Nellore RedCross : రూ. 500కే ఐసీయూ ఆన్ వీల్స్.. నెల్లూరు వాసులకు రెడ్‌క్రాస్ సేవ !

అత్యాధునిక అంబులెన్స్ సౌకర్యాన్ని పేదవారికి తెచ్చిన నెల్లూరు రెడ్ క్రాస్ సభ్యులు అందుబాటులోకి తెచ్చారు. రూ. 500 నామమాత్రపు రుసుముతో పేదలు వినియోగించుకోవచ్చు.

నెల్లూరు ప్రజలకు అందుబాటులో అత్యాధునిక అంబులెన్స్

పేదలకు హఠాత్తుగా ఏదైనా ఆపద వస్తే ఆస్పత్రికి తీసుకెళ్లడానికి అంబులెన్స్‌లకే వేలకు వేలు పెట్టాలి. అదీ కూడా పేరుకే అంబులెన్స్ ఉంటుంది కానీ అందులో లైఫ్ సేవింగ్ ఏర్పాట్లేమీ ఉండవు. కానీ అంబులెన్స్ లోనే ఐసీయూ యూనిట్, వెంటిలేటర్, ఆక్సిజన్ సహా ఇతర అన్నిరకాల సదుపాయాలు.. ఒకరకంగా చెప్పాలంటే ఐసీయూ తరహా ఏర్పాట్లు ఉన్న అంబులెన్స్  లభించడమే కష్టం. కేవలం కార్పొరేట్ ఆస్పత్రులు మాత్రమే భారీ ఖర్చుతో ఇలాంటివి సమకూరుస్తాయి. మెరుగైన వైద్యం కోసం ఒక ప్రాంతం నుంచి మరో ప్రాంతానికి తరలించాలంటే అందరికీ అది సాధ్యమయ్యే పని కాదు. పేదలకు అసలు సాధ్యం కాదు. 

కానీ పేదలకు అలాంటి ఐసీయూ సౌకర్యాలు ఉన్న అంబులెన్స్ సౌకర్యాన్ని తీసుకొచ్చింది రెడ్ క్రాస్ సంస్థ. నెల్లూరు జిల్లాలో ఈ అడ్వాన్స్ డ్ కార్డియాక్ లైఫ్ సపోర్ట్ అంబులెన్స్ సేవలు అందుబాటులో ఉన్నాయి. కేవలం 500 రూపాయల  నామ మాత్రపు రుసుముతో ఈ సదుపాయాలు అందజేస్తున్నారు. నిరుపేదలయితే పేదవారికి మరింత రాయితీ ఇస్తామని నెల్లూరు రెడ్ క్రాస్ సంస్థ చైర్మన్ చంద్రశేఖర్ రెడ్డి చెబుతున్నారు.

నెల్లూరు రెడ్ క్రాస్ సంస్థ లాక్ డౌన్ సమయంలో కూడా నిరుపేదలకు అండగా నిలబడింది. కరోనా వల్ల ఇబ్బందులు పడుతూ ఆస్పత్రుల్లో బెడ్స్ దొరక్క అవస్థలు పడిన రోగులకోసం గతంలో ఆక్సిజన్ బస్సులను కూడా ఏర్పాటు చేసింది. మొబైల్ కొవిడ్ వార్డుల పేరుతో బస్సుల్లో ప్రతి సీటుకి ఒక ఆక్సిజన్ సిలిండర్ ని అమర్చి ఆస్పత్రుల వద్ద ఉంచారు. కొవిడ్ తో మరణించినవారి దహన సంస్కారాల కోసం కూడా క్రిమేషన్ వ్యాన్ ని ఏర్పాటు చేశారు. 

ఇప్పుడు అడ్వాన్స్ డ్ టెక్నాలజీతో రూపొందిన అత్యాధునిక అంబులెన్స్ సేవలను కూడా అందుబాటులోకి తెచ్చింది రెడ్ క్రాస్ సంస్థ. అంబులెన్స్ కావలసిన  వారు  9647108108, 9493676146, 8639310160 ఫోన్ నెంబర్లలో సంప్రదించాలని కోరారు రెడ్ క్రాస్  నిర్వాహకులు.  ప్రతి అంబులెన్స్ లో ఒక డ్రైవర్, టెక్నీషియన్ అందుబాటులో ఉంటారు. అంబులెన్స్ లోనే ప్రథమ చికిత్స చేస్తారు .  పేదలు ఈ సౌకర్యాన్ని వినియోగించుకుని అత్యవసర పరిస్థితుల్లో సాయం పొందాలని రెడ్ క్రాస్ వారు విజ్ఞప్తి చేస్తున్నారు. 

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి