Omicron in AP: ఏపీలో తొలి ఒమిక్రాన్ కేసు, ఐర్లాండ్ నుంచి వచ్చిన వ్యక్తికి.. వైద్యఆరోగ్యశాఖ కీలక ప్రకటన

ఐర్లాండ్ నుంచి విజయనగరానికి వచ్చిన 34 ఏళ్ల ప్రయాణికుడికి ఒమిక్రాన్ ఉన్నట్లుగా తేలింది. విజయనగరం జిల్లాలోని శృంగవరపు కోటకు చెందిన వ్యక్తికి ఈ వేరియంట్ సోకినట్లుగా గుర్తించారు.

ప్రతీకాత్మక చిత్రం

ఏపీలో తొలి ఒమిక్రాన్ కేసు నమోదు కావడం ఆందోళన కలిగిస్తోంది. విజయనగరం జిల్లాలో ఓ వ్యక్తికి ఒమిక్రాన్ పాజిటివ్ అని తేలింది. ఈ మేరకు ఆంధ్రప్రదేశ్ వైద్య ఆరోగ్యశాఖ కూడా దీన్ని ధ్రువీకరించింది. ఐర్లాండ్ నుంచి విజయనగరానికి వచ్చిన 34 ఏళ్ల ప్రయాణికుడికి ఒమిక్రాన్ ఉన్నట్లుగా తేలింది. విజయనగరం జిల్లాలోని శృంగవరపు కోటకు చెందిన వ్యక్తికి ఈ వేరియంట్ సోకినట్లుగా గుర్తించారు.

తాజాగా నిర్వహించిన ఆర్టీపీసీఆర్ టెస్టులో కరోనా నెగటివ్ అని తేలింది. దీంతో రాష్ట్రంలో ఒక్క ఒమిక్రాన్ యాక్టివ్ కేసు కూడా లేదని ప్రభుత్వం ప్రకటించింది. ఐర్లాండ్ నుంచి వచ్చిన ఈ వ్యక్తి దేశంలో తొలుత ముంబయి ఎయిర్ పోర్టుకు వచ్చి అక్కడి నుంచి విశాఖపట్నం నవంబరు 27న వచ్చాడు. ముంబయిలో ఆర్టీపీసీఆర్ టెస్టు నిర్వహించగా.. కొవిడ్ నెగటివ్ అని వచ్చింది. 

విజయనగరం వచ్చాక మరోసారి ఆర్టీపీసీఆర్ టెస్టు చేయగా.. కరోనా పాజిటివ్ అని తేలింది. దీంతో ఈయన నమూనాలను జీనోమ్ సీక్వెన్సింగ్ పరీక్ష కోసం హైదరాబాద్ సీసీఎంబీకి పంపించారు. ఆ ఫలితాల్లో అతనికి ఒమిక్రాన్ పాజిటివ్ ఉన్నట్లుగా తేలింది. కానీ, అతనికి ఎలాంటి లక్షణాలు లేవు. మళ్లీ ఈ నెల 11న మరోసారి ఆర్టీపీసీఆర్ టెస్టు చేయగా.. కరోనా నెగటివ్ అని తేలినట్లుగా అధికారులు ప్రకటించారు.

ఏపీలో ఒమిక్రాన్ వేరియంట్ కేసు గుర్తించడం ఇదే మొదటిది అని అధికారులు తెలిపారు. విదేశాల నుంచి వచ్చిన మొత్తం 15 మంది ప్రయాణికులకు ఆర్టీపీసీఆర్ టెస్టుల్లో కరోనా పాజిటివ్ వచ్చిందని, వీరి నమూనాలు సీసీఎంబీకి పంపగా.. ఒక ఒమిక్రాన్ గుర్తించినట్లుగా వెల్లడించారు. మరో ఐదుగురి రిపోర్టులు రావాల్సి ఉందని తెలిపారు. ఒమిక్రాన్ వేరియంట్ వల్ల ప్రజలు ఆందోళన చెందాల్సిన అవసరం లేదని, కరోనా నిబంధనలు పాటిస్తే సరిపోతుందని అధికారులు తెలిపారు.

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి