AP Police Holiday: ఏపీ పోలీసులకు శుభవార్త.. ఈ 2 రోజులు వారికి స్పెషల్ హాలిడే మంజూరు చేసిన ప్రభుత్వం
AP Police Leaves | ఏపీలో అన్ని ర్యాంకుల పోలీసులకు వారి పుట్టినరోజు, మ్యారేజ్ డే సెలవు మంజూరు చేస్తూ డీజీపీ ఆదేశాలు జారీ చేశారు. పోలీస్ సిబ్బందికి మానసిక ఉల్లాసం కల్పించడమే ఈ నిర్ణయం ప్రధాన ఉద్దేశం.
అమరావతి: ఆంధ్రప్రదేశ్ పోలీస్ శాఖలో పనిచేస్తున్న సిబ్బందికి రాష్ట్ర ప్రభుత్వం, పోలీస్ ఉన్నతాధికారులు గుడ్ న్యూస్ చెప్పారు. పోలీసుల సంక్షేమానికి పెద్దపీట వేస్తూ, వారి వ్యక్తిగత జీవితానికి ప్రాధాన్యతనిచ్చేలా ఒక కీలక నిర్ణయం తీసుకున్నారు. ఇకపై ప్రతి ఏటా పోలీసు సిబ్బంది తమ పుట్టినరోజు (Birthday), వివాహ వార్షికోత్సవం (Wedding Anniversary) రోజున ప్రత్యేక సెలవును పొందే అవకాశం కల్పించారు. నిరంతరం విధుల్లో ఉంటూ కుటుంబానికి దూరంగా గడిపే పోలీసులకు ఇది మానసిక ఉల్లాసాన్ని ఇస్తుందని ఏపీ ప్రభుత్వం భావిస్తోంది.
ఈ ఉత్తర్వులు కేవలం కానిస్టేబుల్ స్థాయి వారికే కాకుండా, శాఖలోని అన్ని ర్యాంకుల పోలీసులకు వర్తిస్తాయని రాష్ట్ర డీజీపీ (DGP) స్పష్టం చేశారు. ఆయా జిల్లాల, యూనిట్ అధికారులు ఈ సెలవులను తప్పనిసరిగా మంజూరు చేయాలని ఆదేశించారు. శాంతిభద్రతల పరిరక్షణలో ఒత్తిడితో కూడిన విధులను నిర్వహించే సిబ్బంది, తమ జీవితంలోని ముఖ్యమైన రోజులను కుటుంబ సభ్యులతో సంతోషంగా గడుపుకోవాలనే ఉద్దేశంతో ఈ వినూత్న నిర్ణయం తీసుకున్నట్లు పోలీస్ ఉన్నతాధికారులు తెలిపారు.
పోలీసుల సంక్షేమంపై కూటమి సర్కార్ ఫోకస్
సాధారణంగా పోలీసు విధుల్లో సెలవులు దొరకడం చాలా కష్టమైన పని. పండుగలు, బందోబస్తులు, అత్యవసర సమయాల్లో వారు 24 గంటలు అందుబాటులో ఉండాల్సి వస్తుంది. గతంలో తెలంగాణ సహా పలు రాష్ట్రాల్లో ఇటువంటి విధానాన్ని ప్రవేశపెట్టగా, ఇప్పుడు ఏపీలో కూడా అమలు చేయడం వల్ల పోలీసు సిబ్బంది హర్షం వ్యక్తం చేస్తున్నారు. దీనివల్ల వారిపై ఉండే పని ఒత్తిడి కొంతమేర తగ్గి, విధుల్లో మరింత సమర్థవంతంగా పనిచేసే అవకాశం ఉంటుందని రాష్ట్ర ప్రభుత్వం, హోం మంత్రిత్వ శాఖ భావిస్తోంది.
టాప్ హెడ్ లైన్స్
ట్రెండింగ్ వార్తలు
