Srikalahasti Temple : శ్రీకాళహస్తి వరదరాజ స్వామి ఆలయంలో బంగారు రేకులు లభ్యం

Srikalahasti Temple : శ్రీకాళహస్తి దేవస్థానం అనుబంధ దేవాలయం వరదరాజస్వామి ఆలయంలో బంగారు రేకులు లభ్యం అయ్యాయి.

బంగారం రేకులు

Srikalahasti Temple : శ్రీకాళహస్తీశ్వర స్వామి దేవస్థానం అనుబంధ దేవాలయం శ్రీ వరదరాజ స్వామి మూలవిరాట్ పానం మట్టం మధ్యలో అష్టమూలికా పంచాయతన బంగారు రేకులు లభ్యం అయ్యాయి. వరదరాజ స్వామి మూల విరాట్ పానం మట్టం మధ్యలో 37 బంగారు రేకులు, రెండు కాసులు లభించాయని ఆలయ అధికారులు తెలిపారు. వీటిని స్వాధీనం చేసుకున్నామన్నారు. పురాతన విష్ణు ఆలయం శ్రీ ప్రసన్న వరదరాజస్వామి ఆలయ పునర్నిర్మాణంలో భాగంగా మూలమూర్తి తొలగింపు కార్యక్రమాన్ని శుక్రవారం ఉదయం నిర్వహించారు. మూలమూర్తి తొలగించి అనంతరం మూలమూర్తిని పానమట్టం నుంచి జాగ్రత్తగా వేరు చేశారు.. పానమట్టం లోపలికి ఒకటిన్నర అడుగు లోపల మూలమూర్తిని ప్రతిష్ట చేసి ఉన్నారు. పురాతనమైన ఈ విగ్రహం కింద ఆనాడు  అష్టామూలక పంచాయతన బీజాక్షరాలు రాసిన 37 బంగారు రేకులు లభించాయి. అలాగే రెండు లక్ష్మీకాసులు, నవరత్నాలు లభించాయి. 

23న ఆలయ పునర్నిర్మాణానికి భూమిపూజ 

శ్రీకాళహస్తీశ్వరస్వామి దేవస్థానం ఛైర్మన్, దేవస్థానం అధికారులు, రెవెన్యూ, పోలీస్ సిబ్బంది సమక్షంలో వీటిని దేవస్థానం అధికారులు స్వాధీనం చేసుకున్నారు. అయితే పరీక్షించగా బంగారంగా తెలిసింది.  ఈ సందర్భంగా శ్రీకాళహస్తి ఆలయ ఛైర్మన్ మీడియాతో మాట్లాడుతూ.. విష్ణుమూర్తి విగ్రహం కింద సాధారణంగా ప్రతిష్ట చేసేప్పుడు అష్టామూలకా పంచాయతనాలు, నవధాన్యాలు, నవరత్నాలు ఉంచుతారని అవి లభించినట్లు వాటి దేవస్థానానికి స్వాధీనం చేశామన్నారు. రెవెన్యూ, పోలీసుల సమక్షంలో ఈ కార్యక్రమాన్ని నిర్వహించామని తెలిపారు. ఈనెల 23వ తేదీన ఉదయం 9 గంటలకి  వరదరాజుల స్వామి ఆలయ పునర్నిర్మాణ పనులకు భూమి పూజ కార్యక్రమాన్ని నిర్వహిస్తున్నట్లు శ్రీకాళహస్తీశ్వరస్వామి దేవస్థానం ఛైర్మన్ తెలిపారు.