారణంగా క్యాబిన్ మునుపటి కంటే ఎక్కువ ఖరీదైన & సౌకర్యవంతమైన కారు అనే ఫీల్‌ వస్తుంది.
కొత్త రెనాల్ట్ కిగర్ ఫేస్లిఫ్ట్ గతంలో కంటే స్మార్ట్‌ & సేఫ్టీ ఫీచర్లు యాడ్‌ అయ్యాయి. 360-డిగ్రీల కెమెరా, వెంటిలేటెడ్ సీట్లు, 6-స్పీకర్ అర్కామిస్ సౌండ్ సిస్టమ్, డిజిటల్ క్లస్టర్, వైర్‌లెస్ ఛార్జింగ్ & స్టాండర్డ్ 6 ఎయిర్‌బ్యాగ్‌లు వంటి ఫీచర్లు ఉన్నాయి. ఈ అప్‌డేట్స్‌తో, ఈ SUV, తన విభాగంలో మరింత శక్తిమంతమైన, అధునాతనమైన & సురక్షితమైన కారుగా మారింది.
పవర్‌ట్రెయిన్
కొత్త కిగర్ ఫేస్‌లిఫ్ట్‌లోని ఇంజిన్ ఎంపికలు మారలేదు, పాత మోడల్ మాదిరిగానే ఉంచారు. ఈ కారు AMT & మాన్యువల్ గేర్‌బాక్స్‌ ఆప్షన్స్‌తో, 1.0L నేచురల్లీ ఆస్పిరేటెడ్ పెట్రోల్ ఇంజిన్‌తో అందుబాటులో ఉంది.
టాప్ హెడ్ లైన్స్
ట్రెండింగ్ వార్తలు
