Gas Cylinder Blast: సత్యసాయి జిల్లాలో ఘోరం.. ఇంట్లో గ్యాస్ సిలిండర్ పేలి నలుగురి మృతి, అసలేం జరిగింది?
Gas Cylinder Explosion | ఓ ఇంట్లో డిటోనేటర్ కారణంగా గ్యాస్ సిలిండర్ పేలిపోవడంతో నలుగురు మృతి చెందారు. సత్యసాయి జిల్లాలోని కదిరి మండలంలో విషాదం చోటుచేసుకుంది.
Sri Sathya Sai District Latest News | కదిరి: శ్రీ సత్యసాయి జిల్లా కదిరి మండలంలో బుధవారం ఘోర ప్రమాదం చోటుచేసుకుంది. కుమ్మరవాండ్లపల్లి గ్రామంలో ఓ ఇంట్లో అకస్మాత్తుగా పేలుడు సంభవించింది. గ్యాస్ సిలిండర్లు పేలడంతో ఆ ప్రాంతం ఒక్కసారిగా ఉలిక్కిపడినట్లు తెలుస్తోంది. ఈ భారీ పేలుడు ఘటనలో నలుగురు వ్యక్తులు అక్కడికక్కడే ప్రాణాలు కోల్పోగా, మరో 20 మంది వరకు తీవ్రంగా గాయపడ్డారు. గాయపడిన వారికి అత్యవసర చికిత్స అందించేందుకు ఆసుపత్రికి తరలించారు. భారీ శబ్ధంతో పేలుడు ధాటికి ఆ ఇల్లు పూర్తిగా ధ్వంసమైంది.
ప్రమాదం జరిగిన వెంటనే స్థానికులు చేరుకుని సహాయక చర్యలు చేపట్టారు. సమాచారం అందుకున్న పోలీసులు, అత్యవసర సిబ్బంది వెంటనే అక్కడికి చేరుకుని గాయపడిన వారిని కదిరిలోని ప్రభుత్వ ఆసుపత్రికి తరలించి చికిత్స అందిస్తున్నారు. గాయపడిన వారిలో కొందరి పరిస్థితి విషమంగా ఉన్నట్లు సమాచారం. ఈ పేలుడు ఘటనపై పోలీసులు కేసు నమోదు చేసుకుని దర్యాప్తు చేస్తున్నారు.
ఇంట్లో పేలుడు పదార్థాలు ఉన్నాయని స్థానికంగా వినిపిస్తోంది. డిటోనేటర్లు పేలడంతో సిలిండర్లకు మంటలు అంటుకుని పెద్ద శబ్ధంతో అవి పేలినట్లు పోలీసులు ప్రాథమికంగా భావిస్తున్నారు. ఇంట్లో డ్రిల్లింగ్ మేషిన్ కూడా శిథిలాల కింద కనిపించడంతో అసలేం జరిగిందో తెలియక స్థానికులు ఆందోళన చెందుతున్నారు.
టాప్ హెడ్ లైన్స్
ట్రెండింగ్ వార్తలు
