పెట్రోల్, డీజిల్‌కు ఇక CNG తోడు.. మహీంద్రా ఎక్స్‌యూవీ 3XOలో సన్‌రూఫ్‌తో కొత్త లుక్‌
మహీంద్రా ఎక్స్‌యూవీ 3XO CNG వేరియంట్‌ను అక్టోబర్ 15న ఆవిష్కరించనున్నారు. పానోరమిక్ సన్‌రూఫ్, ముందు భాగంలో మార్పులు, ఇంజిన్ సామర్థ్యం వంటి కీలక వివరాలు తెలుసుకోండి.
Mahindra XUV 3XO CNG: దేశీయ వాహన తయారీ సంస్థ మహీంద్రా, తన XUV 3XO సిరీస్‌లో కొత్త CNG మోడల్‌ను తీసుకొస్తోంది. అక్టోబర్ 15న ఈ కొత్త వాహనాన్ని ఆవిష్కరించనున్నట్లు కంపెనీ వెల్లడించింది. ఇప్పటికే పెట్రోల్, డీజిల్, ఎలక్ట్రిక్ రూపాల్లో అందుబాటులో ఉన్న ఎక్స్‌యూవీ 3XOలోకి ఇప్పుడు సీఎన్‌జీ ఎంపిక కూడా చేరనుంది. కొత్త వాహనానికి సంబంధించిన బాహ్య రూపం, లోపలి భాగాలకు సంబంధించిన కొన్ని వివరాలను కంపెనీ టీజర్ ద్వారా వెల్లడించింది.
పానోరమిక్ సన్‌రూఫ్‌తో కొత్త ఆకర్షణ
కొత్త ఎక్స్‌యూవీ 3XO CNGలో పానోరమిక్ సన్‌రూఫ్ ఉంటుందని టీజర్ స్పష్టం చేస్తోంది. ఈ ఫీచర్ ఈ వాహనంపై ఆసక్తిని పెంచుతోంది. ముందుభాగంలోనూ కొన్ని మార్పులు కనిపిస్తున్నాయి. హెడ్‌ల్యాంప్‌ల మధ్య బాడీ కలర్‌ ప్యానెల్‌ను అందించారు. మహీంద్రా ట్విన్ పీక్స్ లోగోకు ఇరువైపులా సన్నని లోహపు అలంకరణలు కనిపిస్తున్నాయి.
ముందుభాగం డిజైన్‌ Mahindra RevX సిరీస్‌ను పోలి ఉంది. దీంతో ఈ కొత్త సీఎన్‌జీ నమూనాను RevX రూపంలోనూ అందించే అవకాశం ఉందనే అంచనాలు ఉన్నాయి. అయితే దీనిపై కంపెనీ నుంచి పూర్తి స్పష్టత రావాల్సి ఉంది. ఇవి తప్ప, సాధారణ ఎక్స్‌యూవీ 3XOతో పోలిస్తే, డిజైన్‌ పరంగా ఇక పెద్ద మార్పులు ఉండకపోవచ్చని తెలుస్తోంది.
ఇది కూడా చదవండి: దేశవ్యాప్తంగా జనం ఈ కారు కోసం షోరూమ్‌ ముందు క్యూ కట్టారు, మీ బడ్జెట్‌లోనే వస్తుంది!
ఇంజిన్ ఎలా ఉండొచ్చు?
ఈ కొత్త వాహనంలో 1.2 లీటర్ టర్బో పెట్రోల్ ఇంజిన్ ఆధారంగా రూపొందించిన సీఎన్‌జీ వ్యవస్థ ఉండవచ్చని అంచనా. ప్రస్తుతం పెట్రోల్ రూపంలో ఇదే ఇంజిన్ 111 హెచ్‌పీ శక్తిని, 200 ఎన్‌ఎం టార్క్‌ను ఉత్పత్తి చేస్తుంది. అయితే సీఎన్‌జీతో నడిచే సమయంలో శక్తి, టార్క్ గణాంకాలు ఎలా ఉంటాయనే విషయాన్ని కంపెనీ ఇంకా వెల్లడించలేదు.
ప్రస్తుతం పెట్రోల్ ఎక్స్‌యూవీ 3XOలో 6 గేర్ల మాన్యువల్, ఆటోమేటిక్ గేర్‌బాక్స్ ఎంపికలు ఉన్నాయి. కొత్త సీఎన్‌జీ నమూనాలో ఎలాంటి గేర్‌బాక్స్ అందిస్తారనేది కూడా తెలియాల్సి ఉంది. సీఎన్‌జీ ట్యాంకు సామర్థ్యం, దాన్ని వాహనంలో ఎక్కడ అమర్చుతారనే వివరాలు కూడా ఆవిష్కరణ సమయంలో లేదా ఆ తర్వాత వెల్లడయ్యే అవకాశం ఉంది.
ఇది కూడా చదవండి: ఎలక్ట్రిక్ కార్లతో జర జాగ్రత్త.. చిన్న పొరపాటుతో భారీ ప్రమాదం! EV వాహనదారులు తప్పక తెలుసుకోవాల్సిన భద్రత సూచనలు!
సీఎన్‌జీ విభాగంలో కొత్త పోటీ
భారత మార్కెట్లో సీఎన్‌జీ ఎంపికతో వచ్చే కాంపాక్ట్ ఎస్‌యూవీల సంఖ్య పెరుగుతోంది. ప్రస్తుతం Maruti Suzuki Brezza, Tata Nexon వంటి వాహనాలు ఈ విభాగంలో పోటీ పడుతున్నాయి. ఎక్స్‌యూవీ 3XO CNG అందుబాటులోకి వస్తే ఈ విభాగంలో మహీంద్రాకు మరో ఎంపిక లభిస్తుంది.
పెట్రోల్, డీజిల్ వాహనాలతో పోలిస్తే సీఎన్‌జీతో ఇంధన ఖర్చును తగ్గించుకోవాలని భావించేవాళ్లకు ఈ కొత్త సీఎన్‌జీ వేరియంట్‌ మంచి ఆప్షన్‌ కాగలదు.
ఇంకా ఇలాంటి ఆటోమొబైల్‌ వార్తలు & అప్‌డేట్స్‌ కోసం "ABP దేశం" 'ఆటో' సెక్షన్‌ని ఫాలో అవ్వండి.
టాప్ హెడ్ లైన్స్
ట్రెండింగ్ వార్తలు
