Citroen C3: రూ.5 లక్షల రేంజ్‌లో కొత్త కారు.. త్వరలో లాంచ్.. పంచ్‌కే పంచ్!

ప్రముఖ కార్ల తయారీ సంస్థ సిట్రియోన్ మనదేశంలో కొత్త కారును త్వరలో లాంచ్ చేసే అవకాశం ఉందని తెలుస్తోంది.

సిట్రియోన్ సీ3 త్వరలో లాంచ్ కానుందని తెలుస్తోంది.

సిట్రియోన్ సీ3 కారు భారతీయ రోడ్ల మీద ఇటీవలే కనిపించింది. దీన్ని బట్టి ఈ కారు త్వరలోనే మనదేశంలో లాంచ్ కానుందని అంచనా వేయవచ్చు. ఈ సీ3 ఎస్‌యూవీ కాదు కానీ కాస్త ఎత్తు ఎక్కువ ఉన్న హ్యాచ్‌బ్యాక్‌లా కనిపిస్తుంది. సిట్రియోన్ మనదేశంలో తన మొదటి కారు సీ5 ఎయిర్ క్రాస్‌ను గతంలోనే లాంచ్ చేసింది. ఇది సిట్రియోన్ లాంచ్ చేయనున్న రెండో కారు.

మనదేశం కోసం దీన్ని బాగా లోకలైజ్ చేసినట్లు తెలుస్తోంది. ప్రస్తుతం అందుబాటులో ఉన్న ఎస్‌యూవీల కంటే తక్కువ ధరకే ఈ కారు మనదేశంలో లాంచ్ అయ్యే అవకాశం ఉంది. హెడ్ ల్యాంప్స్/డీఆర్ఎల్స్ వేర్వేరుగా ఉన్నాయి. కాబట్టి ఇది చూడటానికి కూడా చాలా స్టైలిష్‌గా ఉంది.

ఎస్‌యూవీ కానప్పటికీ ఇందులో క్లాడింగ్, మంచి గ్రౌండ్ క్లియరెన్స్‌తో పాటు ఎస్‌యూవీ తరహా స్టాన్స్ కూడా ఉండనున్నాయి. దీని ఇంటీరియర్‌ను అందంగా తీర్చిదిద్దారు. విండో కంట్రోల్స్ మధ్యలో ఉన్నాయి. దీంతోపాటు మాన్యువల్ ఏసీ కూడా ఈ కారులో ఉంది.

ఇందులో 10 అంగుళాల టచ్ స్క్రీన్ అందించే అవకాశం ఉంది. దీనికి స్మార్ట్ ఫోన్ కనెక్టివిటీ ఫీచర్ కూడా అందించారు. డిజిటల్ ఇన్‌స్ట్రుమెంట్ క్లస్టర్ కూడా ఇందులో ఉండనుంది. సీ3లో 1.2 లీటర్ పెట్రోల్ ఇంజిన్ మాన్యువల్ గేర్ బాక్స్ వేరియంట్, ప్రాపర్ ఆటోమేటిక్ వేరియంట్లు ఉండే అవకాశం ఉంది.

ఈ కారు ధర ఎంత ఉండనుంది అనే విషయం తెలియరాలేదు. అయితే ఫీచర్లను బట్టి చూస్తే రూ.5 లక్షల రేంజ్‌లో దీని ధర ఉండే అవకాశం ఉంది. ప్రస్తుతం టాటా పంచ్ రూ.5.4 లక్షల నుంచి ప్రారంభం కానుంది. పంచ్ కంటే తక్కువ ధరకే లాంచ్ అయితే సీ3 వినియోగదారులను ఆకర్షించడం ఖాయం.

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి