Bajaj Pulsar 180 Vs Apache 180 Bikes: 180 సీసీ సెగ్మెంట్‌లో మళ్ళీ మొదలైన పోరు - పల్సర్ రీ-ఎంట్రీతో అపాచీకి చెక్!
బజాజ్ పల్సర్ 180 మళ్ళీ మార్కెట్లోకి ఎంట్రీ ఇచ్చింది. టీవీఎస్ అపాచీ ఆర్టీఆర్ 180తో దీనికి గట్టి పోటీ ఎదురవుతోంది. ఫీచర్లు, ధరల పూర్తి వివ‌రాలు తెలుసుకుందాం.
Bajaj Pulsar 180 VS Apache 180 News: బజాజ్ ఆటో తన పవర్‌ఫుల్ కమ్యూటర్ లైనప్‌లో ఒకప్పుడు ఓ వెలుగు వెలిగిన 'పల్సర్ 180'ని మళ్ళీ ఇండియ‌న్ మార్కెట్లోకి ప్రవేశపెట్టింది. 2022లో నిలిపివేసిన ఈ మోడల్‌ను రూ. 1.22 లక్షల (ఎక్స్‌షోరూమ్) ధరతో రీ-లాంచ్ చేయడం విశేషం. ఈ బైక్ రాకతో 180 సీసీ విభాగంలో ఎప్పటినుండో రారాజుగా ఉన్న టీవీఎస్ అపాచీ ఆర్టీఆర్ 180కి గట్టి సవాలు ఎదురుకానుంది. మీరు కూడా మంచి 180 సీసీ బైక్ కొనాలని ప్లాన్ చేస్తుంటే, ఈ రెండింటిలో ఏది మీకు సెట్ అవుతుందో తెలుసుకుందాం.
ఇంజిన్ - పర్ఫార్మెన్స్..
బజాజ్ పల్సర్ 180 లో 178.6 సీసీ సింగిల్ సిలిండర్ ఎయిర్-కూల్డ్ ఇంజిన్ ఉంది. ఇది 17 హెచ్‌పి పవర్, 15 ఎన్ఎమ్ టార్క్‌ను అందిస్తుంది. మరోవైపు టీవీఎస్ అపాచీ ఆర్టీఆర్ 180 లో 177.4 సీసీ ఆయిల్-కూల్డ్ ఇంజిన్ ఉంది. ఇది 17 హెచ్‌పి పవర్ తో పాటు 15.5 ఎన్ఎమ్ టార్క్‌ను ఉత్పత్తి చేస్తుంది. రెండింటిలోనూ 5-స్పీడ్ గేర్‌బాక్స్ ఉంది. అపాచీ ఇంజిన్ కొంచెం ఎక్కువ టార్క్‌తో స్పోర్టీగా అనిపిస్తే, పల్సర్ ఇంజిన్ డైలీ డ్రైవింగ్‌కు చాలా కంఫర్ట్‌గా, స్మూత్‌గా ఉంటుంది.
బరువు - కొలతలు..
ఇక్కడ టీవీఎస్ అపాచీ తన సత్తా చాటుతోంది. అపాచీ బరువు కేవలం 140 కేజీలు మాత్రమే. పల్సర్ 180 బరువు 156 కేజీలతో పోలిస్తే ఇది 16 కేజీలు తక్కువ. బరువు తక్కువ ఉండటం వల్ల ట్రాఫిక్‌లో అపాచీని నడపడం చాలా సులభం. అపాచీ గ్రౌండ్ క్లియరెన్స్ 180 మిమీ ఉండగా, పల్సర్ కి 165 మిమీ మాత్రమే ఉంది. అయితే పల్సర్‌లో 15 లీటర్ల పెద్ద ఫ్యూయల్ ట్యాంక్ ఉండటం వల్ల లాంగ్ రైడ్స్ చేసే వారికి పెట్రోల్ టెన్షన్ తక్కువగా ఉంటుంది. అపాచీలో ట్యాంక్ కెపాసిటీ 12 లీటర్లు మాత్రమే.
ఫీచర్లు - హార్డ్‌వేర్:
రెండు బైకుల్లో టెలిస్కోపిక్ ఫోర్క్స్, ట్విన్ రియర్ షాక్స్ ఉన్నాయి. బ్రేకింగ్ విషయానికి వస్తే పల్సర్‌లో 280 మిమీ ఫ్రంట్ డిస్క్ ఉంటే, అపాచీలో 270 మిమీ ఉంది. పల్సర్ .. డిజిటల్ కన్సోల్, ఎల్ఈడీ లైటింగ్‌తో మోడ్రన్ గా కనిపిస్తోంది. అపాచీలో మాత్రం స్పోర్ట్, అర్బన్, రైన్ అనే మూడు రైడింగ్ మోడ్స్ ఉన్నాయి. ఇవి వాతావరణాన్ని బట్టి బైక్ పర్ఫార్మెన్స్‌ను మారుస్తాయి. అపాచీలో స్మార్ట్ ఎక్స్ కనెక్ట్ (SmartXConnect) బ్లూటూత్ ఫీచర్ ద్వారా నావిగేషన్, కాల్ అలర్ట్స్ కూడా పొందవచ్చు. ట్రాఫిక్‌లో క్లచ్ వాడకుండానే బైక్ ముందుకు కదిలేలా చేసే 'గ్లైడ్ త్రూ టెక్నాలజీ' (GTT) అపాచీలో అదనపు ఆకర్షణ అని నిపుణులు అభిప్రాయం వ్యక్తం చేస్తున్నారు.
ఏది కొనాలి?
ధర పరంగా చూస్తే బజాజ్ పల్సర్ 180 (రూ. 1.22 లక్షలు) అపాచీ (రూ. 1.26 లక్షలు) కంటే కొంచెం తక్కువ. మీకు మంచి కంఫర్ట్, పెద్ద ట్యాంక్, తక్కువ ధర కావాలంటే పల్సర్ 180 బెస్ట్ ఆప్షన్. ఒకవేళ మీకు ఎక్కువ ఫీచర్లు, అదిరిపోయే స్పీడ్, లేటెస్ట్ టెక్నాలజీ కావాలనుకుంటే టీవీఎస్ అపాచీ ఆర్టీఆర్ 180 స్మార్ట్ ఛాయిస్ అవుతుంది. వాల్యూ ఫర్ మనీ (VFM) పరంగా చూస్తే అపాచీ కొంచెం ముందంజలో ఉంద‌ని విశ్లేష‌కులు పేర్కొన్నారు.
టాప్ హెడ్ లైన్స్
ట్రెండింగ్ వార్తలు
