Guntur News: డబ్బాలో పాముతో ఆసుపత్రికి యువకుడు... హడలెత్తిపోయిన సిబ్బంది... ఎందుకలా చేశాడో తెలుసా...

పామును డబ్బాలో పెట్టుకుని ఆసుపత్రికి వెళ్లాడో ఓ వ్యక్తి. అసలు ఆ వ్యక్తి ఎందుకలా చేశాడో తెలుసా...!

డబ్బాలో పాము(ప్రతీకాత్మక చిత్రం)

పాము కాటేస్తే మనం ఏంచేస్తాం... ఇంకేమైనా ఉందా.. లబోదిబోమని కేకలు వేస్తాం. ధైర్యం కూడగట్టుకుని ప్రథమ చికిత్స చేసుకుని వైద్యుడి దగ్గరికి పరుగులు తీస్తాం. పామును చూస్తేనే హడలిపోతాం కానీ ఈ యువకుడు చేసిన ధైర్యం అంతా ఇంతా కాదు. కాటేసిన పామును డబ్బాలో పెట్టుకుని ఆసుపత్రికి తీసుకెళ్లాడు. అసలు ఎందుకలా చేశాడో తెలిస్తే మీరు అవాక్కవుతారు. 

గుంటూరు జిల్లాలోని నందివెలుగు గ్రామానికి చెందిన  వీరాంజనేయులును అనే వ్యక్తిని విషసర్పం కాటేసింది. అతడు బతికున్న ఆ తాచుపాము డబ్బాలో పెట్టుకుని తెనాలి ప్రభుత్వ వైద్యశాలకి వచ్చాడు. దీంతో ఆసుపత్రి సిబ్బంది ఆశ్చర్యానికి గురయ్యారు.

ఆ తర్వాత పామును వదిలేస్తా...

నందివెలుగుకు చెందిన వీరాంజనేయులు ఓ సిమెంట్ రాళ్ల పరిశ్రమలో ట్రాక్టర్ డ్రైవర్‌గా పనిచేస్తున్నాడు. సిమెంట్ ఇటుకల లోడ్ చేసుకునేందుకు ట్రాక్టర్‌తో సహా నందివెలుగు వచ్చాడు. బ్రిక్స్‌ను ట్రాక్టర్లలో లోడు చేసేందుకు తీస్తున్నప్పుడు వీరాంజనేయులను తాచుపాము కాటేసింది. అతడు కాటేసిన తాచుపామును డబ్బాలో పెట్టి బంధించాడు. తనతో పాటు ఆ పామును వైద్యశాలకు తీసుకొచ్చాడు. పామును డబ్బాలో తీసుకురావడంతో అక్కడున్న వైద్య సిబ్బంది ఆశ్చర్యపోయారు. ఏ పాము కాటేసిందో వైద్యులను అడిగేందుకు పామును డబ్బాలో పెట్టుకుని తీసుకువచ్చినట్టు అతడు తెలిపాడు. అయితే వీరాంజనేయులు ఆరోగ్య పరిస్థితి బాగానే ఉందని వైద్యులు తెలిపారు. తనకు వైద్యం పూర్తి అవ్వగానే పామును వదిలేస్తానని వీరాంజనేయులు తెలిపాడు.

పామును నోటితో కొరికి

 పాము కనబడితేనే ఆమడదూరం పారిపోతాం. మరి అలాంటి పామును నోటితో కొరికి చంపడమంటే మాటలా...ఊహించుకుంటేనే ఏదోలా ఉంది కదా.  ఇలాంటి సంఘటన చోటుచేసుకుంది. అయితే ఓ వ్యక్తి మాత్రం పామును పరపరా కొరికి చంపేశాడు. ఒడిశా జాజ్‌పూర్ జిల్లా దనగాడి తాలూకా గంభారిపాటియా గ్రామానికి చెందిన కిషోర్ బద్రా వ్యవసాయ పనులు పూర్తిచేసుకుని ఇంటికి వస్తున్నాడు. చీకట్లో ఓ పాముపై అడుగు వేశాడు. అది వెంటనే బద్రా కాలిపై కాటువేసింది. ఇది గమనించిన బద్రా కోపంతో పామును చేతుల్లోకి తీసుకుని నోటితో కొరికి చంపేశాడు.