NHAI Shares Important Driving Tips: ఎండల్లో సేఫ్ డ్రైవింగ్ టిప్స్ - సమ్మర్ గ్లేర్ నుండి తప్పించుకోవడానికి ఎన్ హెచ్ఏఐ కీలక సూచనలు

వేసవి కాలంలో తీవ్రమైన ఎండలు ఇంకా రోడ్డుపై వచ్చే సన్ గ్లేర్ నుండి వాహనదారులు తమను తాము ఎలా రక్షించుకోవాలో ఎన్హెచ్ఏఐ సోషల్ మీడియా ద్వారా వివరించింది.

ఎన్ హెచ్ఏఐ సూచనలు

Source : freepik

NHAI Shares Important Driving Tips to Deal With Summer Glare : దేశవ్యాప్తంగా ఉన్న జాతీయ రహదారులను సురక్షితంగా, నమ్మకంగా ఉంచేందుకు నేషనల్ హైవేస్ అథారిటీ ఆఫ్ ఇండియా (NHAI) నిరంతరం కృషి చేస్తోంది. ఇందులో భాగంగానే రోడ్లపై వెళ్లే డ్రైవర్లు, రైడర్ల కోసం ఎప్పటికప్పుడు ఉపయోగకరమైన డ్రైవింగ్ టిప్స్‌ను షేర్ చేస్తూ ఉంటుంది. ప్రస్తుతం దేశంలో ఎండ తీవ్రత చాలా ఎక్కువగా ఉంది, ఉష్ణోగ్రతలు కూడా రోజురోజుకూ పెరిగిపోతున్నాయి. ఇలాంటి టైమ్ లో సుదీర్ఘమైన తారు రోడ్లపై ప్రయాణించేటప్పుడు సమ్మర్ గ్లేర్ , విపరీతమైన వేడిని తట్టుకోవడం వాహనదారులకు పెద్ద సవాలుగా మారుతోంది. దీనిపై ప్రత్యేక శ్రద్ధ తీసుకున్న ఎన్ హెచ్ఏఐ, తన అఫీషియల్ సోషల్ మీడియా అకౌంట్ ఎక్స్ (ట్విట్టర్) ద్వారా కొన్ని ముఖ్యమైన సమ్మర్ డ్రైవింగ్ టిప్స్ పంచుకుంది. ఆ వివరాలు ఇప్పుడు చూద్దాం.

సన్ గ్లాసెస్ వాడకం చాలా ముఖ్యం..

ఎండలో ప్రయాణించేటప్పుడు సన్ గ్లాసెస్ (Sunglasses) పెట్టుకోవడం అనేది చాలా సాధారణమైన విషయంగా అనిపించవచ్చు, కానీ ఇది చాలా ఎఫెక్టివ్ గా పనిచేస్తుంది. వేసవిలో సూర్యరశ్మి చాలా తీవ్రంగా ఉన్నప్పుడు, రోడ్డుపై ఉండే వివిధ రకాల మెరిసే ఉపరితలాల నుండి వచ్చే కాంతి మన కళ్ళను దెబ్బతీస్తుంది. మీ ముందు వెళ్లే కారు, రోడ్డు పక్కన ఉండే గార్డ్ రైల్స్ లేదా మీ కారు విండ్‌స్క్రీన్ నుండి కూడా ఈ గ్లేర్ వచ్చే అవకాశం ఉంటుంది. ఇది డ్రైవింగ్ చేసేటప్పుడు మనకు రోడ్డు సరిగ్గా కనిపించకుండా చేస్తుంది. అంతేకాకుండా, ఎండ తీవ్రత వల్ల రోడ్డుపై ఎండమావులు  కనిపించి అయోమయానికి గురిచేస్తాయి. సన్ గ్లాసెస్ వాడటం వల్ల ఈ సమస్యలన్నీ తగ్గి, కంటిపై ఒత్తిడి పడకుండా ప్రయాణం ప్రశాంతంగా సాగుతుంది.

విండ్‌షీల్డ్‌ను క్లీన్‌గా ఉంచాలి..

ఎన్ హెచ్ఏఐ సూచించిన మరో ముఖ్యమైన సలహా ఏంటంటే, మీ కారు విండ్‌షీల్డ్ (Windshield) ఎప్పుడూ శుభ్రంగా ఉంచుకోవాలి. ఇది డ్రైవర్‌కు చాలా హెల్ప్ అవుతుంది. విండ్‌షీల్డ్‌పై దుమ్ము, ధూళి లేదా ఎండిపోయిన నీటి చుక్కల మరకలు ఉన్నప్పుడు, వాటిపై పడే సూర్యకిరణాలు రిఫ్లెక్ట్ అయి నేరుగా మన ముఖంపై పడే ప్రమాదం ఉంటుంది. దీనివల్ల డ్రైవింగ్ పై ఫోకస్ దెబ్బతింటుంది. కాబట్టి ప్రయాణం స్టార్ట్ చేయడానికి ముందే విండ్‌షీల్డ్‌ను నీట్ గా క్లీన్ చేసుకోవడం వల్ల సన్ గ్లేర్ సమస్య చాలా వరకు తగ్గిపోతుంది. దీనికోసం వైపర్ బ్లేడ్లు బాగా పనిచేస్తున్నాయో లేదో ముందే చెక్ చేసుకోవడం మంచిది. చిన్న జాగ్రత్తే అయినా ఇది ప్రయాణంలో పెద్ద మార్పును తెస్తుంది.

సన్ వైజర్లను ఉపయోగించాలి..

సాధారణంగా ఉదయం సూర్యోదయం సమయంలో అలాగే సాయంత్రం సూర్యాస్తమయం అయ్యేటప్పుడు సూర్యుడు నేరుగా మన కంటి చూపుకు ఎదురుగా ఉంటాడు. ఆ టైమ్ లో రోడ్డుపై ముందు ఏం ఉందో సరిగ్గా కనిపించక డ్రైవింగ్ చేయడం చాలా కష్టంగా మారుతుంది. ఇలాంటి క్లిష్ట పరిస్థితుల్లో కారులో పైన ఇచ్చే సన్ వైజర్లు (Sun Visors) అద్భుతంగా ఉపయోగపడతాయి. వీటిని కిందికి దించడం ద్వారా నేరుగా ముఖంపై పడే సూర్యకాంతిని చాలా వరకు బ్లాక్ చేయవచ్చు. దీనివల్ల కళ్ళు బైర్లు కమ్మకుండా ప్రయాణాన్ని సేఫ్ గా కొనసాగించవచ్చు. హైవేలపై లాంగ్ జర్నీ చేసేవారు ఈ చిన్న చిన్న టిప్స్ ఫాలో అయితే ఎండ కాలంలో కూడా ఎటువంటి ఇబ్బందులు లేకుండా సురక్షితంగా గమ్యస్థానాలకు చేరుకోవచ్చు.

మరిన్ని చదవండి

ఫాస్ట్‌ట్యాగ్ రీఛార్జ్ విధానాలు - హైవే ప్రయాణాన్ని మరింత సులభం చేసే టిప్స్..

షారుఖ్ ఖాన్ గ్యారేజీలోకి కొత్త లగ్జరీ కారు - ముంబై వీధుల్లో చక్కర్లు కొడుతున్న అమెరికన్ బీస్ట్!