కొత్త డిజైన్, తక్కువ బరువు, మరింత పవర్ ఫీల్ - KTM 790 Dukeకు భారీ అప్‌డేట్
KTM 790 Duke భారీ అప్‌డేట్‌తో వచ్చింది. కొత్త డిజైన్, మెరుగైన ఎర్గోనామిక్స్, WP బ్రేకింగ్ సిస్టమ్, పిరెల్లీ టైర్లు & 105 hp ఇంజిన్‌తో ఈ బైక్ మరింత ఆకర్షణీయంగా మారింది.
Updated KTM 790 Duke Details In Telugu: మిడ్‌ రేంజ్‌ నేకెడ్ స్పోర్ట్స్ బైక్‌ల విభాగంలో ప్రత్యేక గుర్తింపు సంపాదించుకున్న KTM 790 Duke ఇప్పుడు మరింత అట్రాక్టివ్‌ లుక్‌లో ప్రపంచ మార్కెట్ ముందుకు వచ్చింది. ఆస్ట్రియన్ టూవీలర్‌ తయారీ సంస్థ KTM, తన 790 Duke మోడల్‌కు ఎన్నడూలేనంత అతి పెద్ద అప్‌డేట్‌ను ప్రకటించింది. కొత్త డిజైన్, మెరుగైన రైడింగ్ పొజిషన్, అప్‌గ్రేడ్ చేసిన సస్పెన్షన్ & బ్రేకింగ్ వ్యవస్థలతో ఈ బైక్ పూర్తిగా కొత్త అనుభూతిని అందించేందుకు సిద్ధమైంది.
అగ్రెసివ్‌ లుక్‌
కొత్త KTM 790 Dukeను చూస్తే సైన్స్ ఫిక్షన్ సినిమాలో కనిపించే భవిష్యత్ తరహా బైక్‌లను గుర్తు చేస్తుంది. KTM 990 Duke & 1390 Super Duke R మోడళ్ల నుంచి స్ఫూర్తి పొందిన డిజైన్‌తో ఈ బైక్‌ను రూపొందించారు. పూర్తిగా రీడిజైన్ చేసిన LED హెడ్‌లైట్, స్లిమ్ బాడీ ప్యానెల్స్, పెద్ద ఫ్రంట్ కౌల్ & కొత్త ఆకారంలో ఉన్న ఫ్యూయల్ ట్యాంక్ దీనికి మరింత దూకుడు రూపాన్ని తీసుకొచ్చాయి.
ఈ అప్‌డేట్‌లో అత్యంత కీలకమైన మార్పులు ఎర్గోనామిక్స్‌లో కనిపిస్తున్నాయి. కొత్త హ్యాండిల్‌బార్‌ను మరింత సహజమైన రైడింగ్ పొజిషన్ కోసం రూపొందించారు. రైడర్ & పిలియన్ ఫుట్‌పెగ్‌ల స్థానాలను మార్చడంతో పాటు సీటును కూడా కొత్తగా డిజైన్ చేశారు. దీంతో లాంగ్‌ రైడ్స్‌లో కూడా మెరుగైన సౌకర్యం లభిస్తుందని KTM చెబుతోంది.
అదనంగా కొత్త సబ్‌ఫ్రేమ్, సవరించిన ట్రిపుల్ క్లాంప్స్ & రీడిజైన్ చేసిన ఫ్యూయల్ ట్యాంక్ కారణంగా ముందు చక్రం నుంచి వచ్చే ఫీడ్‌బ్యాక్ మరింత మెరుగుపడిందని కంపెనీ వెల్లడించింది. ఆశ్చర్యకరంగా, బైక్ పరిమాణం పెద్దగా కనిపిస్తున్నప్పటికీ, పాత మోడల్‌తో పోలిస్తే 2 కిలోల బరువు తగ్గిందని KTM పేర్కొంది.
ఇంజిన్
ఇంజిన్ విషయానికి వస్తే, Euro 5+ ప్రమాణాలకు అనుగుణంగా ఉండే 799 cc LC8c ప్యారలల్ ట్విన్, లిక్విడ్ కూల్డ్ ఇంజిన్‌ను కొనసాగించారు. ఈ ఇంజిన్ 105 hp పవర్ & 87 Nm టార్క్‌ను ఉత్పత్తి చేస్తుంది. 6 స్పీడ్ గేర్‌బాక్స్‌తో పాటు స్లిప్ & అసిస్ట్ క్లచ్‌ను అందించారు. కొత్త ఎగ్జాస్ట్ & మఫ్లర్ డిజైన్‌తో ఇంజిన్ పనితీరు మరింత మెరుగుపడిందని కంపెనీ చెబుతోంది.
సస్పెన్షన్ బాధ్యతలను WP APEX యూనిట్లే నిర్వహిస్తున్నప్పటికీ, ఫోర్క్ & రియర్ మోనోషాక్‌లో కీలక మార్పులు చేశారు. 43 mm అప్‌సైడ్ డౌన్ ఫోర్క్‌లో కంప్రెషన్ & రీబౌండ్ డ్యాంపింగ్ అడ్జస్ట్‌మెంట్ లభిస్తుంది. వెనుక భాగంలో ప్రీలోడ్ & రీబౌండ్ డ్యాంపింగ్‌ను సర్దుబాటు చేసుకునే అవకాశం ఉంది. కొత్త 5 క్లిక్ అడ్జస్టర్ ద్వారా సెట్టింగ్స్ మార్చడం మరింత సులభమైంది.
WP రేడియల్ బ్రేకింగ్ సిస్టమ్
బ్రేకింగ్ వ్యవస్థలో కూడా పెద్ద మార్పు జరిగింది. పాత మోడల్‌లో ఉన్న J.Juan బ్రేక్‌ల స్థానంలో KTM స్వయంగా అభివృద్ధి చేసిన WP రేడియల్ బ్రేకింగ్ సిస్టమ్‌ను అందించింది. ఇది మరింత బలమైన బ్రేకింగ్ శక్తి, మెరుగైన నియంత్రణ & మంచి లివర్ ఫీల్‌ను అందిస్తుందని KTM పేర్కొంది. అలాగే WP స్టీరింగ్ డ్యాంపర్‌ను ఇప్పుడు స్టాండర్డ్ ఫీచర్‌గా అందిస్తున్నారు. పిరెల్లీ డయాబ్లో రోస్సో IV టైర్లతో రోడ్ గ్రిప్ కూడా మరింత మెరుగుపడింది.
ఇక, కస్టమర్లలో పెద్దగా ఆదరణ పొందని డెమో మోడ్ ఫీచర్‌ను భవిష్యత్ మోడళ్లలో నిలిపివేయనున్నట్లు KTM ప్రకటించింది. ఈ ఫీచర్ ద్వారా.. కొన్ని ఎలక్ట్రానిక్ ఫంక్షన్లను తాత్కాలికంగా ఉపయోగించి, తర్వాత వాటిని కొనుగోలు చేయాల్సి ఉండేది. దీనిపై వచ్చిన విమర్శల నేపథ్యంలో కంపెనీ ఈ నిర్ణయం తీసుకుంది.
సేల్స్‌ ఎప్పటి నుంచి?
కొత్త KTM 790 Duke అంతర్జాతీయ మార్కెట్లలో జులై చివరి నుంచి అమ్మకానికి రానుంది. అయితే భారత మార్కెట్లో ఈ అప్‌డేటెడ్ మోడల్‌ను ఎప్పుడు తీసుకురానున్నారనే విషయంపై KTM ఇండియా ఇంకా ఎలాంటి అధికారిక ప్రకటన చేయలేదు. ప్రస్తుతం కంపెనీ భారతదేశంలో పెర్ఫార్మెన్స్ బైక్ KTM 890 Duke R ను విక్రయిస్తోంది. ఈ బైక్ ఎక్స్ షోరూమ్ ధర రూ.14.50 లక్షలుగా ఉంది. కొత్త 790 Duke భారత్‌లోకి వస్తే ప్రీమియం నేకెడ్ స్పోర్ట్స్ బైక్ సెగ్మెంట్‌లో పోటీ మరింత ఆసక్తికరంగా మారే అవకాశం ఉంది.
ఇంకా ఇలాంటి ఆటోమొబైల్‌ వార్తలు & అప్‌డేట్స్‌ - "ABP దేశం" 'ఆటో' సెక్షన్‌ని ఫాలో అవ్వండి.
టాప్ హెడ్ లైన్స్
ట్రెండింగ్ వార్తలు
