Revanth Reddy At WEF: దావోస్‌‌లో తెలంగాణ రైజింగ్ 2047 డాక్యుమెంట్ పరిచయం చేయనున్న రేవంత్ రెడ్డి టీం

దావోస్‌లో జరగనున్న ప్రపంచ ఆర్థిక వేదిక (WEF) వార్షిక సదస్సులో పాల్గొనేందుకు తెలంగాణ ముఖ్యమంత్రి రేవంత్ రెడ్డి నేతృత్వంలోని రాష్ట్ర ఉన్నత స్థాయి ప్రతినిధి బృందం జ్యూరిచ్ చేరుకుంది.   

స్విట్జర్లాండ్‌లోని జ్యూరిచ్ నగరంలో సీఎం రేవంత్ రెడ్డి బృందానికి ఘన స్వాగతం

Source : ABP Desam

హైదరాబాద్: ప్రపంచ ఆర్థిక సదస్సులో పాల్గొనేందుకు వెళ్లిన ముఖ్యమంత్రి రేవంత్ రెడ్డి, మంత్రి పొంగులేటి శ్రీనివాస రెడ్డి, ఉన్నతాధికారుల బృందానికి స్విట్జర్లాండ్‌లోని జ్యూరిచ్ విమానాశ్రయంలో ప్రవాస తెలంగాణవాసులు (Telangana Diaspora) ఘనస్వాగతం పలికారు. ఇప్పటికే మరో మంత్రి దుద్దిళ్ల శ్రీధర్ బాబు దావోస్ చేరుకోగా, నేటి నుంచి నాలుగు రోజుల పాటు ఈ బృందం వరుస సమావేశాల్లో పాల్గొననుంది. పర్యటనలో భాగంగా మొదటి రోజు వివిధ రంగాలకు చెందిన అంతర్జాతీయ కంపెనీల పారిశ్రామికవేత్తలు, సీఈఓలతో ముఖ్యమంత్రి భేటీ కానున్నారు.

ఈ పర్యటనలో ప్రధానంగా ‘తెలంగాణ రైజింగ్ 2047’ రోడ్ మ్యాప్‌ను ప్రపంచ వేదికపై ముఖ్యమంత్రి పరిచయం చేయనున్నారు. గతేడాది డిసెంబర్‌లో ప్రభుత్వం ఆవిష్కరించిన ఈ విజన్ డాక్యుమెంట్ ఆధారంగా రాష్ట్ర భవిష్యత్తు అభివృద్ధి లక్ష్యాలు, ప్రభుత్వ పారిశ్రామిక విధానాలు మరియు పెట్టుబడులకు ఉన్న అనుకూలతలను ఆయన ప్రస్తావిస్తారు. తెలంగాణను అంతర్జాతీయ స్థాయిలో అగ్రగామిగా నిలిపేందుకు అవసరమైన సుస్థిర పెట్టుబడులను ఆకర్షించడమే ఈ పర్యటన ప్రధాన ఉద్దేశ్యం.

తెలంగాణ రైజింగ్ 2047
ఈ విజన్ డాక్యుమెంట్ 2047 నాటికి తెలంగాణను $1 ట్రిలియన్ ఆర్థిక వ్యవస్థగా మార్చాలనే లక్ష్యంతో రూపొందించారు. ఇందులో ఏఐ (AI), సెమీకండక్టర్లు, గ్రీన్ ఎనర్జీ రంగాలకు పెద్దపీట వేశారు. గత ఏడాది దావోస్ పర్యటనలో సుమారు రూ. 40,000 కోట్ల పెట్టుబడులకు సంబంధించిన ఒప్పందాలు కుదిరాయి. ఈసారి ఆ సంఖ్యను మరింత పెంచాలని రేవంత్ ప్రభుత్వం భావిస్తోంది. నాల్గవ పారిశ్రామిక విప్లవం (4IR) కేంద్రంగా హైదరాబాద్‌ను మార్చడంతో పాటు రీజినల్ రింగ్ రోడ్ వెంట నిర్మించ తలపెట్టిన పారిశ్రామిక క్లస్టర్ల గురించి ముఖ్యమంత్రి రేవంత్ రెడ్డి ఈ సదస్సులో వివరించే అవకాశం ఉంది.