E20 పెట్రోల్పై డౌట్ ఉందా? రూ.10 లక్షల లోపు కొనుగోలు చేయగల 5 బెస్ట్ డీజిల్ కార్ల లిస్ట్
రూ.10 లక్షల లోపులో అందుబాటులో ఉన్న టాటా ఆల్ట్రోజ్, టాటా నెక్సాన్, కియా సోనెట్, మహీంద్రా XUV 3XO, హ్యుందాయ్ వెన్యూ డీజిల్ కార్ల పూర్తి వివరాలు.
Best diesel cars under 10 lakh: దేశవ్యాప్తంగా E20 పెట్రోల్ అందుబాటులోకి వచ్చిన తర్వాత కూడా చాలామంది వాహనదారులు డీజిల్ కార్లకే ప్రాధాన్యం ఇస్తున్నారు. ముఖ్యంగా, ఎక్కువ దూరాలు ప్రయాణించే వారు, మెరుగైన మైలేజ్ కోరుకునే వారు & అధిక టార్క్ అవసరమయ్యే యూజర్లు ఇప్పటికీ డీజిల్ వాహనాలనే ఎంచుకుంటున్నారు. అయితే గత కొన్నేళ్లుగా డీజిల్ కార్ల సంఖ్య గణనీయంగా తగ్గింది. అయినప్పటికీ రూ.10 లక్షల లోపు ధరలో కొన్ని మంచి డీజిల్ కార్లు ఇప్పటికీ మార్కెట్లో అందుబాటులో ఉన్నాయి.
ఫెడరేషన్ ఆఫ్ ఆటోమొబైల్ డీలర్స్ అసోసియేషన్ (FADA) గణాంకాల ప్రకారం, 2026 జూన్లో దేశవ్యాప్తంగా అమ్ముడైన 4,10,853 ప్యాసింజర్ వాహనాల్లో డీజిల్ మోడళ్ల వాటా 16.02 శాతంగా నమోదైంది. ఒకప్పుడు మార్కెట్ను శాసించిన డీజిల్ కార్ల డిమాండ్ ఇప్పుడు తగ్గినప్పటికీ, వాటి కోసం చూస్తున్న కొనుగోలుదారులకు ఇంకా కొన్ని బలమైన ఎంపికలు ఉన్నాయి.
Tata Altroz Diesel
ఈ జాబితాలో అత్యంత చవకైన డీజిల్ కారు టాటా ఆల్ట్రోజ్. దీని ప్రారంభ ఎక్స్ షోరూమ్ ధర రూ.8,14,990. ప్రస్తుతం భారతదేశంలో డీజిల్ ఇంజిన్తో లభిస్తున్న ఏకైక మాస్ మార్కెట్ ప్రీమియం హ్యాచ్బ్యాక్ ఇదే. ఇందులో 1.5 లీటర్ డీజిల్ ఇంజిన్ను అందించారు. ఇది 90 PS పవర్ & 200 Nm టార్క్ను ఉత్పత్తి చేస్తుంది. ఈ ఇంజిన్కు 5 స్పీడ్ మాన్యువల్ గేర్బాక్స్ మాత్రమే అందుబాటులో ఉంది.
Tata Nexon Diesel
టాటా నెక్సాన్ కూడా రూ.10 లక్షల లోపు కొనుగోలు చేయగల అత్యుత్తమ డీజిల్ SUVలలో ఒకటి. దీని ప్రారంభ ఎక్స్ షోరూమ్ ధర రూ.9,14,990. భారతదేశంలో అత్యధికంగా అమ్ముడవుతున్న SUVగా పేరొందిన నెక్సాన్లో 1.5 లీటర్ డీజిల్ ఇంజిన్ ఉంది. ఇది 115 PS పవర్ & 260 Nm టార్క్ను ఉత్పత్తి చేస్తుంది. కొనుగోలుదారులు 6 స్పీడ్ మాన్యువల్ లేదా 6 స్పీడ్ AMT గేర్బాక్స్లలో తమకు నచ్చినదాన్ని ఎంచుకోవచ్చు.
ఇది కూడా చదవండి: నిస్సాన్ గ్రావైట్ కొనాలనుకుంటున్నారా? సిటీలో, హైవేపై ఈ కారు నిజమైన మైలేజ్ వివరాలు ఇవిగో!
Kia Sonet Diesel
కియా సోనెట్ డీజిల్ వేరియంట్ ప్రారంభ ధర రూ.9,19,900. ఇందులో 1.5 లీటర్ CRDi VGT డీజిల్ ఇంజిన్ను అందించారు. ఈ ఇంజిన్ 116 PS పవర్ & 250 Nm టార్క్ను అందిస్తుంది. ట్రాన్స్మిషన్ ఎంపికల్లో 6 స్పీడ్ మాన్యువల్ & 6 స్పీడ్ ఆటోమేటిక్ గేర్బాక్స్లు ఉన్నాయి. నగర ప్రయాణాలతో పాటు హైవే డ్రైవింగ్కు కూడా ఇది మంచి ఎంపికగా నిలుస్తుంది.
Mahindra XUV 3XO Diesel
మహీంద్రా XUV 3XO డీజిల్ ప్రారంభ ధర రూ.9,36,000. ఇందులో 1.5 లీటర్ CRDe డీజిల్ ఇంజిన్ను ఉపయోగించారు. ఇది 117 PS పవర్తో పాటు 300 Nm టార్క్ను ఉత్పత్తి చేస్తుంది. ఈ జాబితాలో అత్యధిక టార్క్ అందించే మోడల్ ఇదే కావడం విశేషం. 6 స్పీడ్ మాన్యువల్ లేదా 6 స్పీడ్ AMT ట్రాన్స్మిషన్ ఎంపికలు ఇందులో లభిస్తాయి. అధిక టార్క్ కారణంగా కొండ ప్రాంతాలు లేదా భారీ లోడ్తో ప్రయాణించే వారికి ఇది మరింత అనుకూలంగా ఉంటుంది.
ఇది కూడా చదవండి: టాటా కర్వ్ బలాలు, బలహీనతలు - కొనేముందు తప్పక తెలుసుకోవాల్సిన విషయాలు
Hyundai Venue Diesel
హ్యుందాయ్ వెన్యూ కూడా రూ.10 లక్షల లోపు లభించే మరో డీజిల్ SUV. దీని ప్రారంభ ఎక్స్ షోరూమ్ ధర రూ.9,94,600. ఇందులో 1.5 లీటర్ U2 డీజిల్ ఇంజిన్ ఉంది. ఇది 116 PS పవర్ & 250 Nm టార్క్ను ఉత్పత్తి చేస్తుంది. 6 స్పీడ్ మాన్యువల్ లేదా 6 స్పీడ్ ఆటోమేటిక్ ట్రాన్స్మిషన్లతో ఈ మోడల్ అందుబాటులో ఉంది. సౌకర్యవంతమైన డ్రైవింగ్ అనుభవం కోరుకునే వారికి ఇది మంచి ఎంపిక.
మొత్తంగా చూస్తే, భారత మార్కెట్లో డీజిల్ కార్ల సంఖ్య తగ్గుతున్నప్పటికీ, రూ.10 లక్షల లోపు ధరలో టాటా ఆల్ట్రోజ్, టాటా నెక్సాన్, కియా సోనెట్, మహీంద్రా XUV 3XO & హ్యుందాయ్ వెన్యూ వంటి బలమైన ఎంపికలు ఇంకా అందుబాటులో ఉన్నాయి. ఎక్కువ మైలేజ్, బలమైన పనితీరు & హైవే ప్రయాణాలకు అనువైన వాహనం కోసం చూస్తున్న వారు ఈ డీజిల్ కార్లను కొనుగోలు చేసే ముందు తప్పకుండా పరిశీలించవచ్చు.
ఇంకా ఇలాంటి ఆటోమొబైల్ వార్తలు & అప్డేట్స్ - "ABP దేశం" 'ఆటో' సెక్షన్ని ఫాలో అవ్వండి.
టాప్ హెడ్ లైన్స్
ట్రెండింగ్ వార్తలు
