మండే ఎండలో టెస్ట్ - హ్యుందాయ్ వెన్యూ Vs కియా సోనెట్ - ఏసీ కింగ్ ఏది?
కారు ఎక్స్‌పర్ట్స్‌... హ్యుందాయ్ వెన్యూ, కియా సోనెట్ SUVల ఏసీ పనితీరును 41 డిగ్రీల ఉష్ణోగ్రతలో పరీక్షించారు. క్యాబిన్‌ను ఏ కారు వేగంగా చల్లబరుస్తుందో తెలుసుకోండి.
Hyundai Venue vs Kia Sonet: మన తెలుగు రాష్ట్రాల్లో ఏ కాలంలోనైనా ఉష్ణోగ్రతలు 40 డిగ్రీల సెల్సియస్‌ను దాటడం సాధారణ విషయమే. అలాంటి పరిస్థితుల్లో కారులో ఏసీ పనితీరు ఎంత బాగుంటుందనేది తెలుగు ప్రజలకు కీలక అంశంగా మారుతోంది. ముఖ్యంగా కాంపాక్ట్ SUV సెగ్మెంట్‌లో అత్యంత ప్రజాదరణ పొందిన హ్యుందాయ్ వెన్యూ, కియా సోనెట్ మోడళ్లలో ఏది క్యాబిన్‌ను వేగంగా చల్లబరుస్తుందనే విషయాన్ని తెలుసుకునేందుకు ఎక్స్‌పర్టులు ప్రత్యేక పరీక్ష నిర్వహించారు.
ఈ పరీక్షలో రెండు వాహనాలను దాదాపు రెండు గంటల పాటు నేరుగా ఎండలో పార్క్ చేశారు. అనంతరం 41.2 డిగ్రీల సెల్సియస్ బాహ్య ఉష్ణోగ్రత వద్ద ఏసీ పనితీరును విశ్లేషించారు. క్యాబిన్ ఉష్ణోగ్రత, వెంట్ నుంచి వచ్చే గాలి చల్లదనం, ముందు & వెనుక సీట్ల వద్ద ఉష్ణోగ్రతలను ప్రత్యేక సెన్సార్ల సహాయంతో కొలిచారు.
హ్యుందాయ్ వెన్యూ ఫలితాలు
పరీక్ష ప్రారంభంలో హ్యుందాయ్ వెన్యూ క్యాబిన్ ఉష్ణోగ్రత 50 డిగ్రీల సెల్సియస్‌కు పైగా నమోదైంది. కేవలం ఒక నిమిషం పాటు వాహనం నిలిపి ఉంచి ఏసీ ఆన్ చేసిన తర్వాత ముందు సీట్ల భాగంలో ఉష్ణోగ్రత 53.2 డిగ్రీల నుంచి 40.7 డిగ్రీలకు, వెనుక సీట్ల భాగంలో 52.2 డిగ్రీల నుంచి 39.7 డిగ్రీలకు తగ్గింది.
ఐదు నిమిషాల డ్రైవింగ్ తర్వాత ముందు సీట్ల వద్ద ఉష్ణోగ్రత 30.7 డిగ్రీలకు, వెనుక సీట్ల వద్ద 29.7 డిగ్రీలకు చేరింది. 15 నిమిషాల ప్రయాణం పూర్తయ్యే సరికి క్యాబిన్ మొత్తం సుమారు 30 డిగ్రీల వద్ద స్థిరపడింది.
వెన్యూ ఏసీ వెంట్లు విశాలంగా ఉండటంతో గాలి క్యాబిన్ అంతటా సమర్థవంతంగా వ్యాపించినట్లు పరీక్షలో గుర్తించారు. దీంతో ముందు, వెనుక సీట్ల ప్రయాణికులు సమాన స్థాయిలో చల్లదనాన్ని అనుభవించారు.
కియా సోనెట్ ఫలితాలు
కియా సోనెట్‌లో పరీక్ష ప్రారంభ సమయంలో ముందు, వెనుక సీట్ల వద్ద ఉష్ణోగ్రతలు దాదాపు 50 డిగ్రీల సెల్సియస్‌గా నమోదయ్యాయి. ఒక నిమిషం పాటు ఏసీ నడిపిన తర్వాత ముందు సీట్ల భాగంలో ఉష్ణోగ్రత 42 డిగ్రీలకు, వెనుక సీట్ల భాగంలో 44 డిగ్రీలకు తగ్గింది.
ఐదు నిమిషాల డ్రైవింగ్ తర్వాత ముందు సీట్ల వద్ద ఉష్ణోగ్రత 33.2 డిగ్రీలు, వెనుక భాగంలో 32 డిగ్రీలుగా నమోదైంది. 15 నిమిషాల తర్వాత ముందు భాగంలో 31.7 డిగ్రీలు, వెనుక భాగంలో 30.7 డిగ్రీలకు తగ్గింది.
ఈ పరీక్షలో ఉపయోగించిన సోనెట్ X-Line వేరియంట్ మ్యాట్ బ్లాక్ ఎక్స్‌టీరియర్, పూర్తిగా బ్లాక్ ఇంటీరియర్‌తో వచ్చింది. సాధారణంగా బ్లాక్ రంగు ఎక్కువ వేడిని గ్రహిస్తుంది. అయినప్పటికీ, నిలువుగా ఉండే ఏసీ వెంట్లు & విస్తృత గాలి పంపిణీ వ్యవస్థ వల్ల క్యాబిన్‌ను సమర్థవంతంగా చల్లబరచగలిగింది.
ఏ SUV గెలిచింది?
రెండు వాహనాలు కూడా తీవ్రమైన ఎండలో మంచి ఏసీ పనితీరును కనబరిచాయి. అయితే పరీక్షలో నమోదైన గణాంకాల ప్రకారం హ్యుందాయ్ వెన్యూ క్యాబిన్‌ను మరింత వేగంగా చల్లబరచగలిగింది. ముఖ్యంగా, ప్రారంభ దశలో ఉష్ణోగ్రతను వేగంగా తగ్గించడంలో వెన్యూ స్పష్టమైన ఆధిక్యం ప్రదర్శించింది.
కియా సోనెట్ కూడా మంచి ఫలితాలు సాధించినప్పటికీ, క్యాబిన్‌ను చల్లబరచే వేగం విషయంలో వెన్యూ కంటే కొంత వెనుకబడింది. అందువల్ల, వేడి ప్రాంతాల్లో అత్యుత్తమ ఏసీ పనితీరును కోరుకునే కొనుగోలుదారులకు హ్యుందాయ్ వెన్యూ కొంత మెరుగైన ఎంపికగా నిలుస్తుంది.
అయితే, వాస్తవ వినియోగంలో వాతావరణ పరిస్థితులు, పార్కింగ్ ప్రదేశం, క్యాబిన్ రంగులు, ప్రయాణికుల సంఖ్య వంటి అంశాలపై కూడా ఏసీ పనితీరు ఆధారపడి ఉంటుందని గుర్తుంచుకోవాలి.
ఇంకా ఇలాంటి ఆటోమొబైల్‌ వార్తలు & అప్‌డేట్స్‌ - "ABP దేశం" 'ఆటో' సెక్షన్‌ని ఫాలో అవ్వండి.
టాప్ హెడ్ లైన్స్
ట్రెండింగ్ వార్తలు
